Fréttir

Það styttist óðum í að jólasöngvarar hefji upp sínar raustir enda jólin að nálgast seilingarfjarlægð. Í Skagafirði eru nú í það minnsta þrennir jóla-popp-tónleikar planaðir en Feykir hefur áður sagt frá Jólasveiflu í Miðgarði í lok nóvember þar sem jólalögin hans Geira verða í öndvegi og Jólin Heima sem verða í Miðgarði 12. desember. Nú hafa bæst við jólatónleikar í Sauðárkrókskirkju 3. desember þar sem Lón & Rakel verða á mjúku nótunum.

Í frétt á Húnahorninu segir að byggðarráð Húnabyggðar hafi áhyggjur af áformum um sameiningu lögregluembætta og að sú miðstýring sem þar er boðuð geti haft neikvæð áhrif á öryggi íbúa. Sérstaklega er bent á hættu á fækkun starfa, lengri útkallstíma og minni áherslu á löggæslu í dreifbýli þegar fram líða stundir. Ráðið telur slíkt óásættanlegt.

Það var leikið í Síkinu í gærkvöldi en þá kom lið Ármanns í heimsókn. Það fór svo að lið Tindastóls var töluvert sterkari aðilinn og vann alla leikhlutana en það má þó segja að Stólarnir hafi svo gott sem gert út um leikinn í öðrum leikhluta en í hálfleik var staðan 54-37. Mest varð forysta Stólanna 30 stig í síðari hálfleik en gestirnir náðu að laga stöðuna örlítið á lokakaflanum. Lokatölur 109-86.

Sumt er nú þannig að manni verður fyrirmunað að skilja. Við tölum um að það vanti raforku, flutningskerfið hamli atvinnuuppbyggingu og hraða þurfi orkuskiptum. Á sama tíma berast fréttir af samdrætti í byggingariðnaði og auknu atvinnuleysi. Verkefnin vantar ekki. Þörfin er fyrir hendi. Hvernig væri að tengja þetta saman?

Hvernig var lífið í verbúðum við ysta haf á 12. öld? Hvernig stytti fólk sér stundir þegar enginn var síminn eða sjónvarpið? Undanfarin sumur hefur fornleifarannsókn farið fram í Hafnabúðum á Hjallanesi í landi Hafna á Skaga þar sem umfangsmikil verbúðabyggð hefur verið við sjávarsíðuna. Markmiðið með rannsókninni var að rannsaka líf og starf fólks í gamalli verstöð og hvernig sjávar- og strandauðlindir voru nýttar. Rannsóknirnar benda til þess að starfsemin hafi verið fjölbreytt. Þar fundust meðal annars vísbendingar um fiskveiðar, hvalveiðar, selveiðar, textílvinnu og matargerð. Konur, menn og börn hafa dvalið á staðnum, en ekki eingöngu karlmenn líkt og uppistaðan í seinni tíma hugmyndum um verstöðvar og sjómennsku hefur oft verið.

Þá er komið að fyrsta heimaleik hjá Tindastóli í Bónusdeild karla. Mótherjarnir eru kapparnir í Ármanni en þeim er ekki spáð góðu gengi í deildinni. Spekingarnir á karfan.is segja: „Ingvi Þór Guðmundsson er frábær leikmaður. Lið Ármanns að öðru leyti? Neibb, lóðbeint niður eins og staðan er núna.” Þeir segja líka: „Hvernig tekst Tindastóli að leysa verkefnið í Síkinu með ökkla Drunga laskaðan? Getur Ingvi Þór Guðmundsson haldið Ármanni á floti gegn Stólunum og afsannað hrakspárnar?”

Á vef Háskóla Íslands á Hólum er birt mjög svo áhugaverð grein um rannsóknir á kolefnisbindingu í beittu landi og óbeittu. Niðurstöður stangast nokkuð á við það sem haldið hefur verið fram af náttúruverndarfólki sem barist hefur fyrir friðun á landi.

Barnamenningarhátíð Norðurlands vestra, Skúnaskrall – Öll saman, hefst með pompi og prakt 21. október og stendur til 4. nóvember. Meðal viðburða eru hrekkjavökuböll á Hofsósi og Blönduósi, stuttmyndir frá UngRIFF í leik- og grunnskólum, Umskiptingar sýna leikritið um Fóu og Fóu feykirófu en síðast en alls ekki síst þá mun Páll Óskar heimsækja alla grunnskóla landshlutans og syngja fyrir nemendur.

Þá er veðrið sem hefur gengið yfir landið að láta undan síga. Hér um slóðir eru engar sögur um nein meiriháttar tjón. Um tíma höfðu menn varann á sér á Skagaströnd vegna hárrar sjávarstöðu. Sjór gekk eitthvað yfir höfnina en án skaða. Einn smábátur var við það að losna frá bryggju og aðstoðaði björgunarsveitarfólk við að tjóðra hann niður. Að sögn Reynis Lýðssonar formanns björgunarsveitarinnar Strandar var það eina útkallið sem þau fengu.

Skagfirðingurinn, ljóðskáldið og fræðimaðurinn Hannes Pétursson (fæddur á Sauðárkróki í desember 1931) hefur verið meðal höfuðskálda þjóðarinnar í rúma sjö áratugi eða frá því að hann kvaddi sér hljóðs með Kvæðabók árið 1955. Það heyrir til tíðinda þegar hann sendir frá sér ljóðabók og því ánægjulegt að segja frá því að hann hefur sent frá sér ljóðabókina Hjá Leyningsvötnum.