Fréttir

Í dag héldu skólarnir í Skagafirði sinn árlega vinadag. Var þetta í sjötta skipti sem dagurinn er haldinn en á vinadegi koma allir grunnskólanemendur fjarðarins saman ásamt skólahópum leikskólanna og nemendum FNV.

Sveitarstjórn Skagabyggðar hefur tekið ákvörðun um að gerast þátttakandi í sameiningarviðræðum sveitarfélaganna í Austur-Húnavatnssýslu. Skagabyggð bætist því í hóp hinna þriggja sveitarfélaganna í sýslunni sem ákveðið hafa að hefja formlegar viðræður um sameiningu. Reiknað er með að þær viðræður hefjist á næstunni. Frá þessu var greint á Húna.is í gærkvöldi.

Föstudaginn 20. október kl. 17:00 verður haldin bókarkynning á Bókasafni Húnaþings vestra þar sem Vilhelm Vilhelmsson, sagnfræðingur á Hvammstanga, kynnir nýútkomna bók sína, Sjálfstætt fólk: Vistarband og íslenskt samfélag á 19. öld. Boðið verður upp á léttar veitingar og bókin verður til sölu á sérstölum kjörum.

Það ætti ekki að hafa farið framhjá neinum að það styttist í enn einar alþingiskosningarnar. Níu flokkar bjóða fram í Norðvesturkjördæmi og því um nóg að velja þann 28. október nk. Í auglýsingu sem birtist í Feyki og Sjónhorni nú í dag birti yfirkjörstjórn í Skagafirði rangan opnunartíma kjördeildar á Hólum í Hjaltadal og er beðist velvirðingar á því.

Hugbúnaðarfyrirtækið Stefna á Akureyri opnaði formlega skrifstofu á Sauðárkróki sl. föstudag en fyrirtækið hefur átt trausta og góða viðskiptavini á svæðinu í gegnum árin. „Þó ekki sé langt til Akureyrar og samskipti fari að mestu fram rafrænt, þá er það von okkar að með opnun skrifstofunnar eflist þjónustan enn frekar,“ segir Róbert Freyr Jónsson sölustjóri og ráðgjafi Stefnu. Í tilefni dfagsins var boðið upp á léttar veitingar ásamt því að gestir voru fræddir um starfsemi fyrirtækisins.

Það ríkti mikil eftirvænting í hópi þeirra ungu knattspyrnuáhugamanna sem mættu á æfingasvæði íþróttavallarins sl. mánudag, vopnaðir skóflum og rekum og jafnvel stungugöflum. Langþráð stund var upprunnin þegar taka skyldi fyrstu skóflustunguna að nýjum gervigrasvelli sem gerbreyta mun allri æfingaaðstöðu á Sauðárkróki og Skagafirði öllum.

Ákvörðun mín að sækjast eftir oddvitasæti í Norðvesturkjördæmi í komandi þingkosningum hefur komið ýmsum á óvart, enda kannski ekki algengt að bæjarfulltrúi á suðvesturhorninu óski eftir umboði til að vinna öðru kjördæmi gagn á þingi. Ég hef hins vegar sjaldnast fetað troðnar slóðir og tel mikilvægt að fólk hugsi og stígi út fyrir kassann, út fyrir þægindahringinn, alls staðar þar sem kostur gefst. Glöggt er gests augað.

Mánudaginn 16. október stóð Fjárræktarfélag Staðarhrepps fyrir Hrútasýningu fyrir Miðfjarðarhólf. Sýningin var haldin á Hvalshöfða í Hrútafirði. Vel var mætt, bæði af fólki og fénaði en yfir 50 hrútar voru skráðir til leiks í þremur flokkum; hvítir hyrndir, mislitir og kollóttir. Að sögn Guðrúnar Eikar Skúladóttur, bónda á Tannstaðabakka, voru flokkarnir allir firnasterkir og sem dæmi má nefna að sex hrútar af þeim sem skráðir voru til leiks höfðu stigast upp á 90 stig og yfir. Einnig voru 18 gimbrar skráðar til leiks í Skrautgimbraflokki, en í þeim flokki er vegið saman bæði litur og átak.

Næstkomandi föstudag, þann 20. október, munu Samtök sveitarfélaga á Norðurlandi vestra standa fyrir ráðstefnu um framtíð landbúnaðar á Norðurlandi vestra. Hún verður haldin í Félagsheimilinu á Hvammstanga, hefst kl. 13:00 og er áætlað að henni ljúki kl. 17:00. Ráðstefnan er öllum opin og er skráning á netfanginu ssnv@ssnv.is.

Þessa dagana stendur íbúum Norðurlands vestra til boða ókeypis heilsufarsmæling á vegum forvarnarverkefnisins SÍBS Líf og heilsa eins og greint var frá á Feyki.is í síðustu viku. Í dag milli kl. 14:00 og 16:00 verður mælt á Skagaströnd og á Sauðárkróki milli kl. 8:00 og 15:00 á morgun en mælingum er lokið á öðrum stöðum. Heilsugæslan á Sauðárkróki vill koma þeim skilaboðum til þeirra sem ætla að mæta í heilsufarsmælingu þar að gengið skuli inn við sjúkraþjálfun að sunnan en ekki aðalinngang.