Fréttir

Það var í nógu að snúast hjá Björgunarsveitum úr Húnavatnssýslum, Skagafirði, Ólafsfirði og Eyjafirði á meðan á Landsmóti hestamanna stóð á Hólum í Hjaltadal um síðastliðna helgi. Samkvæmt vef Landsbjargar störfuðu sveitirnar við gæslu á Landsmótinu, sáu um öryggis- og sjúkragæslu og eftirliti við hlið inn á mótssvæði.

Hinn árlegi styrkur Hrossaræktar ehf. til góðgerðarmála var afhentur formlega á landsmóti hestamanna á Hólum sl. laugardag. Söfnunin hófst að venju á Stóðhestaveislunni í apríl sl. þar sem miðasala í árlegu stóðhestahappdrætti fór af stað. Þar barst að auki góður liðsstyrkur frá velgjörðarsjóðnum Aurora sem lagði til rausnarlegt framlag í minningu Einars Öders Magnússonar hestamanns.

Skagfirðingurinn Rún­ar Már Sig­ur­jóns­son, landsliðsmaður í knatt­spyrnu, hef­ur skrifað und­ir samn­ing við sviss­neska fé­lagið Grass­hopp­er til þriggja ára. Rún­ar hefur leikið með sænska liðinu Sundsvall eft­ir að hafa verið í ís­lenska landsliðshópn­um á EM í Frakklandi. Mbl.is greinir frá.

Samkvæmt frétta á nordanatt.is Í dag, fimmtudaginn 7. júlí verður kynning á bogfimi haldin í íþróttamiðstöðinni á Hvammstanga. Verður kynningin í boði USVH og Umf. Kormáks og hefst klukkan 14:00 og stendur til klukkan 16

Níræður ferðamaður frá Spáni lést seinnipartinn þann 5. júlí þar sem hann var við veiðar í Blöndu ásamt þremur samlöndum sínum. Dánarorsök er hjartastopp.

Binni Rögnvalds er fæddur á því herrans eitís ári 1984. Hann er sonur Hrannar og Rögga Valbergs tónlistarkennara og organista og alinn upp á Króknum og býr þar í dag. Binni spilar aðallega á gítar en þó einnig á píanó, bassa og ýmis önnur hljóðfæri. Helsta afrek sitt á tónlistarsviðinu segir hann vera að hafa árið 2011 gefið út plötuna A Little Trip með frumsömdum lögum og textum. Hann hefur spilað inn á ýmsar plötur, þar á meðal fyrir rapparann Ramses, og tekið þátt í allskonar tónleikum og giggum í gegnum árin og þá tók Binni þrisvar sinnum þátt í Söngkeppni Framhaldsskólanna, ávallt með frumsamin lög.

Pálmi Ragnarsson frá Garðakoti í Skagafirði greindist fyrir nokkrum árum með krabbamein og hefur hann barist af krafti við það síðan með hjálp eiginkonu sinnar, Ásu Sigurrósu Jakobsdóttur. Hann hefur einnig þurft að berjast við kerfið því læknar vildu ekki senda Pálma í meðferð í Þýskalandi er kallast Proton geislameðferð. Blaðamaður Feykis sótti hjónin heim í Garðakot, í þann mund sem þau afhentu Krabbameinsfélagi Skagafjarðar peningagjöf í nýstofnaðan utanfararsjóð félagsins, og tók þau tali.

Næstkomandi helgi, dagana 8. og 9. Júlí verður haldin menningarhátíð í Blönduhlíð sem nefnist Listaflóð á Vígaslóð.

Þann 14. júní sl. voru 15 ár liðin frá því fyrsta fréttin var birt á vefmiðlinum Húnahornið, eða Húni.is. Óslitið síðan hafa verið sagðar fréttir af mannlífi, atvinnulífi, framkvæmdum og framförum í héraðinu, eflingu byggðar og öllu því sem gerir Húnavatnssýslu sérstaka að lifa og starfa í eða heimsækja sem ferðamaður. „Það hefur ýmislegt gengið á sl. 15 ár en ekkert svo stórt að það hafi haft áhrif á vinnuna við vefinn. Vissulega höfum við rætt það nokkrum sinnum hvort að komið væri nóg, hvort að þörfin væri fyrir hendi o.s.frv. en á meðan okkur finnst þetta svona skemmtilegt og við höfum tíma, þá höldum við áfram,“ sagði Ragnar Z, Guðjónsson, ábyrgðar- og fyrirsvarsmaður Húnahornsins, í samtali við Feyki.

Greinilega fjölgun gesta er á milli ára hjá Byggðasafni Skagfirðinga, samkvæmt því sem segir á Facebook-síðu Byggðasafnsins. Árið 2015 var tala gesta í Minjahúsi frá áramótum til loka júní 636, á þessu ári eru þeir orðnir 1.339.