Fréttir

„Skjótt skipast veður í lofti,“ segir máltækið og það á svo sannarlega við í Skagafirði þessa dagana. Eflaust hafa einhverjir verið uggandi um hvernig viðra myndi á landsmótsgesti á Hólum eftir rigningu og kulda á þriðjudaginn.

Júlía Kristín Pálsdóttir á Kjarval frá Blönduósi er efst inn í A-úrslit í barnaflokki á Landsmóti hestamanna, að loknum milliriðlum í gær. Hlutu þau 8,82 í einkunn. Næstar á eftir fylgja þær Glódís Líf Gunnarsdóttir á Magna frá Spágilsstöðum og Védís Huld Sigurðardóttur á Baldvin frá Stangarholti.

Íbúar á Reykjaströnd í Skagafirði hafa farið þess á leit við Sveitarfélagið Skagafjörð að það beiti sér fyrir nauðsynlegum úrbótum á Reykjaströndinni. Í bréfi, dagsett 10. júní, sem tekið var fyrir á fundi byggðarráðs þann 23. júní sl. er talin upp forgangsröðun á uppbyggingu samgöngumannvirkja, snjómokstri, sorphirðu, lækkun kyndingarkostnaðar með hitaveituvæðingu, þriggja fasa rafmagni, síma og nettengingar.

SAH afurðir á Blönduósi hyggjast koma upp búnaði til eyðingar á áhættuvefjum úr sláturdýrum við sláturhúsið á Blönduósi. Gert er ráð fyrir að hægt yrði að brenna allt að 250 tonnum af úrgangi á ári.

Skipulagslýsing vegna fyrirhugaðs deiliskipulags fyrir Flæðar og íþróttasvæði við Skagfirðingabraut á Sauðárkróki var samþykkt á fundi sveitarstjórnar Sveitarfélagsins Skagafjarðar í gær.

Tveir hestar eru efstir og jafnir í flokki 4v stóðhesta eftir fordóma í gærmorgun. Það eru þeir Valgarð frá Kirkjubæ, sýndur af Guðmundir Fr. Björgvinssyni og Sirkus frá Garðshorni á Þelamörk, sýndur af Agnari Þór Magnússyni. Hlutu þessir hestar 8,45 í aðaleinkunn.

Katla frá Ketilsstöðum og Bergur Jónsson leiða keppni í tölti á Landsmóti hestamanna á Hólum, eftir að forkeppni lauk í gærkvöldi. Í öðru sæti eru Stormur frá Herríðarhóli og Árni Björn Pálsson og í því þriðja Gloría frá Skúfslæk og Jakob Svavar Sigurðsson.

Líkt og undanfarna Lummudaga var markaður í Aðalgötunni og nágrenni á laugardeginum. Þar var að sjálfsögðu margt um manninn og margt í boði í sölutjöldum. Veðrið var skínandi gott, hlýtt og stillt og sólarglennur af og til. Að sjálfsögðu var víða hægt að ná sér í lummur og Bakarastéttin var að venju þétt setin.

Friðrik Jónsson ehf. hyggst breyta gamla barnaskólanum á Freyjugötunni á Sauðárkróki í íbúðarhúsnæði. Um er að ræða ellefu íbúðir og áætlað er að verkið taki um 18 mánuði en hafist verður handa í október og verklok því í maí 2018. Það er Sýll ehf. sem annast framkvæmdir en Sýll er í eigu Friðriks Jónsson ehf og Snæbóls ehf.

Landsmót hestamanna er komið á fulla ferð eins og lesendur Feykis.is hafa eflaust áttað sig á. Á annað þúsund manns voru mættir á mótið á Hólum í Hjaltadal áður en keppni hófst á mánudag og kom góð mæting svo snemma móts skemmtilega á óvart. Um 5000 miðar seldust í forsölu fyrir mótið, þar af keyptu útlendingar fjórðunginn, og er því reiknað með a.m.k. 5000 gestum á Landsmót.