Fréttir

Eftirlitsnefnd með fjármálum sveitarfélaga hefur sent Sveitarfélaginu Skagaströnd bréf þar sem gerð er athugasemd við niðurstöðu rekstrarreiknings sveitarfélagsins árið 2014 en niðurstaða A hluta var neikvæð um 37,9 milljónir króna og niðurstaða A og B hluta var neikvæð um 18,8 milljónir króna.

Árlegt golfmót brottfluttra Skagfirðinga fór fram í Borgarnesi á dögunum. Þrátt fyrir norðaustan belging var þátttakan með allra besta móti, um 90 keppendur og þar af um þriðjungur sem kom að norðan til að hitta gamla kunningja og etja kappi við þá.

Víða á Norðurlandi vestra er réttað nú um helgina. Í Húnaþingi vestra var réttað í Hrútatungurétt og Miðfjarðarrétt á laugardainn. Í Austur-Húnavatnssýslu var réttað í Fellsrétt, Fossárrétt í Skagabyggð, Hlíðarrétt, Kjalarlandsrétt í Skagabyggð á laugardaginn en réttað var í Skrapatungurétt í gær, sunnudag.

Þriðjudaginn 1. september voru framkvæmdir á Hólum í Hjaltadal kynntar fyrir stjórn LH, stjórn LM, mannvirkjanefnd LH og fleiri aðilum sem koma að skipulagi Landsmóts hestamanna 2016.

Málþing um Jóhönnu Jóhannesdóttur frá Svínavatni verður haldið í Kvennaskólanum á Blönduósi þann 27. september næstkomandi. Jóhanna, sem fædd var 4. nóvember 1895 og lést 1. maí 1989, var bóndi og hæfileikarík handyrðakona frá bænum Svínavatni í Austur-Húnavatnssýslu.

Eitt af því sem íslensku landsliðsmennirnir í körfubolta hafa sér til dægrastyttingar er kveðskapur. Sem kunnugt er skipar hinn skagfirski Axel Kárason sæti í liðinu og mun honum hafa þótt kveðskapur liðsfélaga sinna hálfgerður leir, sem varð til þess að hann orti baráttuóð til íslensku leikmannanna sem munu spreyta sig í Berlín.

Illugi Gunnarsson, mennta-og menningarmálaráðherra var á þriðjudaginn á ferð um Norðurland vestra og undirritað þjóðarsáttmála um læsi, ásamt fulltrúum sveitarfélaganna á svæðinu og fulltrúa Heimilis og skóla. Verkefnið er samstarfsverkefni mennta- og menningarmálaráðuneytis, Sambands íslenskra sveitarfélaga, Kennarasambands Íslands og samtakanna Heimili og skóli. Markmið verkefnisins er að við lok grunnskóla geti öll skólabörn lesið sér til gagns en lestrarfærni er forsenda virkrar þátttöku í lýðræðissamfélagi. Á þriðjudaginn var sáttmálinn undirritaður í Árskóla á Sauðárkróki af þeim Illuga, Ástu Pálmadóttur, sveitarstjóra Sveitarfélagsins Skagafjarðar og Hrund Pétursdóttur, fulltrúa Heimilis og skóla. Sama dag komu fulltrúar sveitarfélaganna í Austur-Húnavatnssýslu, Strandabyggðar og Húnaþings vestra saman á Blönduósi þar sem hvert sveitarfélaganna undirritaði sáttmálann, ásamt þeim Illuga og Sonju Wium, fulltrúa Heimilis og skóla.

Vegagerðin ætlar að byggja bráðabirgðabrú yfir Vatnsdalsá við bæinn Grímstungu í Vatnsdal og er stefnt að því að hún verði tilbúin eftir um tvær vikur, að því er fram kemur á Mbl.is fyrr í vikunni. Verður hún um fimmtíu metrum fyrir neðan gamla brúarstæðið.

Uppskeruhátíð barna og unglingastarfs Golfklúbbs Sauðárkróks var haldin í síðustu viku. Mætingin var með ágætum og var byrjað á því að taka létt „speed-golf“ mót áður en uppskeruhátíðin sjálf hófst. Að því búnu var farið í golfskálann þar sem allir fengu gjöf frá KPMG og síðan voru veittar viðurkenningar.

Að þessu sinni vill svo skemmtilega til að það er spekingur í lögum sem svarar Tón-lystinni. Um er að ræða Skagstrendinginn Guðmund Egil Erlendsson (1975) sem víða hefur látið að sér kveða við strengjaslátt.