Fréttir

Samkvæmt frétt á Huni.is hafa þau Sigurlaug og Sigurður í Húnabúð, Blönduósi, hug á að koma á legg markaðsdögum fyrir framan verslunina sem yrði vikulegur viðburður. Framkvæmdum er nú að ljúka en stefnt er á að malbika og helluleggja í næstu viku og að skjólgirðing rísi í framhaldinu sem afmarkar svæðið.

Dómum í elsta flokki hryssna hér á LM2016 er lokið, en á vef Eiðfaxa kemur fram að sýningar hafi gengið hægt þar sem margir knapar voru samhliða að taka þátt í B-flokki gæðinga.

Forkeppni í B-flokki á Landsmóti hestamanna sem fram fer á Hólum í Hjaltadal er nú lokið. Efstur með 9,04 í heildareinkunn er Loki frá Selfossi, knapi Árni Björn Pálsson. Í öðru sæti eru Katla frá Ketilsstöðum og Bergur Jónsson með 8,93 og í þriðja sæti Nökkvi frá Syðra-Skörðugili og Jakob Svavar Sigurðsson með 8,90.

Fljótaá í Skagafirði var opnuð í gærmorgun og á vef Morgunblaðsins segir frá því að þar hafi veiði byrjað vel því stórlaxi var landað strax í gærmorgun.

Fjárlaganefnd Alþingis óskaði eftir umsögn um tillögur til þingsályktana um fjármálaáætlun fyrir árin 2017-2021 og fjármálastefnu fyrir 2017-2021 en þær voru lagðar fram á alþingi í apríl síðastliðnum. Stjórn SSNV hefur nú skilað af sér umsögn en þar fagnar stjórnin tillögunum.

Mæðgurnar Guðný Hrund Karlsdóttir, sveitastjóri í Húnaþingi vestra, og Kristrún Ásta Arnfinnsdóttir eru staddar á Evrópumótinu í knattspyrnu í Frakklandi. Þær verða á leik Íslands og Englands á Riviera-vellinum í Nice í kvöld og munu hvetja liðið áfram ásamt ríflega 3000 öðrum Íslendingum. Feykir ræddi við Guðnýju sem var á leik Íslands og Austurríkis síðastliðinn miðvikudag.

Tónlistarveislan VSOT fór fram síðastliðinn föstudag í Félagsheimilinu Bifröst og vakti rífandi lukku. Þar stigu á stokk nokkrar rótgrónar hljómsveitir, flestar úr Skagafirðinum, í bland við ungt og efnilegt tónlistarfólk. Þá stigu ljóðskáld einnig á svið og lásu upp úr bókum sínum. Kynnir kvöldsins var Guðbrandur Ægir Ásbjörnsson.

Björgunarsveitin Húnar og Björgunarfélagið Blanda voru kallaðar út til leitar á erlendum vélhjólamanni að Arnarvatnsheiði á laugardagskvöld, ásamt Björgunarsveitinni Ok. Samkvæmt Facebook-síðu Húna hafði vélhjólamaðurinn óskað aðstoðar og var einnig búinn að festa hjól sitt, en gat ekki gefið greinargóða lýsingu á staðsetningu sinni.

Drangey Music Festival fór fram í gærkvöldi á Reykjum á Reykjaströnd. Er þetta annað árið í röð sem Viðburðaríkt, Sviðsljós og Drangey Tours standa fyrir þessum metnaðarfullu tónleikum og líkt og í fyrra virtust veðurguðirnar hafa talsverða velþóknun á framtakinu því í gær skall á með logni og einstakri blíðu út við ysta haf.

Í morgun hófst Landsbankamótið í knattspyrnu á Sauðárkróksvelli en þar eigast við stúlkur í 6. flokki víða að af landinu. Góð stemning er á mótinu og þrátt fyrir að sólin hafi verið sparsöm á geisla sína hefur veðrið leikið við knattspyrnuhetjurnar þrátt fyrir það; hitinn slagað í 20 gráðurnar og smá sunnangola.