Íþróttir

Síðari leikur tvíhöfðans gegn liðum Stjörnunnar í Garðabæ fór fram í Síkinu í gær og hófst klukkan 20. Stólarnir höfðu endurheimt flesta piltana sem stríddu við meiðsli í undanförnum leikjum og var allt annar bragur á liðinu fyrir vikið en Vlad þjálfari benti einmitt á það að leik loknum að þegar það vantaði bæði Pétur og Arnar þá væri það líkast því að taka hjartað úr liðinu. Leikurinn var ágæt skemmtun og vel spilaður en það voru heimamenn sem komust á sigurbraut á ný, reyndust sterkari aðilinn í síðari hálfleik og fögnuðu kærkomnum sigri gegn góðu Stjörnuliði. Lokatölur 98-89.

Fyrri leikur í tvíhöfða einvígi Tindastóls og Stjörnunnar hófst kl. 17:15 í Síkinu í dag fyrir framan um hundrað áhorfendur. Lið Tindastóls hefur átt undir högg að sækja allt frá því í annarri umferð móts á meðan lið Garðbæinga hefur blómstrað og unnið alla leiki sína. Þrátt fyrir fína byrjun heimastúlkna þá reyndust gæðin meiri hjá gestunum og þær unnu sannfærandi sigur, 71-92.

Í dag, þriðjudaginn 1. nóvember kl. 10:00, verður landsátakið Syndum sett með formlegum hætti í Laugardalslauginni. Að átakinu stendur Íþrótta- og Ólympíusamband Íslands sem er heilsu- og hvatningarátak í sundi og stendur frá 1.- 30. nóvember.

Það voru tveir flokkar sem kepptu um helgina hjá yngri flokkum Tindastóls en það voru 8.fl. drengja og stúlkna. 10.fl. drengja átti einnig að spila tvo leiki við KR í Síkinu en óskað var eftir frestun á þeim leikjum þar sem KR-ingar eru í þjálfaravandræðum. Þeir verða því spilaðir helgina 18. og 19. nóvember í Síkinu og hvetjum við alla til að mæta á þá leiki. Ungmennaflokkur karla var með einn leik á dagskrá á móti Keflavík en þar sem þrír úr hópnum voru meiddir, þeir Eyþór Lár, Orri og Veigar, var óskað eftir frestun og var það samþykkt, sá leikur var færður til 12. nóvember.

Karlalið Tindastóls í körfunni fékk frí um helgina en liðið átti að spila við Njarðvíkinga fyrir sunnan í gær í 16 liða úrslitum VÍS. bikarsins. Ástæðan, eins og öllum ætti að vera kunnugt, er svindl (!) Tindastólsmanna þegar óvart fjórir erlendir leikmenn voru inni á vellinum þegar víti voru tekin. Það var brot á reglum. Í framhaldinu var talað um að Haukar mundu kæra atvikið og verða dæmdur sigur í leiknum en síðan var hald manna að KKÍ hefði tekið málið yfir og sett það í farveg. Í frétt Vísis í dag kemur hins vegar fram að það voru Haukar sem á endanum kærðu.

Það verður ekki sagt að Stólastúlkur hafi haft heppnina með sér þegar dregið var í VÍS bikarnum nú í haust því ekki var nóg með að lið Tindastóls þyrfti að spila á útivelli heldur dróst liðið á móti liði Keflavíkur sem enn hefur ekki tapað leik í Subway-deild kvenna. Það er skemmst frá því að segja að heimastúlkur reyndust sterkari aðilinn í leiknum og unnu hann af öryggi. Lokatölur 88-52 og lið Tindastóls því úr leik í VÍS bikarnum.

Ekki er byrjun Tindastóls í Subwaydeildinni þetta hausið alveg eins og stuðningsmenn höfðu gert sér vonir um. Þrjú töp í fjórum leikjum en það má svo sem segja að lukkan hafi ekki verið í liði með Stólunum. Í gær héldu strákarnir austur á Egilsstaði, Arnar enn ekki með en Pétur ónotaður bekkjarsetumaður. Ragnar var borinn af velli í fyrri hálfleik og Keyshawn kláraði leikinn með tvö stig eftir að hafa sett niður eitt af 17 skotum sínum í leiknum! Leikurinn var engu að síður jafn og spennandi en það voru heimamenn í Hetti sem reyndust sterkari á lokametrunum. Úrslitin 73-69.

Á mánudaginn skelltu nemendur Höfðaskóla á Skagaströnd, sem eru þátttakendur í valgreininni íþróttir og heilsufræði,sér á Krókinn til að taka á honum stóra sínum á Crossfit æfingu hjá Crossfit 550. Krakkarnir fengu smá fræðslu um crossfit og gerðu síðan WOD dagsins eða Work Of the Day eins og það kallast á ylhýru enskunni.

Í Síkinu um helgina átti Ungmennaflokkur karla tvo leiki á móti Grindavík og var fyrri leikurinn spilaður á laugardaginn kl. 16:00 og seinni leikurinn á sunnudeginum kl. 12:00. Þarna voru tvö efstu lið Ungmennaflokks að mætast og var því von á mikilli baráttu.

Það mátti búast við hörkuleik í Ljónagryfju Njarðvíkinga í lokaleik 3. umferðar Subwaydeildarinnar í gærkvöldi þegar heimamenn tóku á móti liði Tindastóls. Vonir stuðningsmanna Stólanna stóðu til þess að Arnar Björns hefði náð að hrista af sér meiðslin sem hafa haldið honum fjarri parketinu í síðustu leikjum og það var því kraftmikill löðrungur þegar í ljós kom að hvork Arnar né Herra Skagafjörður, Pétur Rúnar Birgisson, væru klárir í slaginn. Það var deginum ljósara að aðrir yrðu að axla ábyrgð og stíga upp en því miður, án leikstjórnendanna frábæru, þá var liðið líkast höfuðlausum her. Njarðvíkingar gengu á lagið og lönduðu öruggum 91-68 sigri.