Íþróttir

Mbl.is segir frá því að Hilm­ir Rafn Mika­els­son, 18 ára guttinn frá Hvammstanga, hafi í gærkvöldi fengið tæki­færi með liði Venezia í lokaum­ferð ít­ölsku A-deild­ar­inn­ar í knatt­spyrnu. Feykir sagði frá því í ágúst síðastliðnum að Hilm­ir Rafn hafi gengið til liðs við Venezia frá Fjölni í Grafar­vogi eft­ir að hafa spilað með Fjölni í Lengjudeildinni sumarið 2021.

Eins og flestir vita lauk körfuknattleikstímabilinu síðastliðið miðvikudagskvöld þegar Tindastóll lét í minni pokann fyrir Völsurum í oddaleik í úrslitum Subway deildarinnar. Haldin var uppskeruhátíð sl. föstudagskvöld í íþróttahúsinu á Sauðárkróki og slegið upp balli í kjölfarið. Í tilefni velgengni Tindastóls í körfunni færðu fulltrúar Kaupfélags Skagfirðinga deildinni eina milljón krónur að gjöf.

Úrslit í Skólahreysti 2022 fóru fram í kvöld 21.maí í Íþróttahöllinni í Garðabæ oftast nefnd Mýrin. Keppnin var í beinni útsendinu á Rúv og þeir sem misstu af útsendingunni geta kíkt á hana í leit á Rúv.

Fram kemur á Eidfaxi.is að WR Hólamótinu sé lokið.

Íslandsmót í pílukasti var haldið helgina 14. og 15. maí síðastliðinn og mættu um 70 manns til að taka þátt, meðal þeirra var Arnar Geir Hjartarson sem keppti fyrir hönd pílu og bogfimideildar Tindastóls. Í tilefni þess sendi blaðamaður Feykis Arnari nokkrar spurningar þessu tengdar.

Tindastólsmenn heimsóttu Afríku í dag á OnePlus völlinn en þeir Afríkumenn hafa lengi baslað í 4. deildinni. Þeir náðu að halda aftur af Stólunum fyrsta hálftímann en staðan var 0-2 í hálfleik. Í síðari hálfleik opnuðust hins vegar flóðgáttirnar og gestirnir bættu við tíu mörkum. Donni þjálfari var hæstánægður með framlag Spánverjans Basi sem leikur í fremstu víglínu en kappinn gerði fimm mörk og lagði upp þrjú til viðbótar. Lokatölur semsagt 0-12 og góður sigur staðreynd.

Lið Kormáks/Hvatar tók á móti Skagamönnum í liði Kára á Sauðárkróksvelli í dag í 3. deild karla í knattspyrnu. Liðin voru bæði í efri hluta deildarinnar fyrir leik en það varð fljótt ljóst að Skagamennirnir voru eitthvað pirraðir og voru farnir að segja dómara og aðstoðarmönnum hans til strax í byrjun. Það endaði með því að þeir bæði töpuðu leiknum og hausnum en lið Hínvetninga sýndi og sannaði að það á góða möguleika á að koma á óvart í 3. deildinni í sumar. Lokatölur 3-0 og úrslitin í heildina sanngjörn.

Tindastóll og HK mættust í Lengjudeild kvenna í knattspyrnu á Sauðárkróksvelli í kvöld. Það má segja að þetta hafi verið leikur tveggja ólíkra hálfleika því HK réð ferðinni frá fyrstu mínútu í fyrri hálfleik og leiddu sanngjarnt, 0-1, í hálfleik. Stólastúlkur náðu undirtökunum með mikilli baráttu í síðari hálfleik en þrátt fyrir að hafa skapað sér mýmarga sénsa síðasta stundarfjórðunginn þá kom jöfnunarmarkið ekki í þetta skiptið. HK stúlkurnar hans Guðna Þórs fóru því með öll þrjú stigin með sér suður eftir 0-1 sigur.

Körfuknattleikstímabilinu lauk sem kunnugt er síðastliðið miðvikudagskvöld þegar Valur hafði betur í oddaleik gegn liði Tindastóls eftir hreint magnaða úrslitaseríu. Nú í hádeginu fór verðlaunahátíð KKÍ fram í íþróttamiðstöðinni í Laugardal og þar voru þeir leikmenn sem þóttu skara fram úr heiðraðir sem og þjálfarar. Tveir leikmanna Tindastóls voru valdir í úrvalslið Subway deildar karla, þeir Arnar Björnsson og Sigurður Gunnar Þorsteinsson, og Baldur Þór Ragnarsson, þjálfari Tindastóls, var valinn þjálfari ársins.

Það er ekki laust við að það hafi verið nokkur þreytubragur á liðum Vals og Tindastóls þegar þau áttust við í hreinum úrslitaleik í Origo-höllinni í kvöld. Leikurinn var æsispennandi lengstum, Stólarnir flugu úr startholunum en síðan fóru skotin að geiga og Valsmenn, með Hjálmar Stefánsson í ofurformi, komust inn í leikinn. Jafnt var í hálfleik, 36-36, en í síðari hálfleik fór sóknarleikur beggja liða að hökta verulega og lítið skorað. Einu stigi munaði fyrir lokafjórðunginn en þá var eins og orkan væri meiri í heimaliðinu sem náði yfirhöndinni og náði í sigurinn. Lokatölur 73-60 og til hamingju Valsmenn!