Íþróttir

Skagfirðingar eignuðust nýj­an Norður­landa­meist­ara á Norður­landa­móti í skóla­skák sem fram fór í Vaxjö í Svíþjóð um síðastliðna helgi. Óskar Vík­ing­ur Davíðsson hampaði þar sigri í flokki skák­manna 11 ára og yngri. Óskar er sonur Erlu Hlínar Hjálmarsdóttir frá Brekku og barnabarn Valdísar Óskarsdóttur.

Það sem af er vetri hefur tíðarfarið verið mjög gott til skíðaiðkunar í Tindastóli. Viggó Jónsson staðarhaldari segir að veðurfarslega hafi veturinn verið með eindæmum hagfelldur - ekki mikið um umhleypingar, nóg af snjó í fjallinu og mjög gott færi.

Gunnar Bragi Sveinsson, utanríkisráðherra Íslands og Króksari, brá undir sig betri fætinum í heimsókn um Miðausturlönd í gær þegar hann skellti sér fótbolta við börn í flótta­manna­búðum fyr­ir Palestínu­menn í Bet­lehem. Gunnar Bragi hefur bæði heim­sótt Ísra­el og Palestínu. Í dag er ráðgert að hann fari til Jórdan­íu.

Tindastóll og Snæfell mættust í Síkinu í kvöld í 18. umferð Dominos-deildarinnar í körfubolta. Hólmarar urðu að láta það duga að mæta til leiks með sjö menn og þar af var einn þeirra aðstoðarþjálfari liðsins. Það varð því snemma ljóst að það yrði brekka í þessu fyrir gestina og ekki var það til að hjálpa þeim að Lewis og Dempsey voru óstöðvandi í liði Stólanna. Lokatölur eftir ansi skemmtilegan leik voru 114-85 fyrir Tindastól.

Grasrótarverðlaun KSÍ árið 2016 hlýtur Ungmennafélagið Tindastóll. Á Facebook-síðu KSÍ segir að Tindastóll hafi um áraraðir haldið úti knattspyrnumóti fyrir bæði stráka og stelpur með miklum sóma, Landsbankamót Tindastóls fyrir stúlkur í 6. og 7. flokki og Króksmót Tindastóls fyrir drengi í 5., 6. og 7. flokki.

Sprækir Njarðvíkingar mættu í Síkið í kvöld og spiluðu hörkuleik við lið Tindastóls. Gestirnir voru lengstum skrefinu á undan með Loga Gunnars í stuði og Atkinson ólseigan en Stólarnir reyndust þó seigari á lokametrunum, náðu forystunni þegar mestu skipti og gestirnir fóru á taugum. Lokatölur 88-79 fyrir Tindastól.

Guðmar Freyr Magnússon 15 ára leikmaður Tindastóls slasaðist í fótboltaleik við KA á Akureyri um sl. helgi. Lögregla og sjúkralið var kallað á vettvang til að flytja Guðmar á sjúkrahús sem hafði fengið slæmt högg á nefið. Tilsvör Guðmars vöktu athygli á samfélags- og netmiðlum þegar Lögreglan á Norðurlandi eystra greindi frá atvikinu á Facebook-síðu sinni. „Þegar búið var að binda um sárið var hann spurður hvort hann treysti sér að standa upp og leggjast í börurnar. Þá lá ekki á svarinu: „Að sjálfsögðu! Ég er Skagfirðingur“. Feykir leit í heimsókn til Guðmars sl. mánudag.

Húnvetnska liðakeppnin hófst um síðustu helgi með keppni í smala. Að því er fram kemur í frétt á heimasíðu hestamannafélagsins Þyts heppnaðist mótið afar vel. „Mörg flott tilþrif sáust á vellinum og má með sanni segja að reiðmennska hafi verið til fyrirmyndar eins og Þytsfélaga er von og vísa,“ segir í frétt á vefnum.

Tindastólsmenn héldu austur á Egilsstaði í gær þar sem þeir léku við lið Hattar í Dominos-deildinni í körfubolta. Lið Hattar situr á botni deildarinnar með aðeins einn sigur í vetur en nú á nýju ári hafa þeir alla jafna verið að spila hörkuleiki en mátt bíta í það súra epli að tapa leikjum sínum á ögurstundu. Það varð engin breyting á því í gær því Pétur Birgisson setti niður sigurþrist þegar tvær sekúndur voru eftir af leiknum og breytti stöðunni úr 81-81 í 81-84.

Knattspyrnuiðkendur hjá Tindastóli eru orðni langþreyttir á aðstöðuleysinu á Sauðárkróki. Hitalögnin undir gervigrasinu hefur verið biluð undanfarna tvo vetur og þarf því að byrja á því að moka völlinn fyrir æfingar.