Íþróttir

Dagana 12.–20. júlí fór fram FEIF Youth Cup í Rieden í Þýskalandi. Á mótið koma ungir knapar alls staðar að úr heiminum til að keppa, læra hvert af öðru og kynnast nýju fólki. Súsanna Guðlaug Halldórsdóttir frá Ríp 3 í Hegranesinu var hluti af íslenska hópnum og Feykir fékk hana til að segja frá ferðinni.

Það var ljóst eftir jafntefli á Ólafsfirði um miðja síðustu viku að allir fjórir leikir Tindastóls sem eftir voru í 3. deildinni þetta sumarið yrðu í raun hreinir úrslitaleikir. Staðan á toppi deildarinnar er það jöfn, en fjögur lið berjast um tvö sæti í 2. deild, að það má hvergi út af bregða. Í dag mættu Stólarnir liði Augnabliks í Fífunni og tvö mörk frá Benna á lokakaflanum voru allt sem þurfti til að næla í stigin þrjú. Lokatölur 0-2.

Síðasta vetur tók karlalið Tindastóls þátt í Evrópukeppni í körfubolta. Þátttakan heppnaðist vel, liðið átti marga stórfína leiki í keppninni, það náði góðum árangri og frábær stemning skapaðist í Síkinu sem vakti verðskuldaða athygli út fyrir landsteinana og skilaði körfuknattleiksdtildinni tekjum. Í yfirlýsingu frá stjórn körfuknattleiksdeildar í morgun var sagt frá því að ákveðið hafi verið að endurtaka leikinn og verða Stólarnir því enn á ný þátttakendur í ENBL-deildinni.

Tindastólsmenn héldu á Ólafsfj0rð í gær þar sem lið Knattspyrnufélags Fjallabyggðar beið þeirra. Lið KF fór illa með Stólana á Króknum fyrr í sumar og vann þó óvæntan en sanngjarnan sigur og Stólarnir þurftu að svara fyrir sig í gær og að sjálfsögðu að halda í við liðin í toppbaráttunni. Það fór svo eftir talsverða dramatík á lokamínútunum að liðin deildu stigunum og lokatölur 1-1.

Topplið Hauka úr Hafnarfirði mætti í Húnabyggð í gærkvöldi og atti kappi við lið Kormáks/Hvatar á Blönduósvelli. Það hefur verið hálfgert skrölt á heimamönnum upp á síðkastið og það mátti því reikna með erfiðum leik gegn langefsta liði deildarinnar. Það fór svo að Haukarnir höfðu stigin þrjú með sér heim eftir 1-2 sigur.

Kvennalið Tindastóls mætti liði Hauka í Lengjudeildinni í gærkvöldi og var spilað á Króknum. Líkt og í öllum öðrum leikjum sumarsins – nema einum – urðu stelpurnar okkar að sætta sig við tap. Úrslitin í gær þýða það að Stólastúlkur eru endanlega fallnar í 2. deild og því klárlega kominn tími á uppbyggingu. Lokatölur gærkvöldsins voru 0-3 fyrir Hauka.

Það komu margir góðir gestir á Krókinn til að taka þátt í Unglingalandsmótinu um verslunarmannahelgina. Fjórar körfuboltastúlkur í Val á aldrinum 14-15 ára ákváðu rétt áður en mótið skall á að drífa sig norður. Svo skemmtilega vildi til að þrjár þeirra eiga ættir að rekja á Krókinn. Feykir fékk Elmu Kristínu Stefánsdóttur til að svara nokkrum spurningum og við byrjuðum á að spyrja hver hún væri.

Margrét Magnúsdóttir, landsliðsþjálfari U16 kvenna, hefur valið leikmannahóp til æfinga dagana 19.-20. ágúst. Einn leikmaður úr Lengjudeildarliði Stólastúlkna er í hópnum en það er Hrafney Lea Árnadóttir en hún hefur leikið flesta leiki Tindastóls í sumar auk þess að spila með 3. flokki.

Öll meistaraflokksliðin í knattspyrnu hér á Norðurlandi vestra sprettu úr spori í gær, laugardaginn 15. ágúst, en aðeins höfðust þrjú stig upp úr krafsinu. Stólarnir komust á sigurbraut á ný í 3. deildinni en lið Kormáks/Hvatar í 2. deildinni og Stólastúlkur í Lengjudeildinni máttu þola skelli.

Á morgun, laugardaginn 15. ágúst, fer 17. umferðin fram í 2. og 3. deild karla þar sem Kormákur/Hvöt spilar útileik gegn Magna úr Grenivík og lið Tindastóls tekur á móti KV. Þá fer 14. umferðin í Lengjudeild kvenna einnig af stað og fara Stólastelpur á Seltjarnarnesið til að heimsækja Gróttu.