Íþróttir

Tindastólsmenn gerðu sér lítið fyrir og lögðu lið BC Jonava í Litháen í dag þegar Stólarnir spiluðu annan leik sinn í ENBL-deildinni þetta tímabilið. Arnar þjálfari var ánægður með liðið sitt og benti á í samtali við Feyki að þarna hefðu Stólarnir verið að spila við risalið frá einni stærstu körfuboltaþjóð Evrópu. „Það er mjög stórt fyrir íslenskt lið að koma og vinna lið í efstu deild í Litháen,“ sagði Arnar og jaðraði við að hann væri pínu montinn. Leikurinn var lengstum jafn en okkar menn voru sterkari á endasprettinum og unnu leikinn 71-77.

Evrópurúntur Tindastóls heldur áfram en í dag kl. 13:45 hefst annar leikur okkar manna í ENBL-deildinni. Andstæðingarnir í dag eru lið BC Jonava frá Litháen. Hægt er að finna hlekk á leikinn þegar fréttin er skoðuð nánar en beint streymi er á Tindastóll TV.

Feykir hafði samband við Israel Martin þjálfara í morgun og sagði hann sínar stelpur hafa spilað vel í 33 mínútur og náð mest 15 stiga forystu. „Margt gekk vel á vellinum þar til nokkrir af lykilmönnum okkar lentu í villuvandræðum. Við þurftum að spila lengi með unga leikmenn inn á, sem gerði það erfitt að klára leikinn vel. Við munum standa okkur betur þegar allur hópurinn er klár í slaginn.“

Arnar Ólafsson skrifaði sig í sögubækur Tindastóls þegar hann skoraði sitt 70. mark fyrir meistaraflokk karla gegn Víði í lokaleik sumarsins og sló þar með markamet félagsins. Gamla metið átti á Guðbrandur Guðbrandsson, 69 mörk.

Tindastólsmenn fóru vel af stað í ENBL-deildinni í gærkvöldi þegar þeir unnu sannfærandi sigur á fyrrum félögum Davis Geks í Liepaja í Lettlandi. Stólarnir áttu góðan annan leikhluta og bjuggu þá til gott forskot sem heimamönnum gekk illa að vinna á. Staðan í hálfleik var 37-50 en lokatölur voru 69-92.

„Við erum í Liepaja i Lettlandi. Veðrið er bara voða fint; sól, smá vindur og hiti eitthvað um 15 gráður,“ sagði Pétur Rúnar Birgisson fyrirliði Tindastóls þegar Feykir spurði hann hvar Stólarnir væru staddir í heiminum nú í morgun og hvernig veðrið væri. Stólarnir hefja leik í ENBL-deildinni kl. 16:00 í dag og verður hægt að fylgjast með leiknum í beinu streymi á TindastóllTV.

Þá er knattspyrnuvertíðinni lokið þetta sumarið og knattspyrnumenn sleikja nú sárin og setja sér ný markmið fyrir næsta ár. Lokahóf knattspyrnudeildar Tindastóls fór fram fyrr í september og þar voru þeim veitt verðlaun sem þóttu skara fram úr. Í kvennaliðinu var Sigríður Hrafnhildur (Lilla) Stefánsdóttir valin besti leikmaðurinn en Matheus Gotler var valinn bestur í karlaliðinu.

Knattspyrnukappinn Rúnar Már Sigurjónsson frá Sauðárkróki hefur tekið þá ákvörðun að leggja fótboltaskóna á hilluna eftir langan og farsælan feril. Hann hóf meistaraflokks ferilinn með liði Tindastóls vorið 2005, þá aðeins 14 ára gamall, og gerði sitt fyrsta mark fyrir Stólana 24. júní sama ár, þá 15 ára og sex daga gamall. Síðan hefur hann víða farið og meðal annars var hann í leikmannahópi Íslands sem bar sigurorð af liði Englands á EM í Frakklandi sællar minningar.

Golfklúbburinn Ós í Húnabyggð vígði formlega nýtt glæsilegt listaverk á velli félagsins um helgina. Í Húnahorninu segir að við sama tækifæri fór jafnframt fram lokamót sumarsins, þ.e. sameiginlegt mót klúbbanna á Blönduósi og Skagaströnd. Það mót er árlegt mót sem spilað er á báðum völlum klúbbanna.

Karfan.i segir frá því að Tindastóll innbyrti sinn annan sigur á Gastec æfingamótinu í Varðarhöllinni á Egilsstöðum í dag þegar liðið hafði betur gegn Sindra, 93–79, í öðrum leik mótsins í dag. Áður höfðu Stólarnir lagt lið Hattar sl. fimmudagskvöld, 65-69, og eru því sigurvegarar mótsins.