Skagafjörður

„Við ætlum að hafa þetta óhefðbundið þar sem forréttir eru ekki mikið á borðum hjá okkur. Hins vegar bjóðum við aukalega uppá tvær sáraeinfaldar brauðuppskriftir og þar sem yngri sonurinn er með mjólkur- og sojaofnæmi er tekið tillit til þess í uppskriftunum en auðvitað má setja venjulega kúamjólk í staðinn. Eins má skipta öllu mjöli út fyrir glúteinfrítt mjöl í sömu hlutföllum,“ sögðu Dagný Rósa Úlfarsdóttir og Björn Björnsson á Ytra-Hóli 1 í Skagabyggð í 23. tbl. Feykis árið 2016. Dagný starfar sem kennari við Höfðaskóla á Skagaströnd og Björn er sauðfjárbóndi og kjötmatsmaður hjá SAH á Blönduósi.

Stólastúlkur gerðu góða ferð á Húsavík í gær er þær áttust við Völsung í 2. deild kvenna í fótbolta. Eftir að hafa verið 1-0 undir í hálfleik sýndu þær hvert stefnan er tekin og eftir mikla baráttu skoruðu þær tvö mörk og tóku stigin þrjú með sér á Krókinn.

Ferðaþjónustan að Sólgörðum í Fljótum opnar í dag 1. júní en þar er ýmislegt í boði s.s. eins og gisting, handverk, sundlaug, leikvölur, grill- og nestisaðstaða og svo Kaffihús Guðrúnar frá Lundi.

Heildarmat fasteigna á Íslandi hækkar um 12,8% frá yfirstandandi ári og verður 8.364 milljarðar króna, samkvæmt nýju fasteignamati fyrir árið 2019 sem Þjóðskrá Íslands birti í dag. Fasteignamatið hækkar á 99,2% eigna en lækkar á 0,8% eigna frá fyrra ári. Fasteignamatið byggir á upplýsingum úr þinglýstum kaupsamningum auk fjölmargra annarra þátta sem hafa áhrif á verðmæti fasteigna. Nýja fasteignamatið miðast við verðlag fasteigna í febrúar 2018. Það tekur gildi 31. desember 2018 og gildir fyrir árið 2019. Frestur til að gera athugasemdir við nýtt fasteignamat er til 30. desember 2018.

Sex mánaða tilraunaverkefni með áætlunarflug á Sauðárkrók hefur runnið sitt skeið en Flugfélagið Ernir, sem hefur sinnt þessari þjónustu, hefur gefið upp að ekki verði framhald á a.m.k. í bili.

Töframaðurinn geðþekki, Einari Mikael, heimsækir Krókinn í dag og verður með töfrasýningu í FNV í kvöld. „Þetta er ný sýning með nýjum atriðum sem ég hef verið að vinna í og er mjög spenntur að heimsækja Krókinn,“ segir hann svo það má búast við glæsilegri sýningu.

Sveitarfélagið Skagafjörður boðar til opins íbúafundar í Húsi frítímans á Sauðárkróki á sunnudaginn kemur, 3. júní, klukkan 16:00. Á fundinum verður farið yfir stöðu verkefnisins Verndarsvæði í byggð á Sauðárkróki og í framhaldi af því óskað eftir hugmyndum, umræðu og ábendingum. Eru íbúar og aðrir áhugasamir hvattir til að mæta á fundinn og leggja sitt af mörkum til að móta verkefnið svo svæðið megi þróast í sátt við íbúa og umhverfi.

Í gær 29. maí voru liðin 70 ár frá stofnun Byggðasafns Skagfirðinga árið 1948 en fastasýning var opnuð í Glaumbæ þann 15. júní fjórum árum seinna, 1952. Safnið er eign Akrahrepps og Sveitarfélagsins Skagafjarðar og segir í stofnskrá að hlutverk þess sé að safna, varðveita og rannsaka muni og minjar úr Skagafjarðarhéraði og miðla þeim til almennings.

Grunnskólanum austan Vatna var slitið nú í vikunni þann 28. maí og var fyrsta athöfnin í skólanum á Sólgörðum sem jafnframt voru þau síðustu þar í sveit þar sem nemendum verður héðan í frá keyrt í skólann á Hofsósi. Jóhann Bjarnason skólastjóri og Sjöfn Guðmundsdóttir deildarstjóri fluttu ávörp og Herdís Á Sæmundardóttir sviðsstjóri fjölskyldusviðs sveitarfélagsins afhenti nemendum miðstigs bókina Skín við sólu Skagafjörður.

Sjóvá Kvennahlaup ÍSÍ verður haldið í 29. skipti næsta laugardag, 2. júní, en það var þann 30. júní árið 1990 sem fyrsta hlaupið var haldið. Búist er við góðri þátttöku að vanda en á síðasta ári voru um 12 þúsund hlauparar með á 91 hlaupastað á landinu. Samkvæmt upplýsingum á heimasíðu hlaupsins verður hlaupið á átta stöðum á Norðurlandi vestra en vert er að geta þess að á Hofsósi og Borðeyri verður hlaupið á sunnudag og í Fljótum viku síðar, þann 10. júní. Hægt er að nálgast upplýsingar um vegalengdir og skráningu á heimasíðu hlaupsins.