Skagafjörður

Tindastóll og Valur áttust við í 16 liða úrslitum Maltbikarsins í kvöld og var leikið á Hlíðarenda. Stólarnir léku vel í kvöld og náðu strax ágætri forystu. Valsmenn reyndu að klóra sig inn í leikinn fyrir hlé en Stólarnir gáfu ekkert eftir og síðan var bara sýning í síðari hálfleik. Sigtryggur Arnar og Hester voru frábærir í leiknum með alls 66 stig en lokatölur voru 70-104.

Brunavarnir Skagafjarðar hafa auglýst eftir varaslökkviliðsstjóra en starfið er laust frá og með 1. desember 2017. Varaslökkviliðsstjóri er staðgengill slökkviliðsstjóra og ber hann ábyrgð á faglegri starfsemi Brunavarna Skagafjarðar í samvinnu við yfirmann sinn. Svavar Atli Birgisson hefur verið ráðinn slökkviliðsstjóri frá og með 1. desember og tekur við af Vernharð Guðnasyni sem verið hefur í árs leyfi.

Nýlega héldu Alzheimersamtökin opinn fræðslufund á Sauðárkróki. Sirrý Sif Sigurlaugardóttir er fræðslu- og verkefnastjóri hjá samtökunum en þess má geta að móðir hennar er Sigurlaug Jónsdóttir frá Flugumýri. Hún segir aðsókn á fundinn hafa verið mjög góða en það voru fulltrúar samtakanna hér á svæðinu, þær María Ásgrímsdóttir, félagsliði, og Helga Sigurbjörnsdóttir, aðstandandi einstaklings með heilabilun, sem sáu um undirbúning og skipulag fundarins.

Þá er komið að undanúrslitum hjá Karlakór Bólstaðarhlíðarhrepps í þætti Stöðvar 2, Kórar Íslands en hann verður í beinni útsendingu í kvöld klukkan 19:10. Þarna munu örlög þeirra kóra, sem komist hafa áfram í keppninni, ráðast en með þinni hjálp gæti það gerst.

Í gær, föstudaginn 3. nóvember, var hátíðleg stund í Iðju hæfingu á Sauðárkróki þegar Lionsklúbbarnir fjórir í Skagafirði færðu Iðju að gjöf skynörvunarherbergi það sem þeir hafa safnað fyrir undanfarna mánuði. Það var Magnús Svavarsson, fráfarandi formaður Lionsklúbbs Sauðárkróks, sem afhenti Ástu Pálmadóttur, sveitarstjóra, gjafabréf fyrir herberginu ásamt árituðum skildi sem komið var fyrir við dyr herbergisins. Að því loknu klipptu Bragi Haraldsson og Ásgrímur Sigurbjörnsson á borða við dyr herbergisins. Lionsklúbbarnir buðu viðstöddum upp á veitingar og öllum viðstöddum gafst kostur á að skoða herbergið og jafnvel að prófa að leggja sig í rúminu sem er sérútbúið til að örva skynfæri eða veita þeim slökun sem þar leggjast.

Knattspyrnudeild Tindastóls vinnur nú að því að breyta allri umgjörð yngriflokkastarfs félagsins og hafa þrír þjálfarar verið ráðnir í fullt starf til að sjá um verkefnið. Markmið deildarinnar er að bæta allt barna- og unglingastarf félagsins félaginu til heilla. Bergmann Guðmundsson, formaður deildarinnar, segir að klúbburinn verði að vera sýnilegri og gera þurfi vörumerkið „fótbolti á Króknum“ betra en það hefur verið í augum fólks hingað til.

Vegna dræmrar aðsóknar á aukasýningar á Hróa hetti, sem farið hefur hamförum á sviði Bifrastar undanfarnar vikur, hefur stjórn Leikfélags Sauðárkróks ákveðið að fella sýningar niður í dag og á morgun. Sunnudagssýningin verður þar með allra síðasta sýningin um þennan fræga útlaga í Skírisskógi.

Í kvöld ættu Skagfirðingar að sitja límdir við sjónvarpsskái sína þegar lið Skagafjarðar mætir liði Vestmannaeyja í Útsvari á RÚV. Óskað var eftir ábendingum um fulltrúa í lið Skagafjarðar á Facebook síðu sveitarfélagsins í lok sumars og samkvæmt frétt á Skagafjörður.is barst fjöldi ábendinga og var því úr vöndu að ráða varðandi valið. Það eru þau Björg Baldursdóttir, Heiðdís Lilja Magnúsdóttir og Ingólfur Valsson sem skipa lið Skagafjarðar í ár.

Það var ekki laust við að sjónin sem við blasti þegar litið var út í morgun hafi verið nokkuð ókunnugleg enda hvítt orðið yfir öllu í fyrsta skipti á þessu hausti. Á vef Vegagerðarinnar má sjá að hálkublettir, hálka eða snjóþekja er nú á öllum vegum á Norðurlandi og því er vissara fyrir þá sem þurfa að leggja land undir fót að hafa varann á.

Sjónvarpsstöðin N4 vinnur nú að gerð átta þátta um atvinnulífið í Skagafirði, Atvinnupúlsinn í Skagafirði og hafa fallið í góðan jarðveg hjá áhorfendum. Umsjónarmenn Atvinnupúlsins í Skagafirði eru þau María Björk Ingvadóttir og Karl Eskil Pálsson. Í þáttunum er rætt við fólk sem þekkir vel til í atvinnulífinu, auk þess sem fyrirtæki og stofnanir verða heimsótt