Skagafjörður

Martröð með myglusvepp er nýútkomin bók eftir Stein Kárason um orsakir og afleiðingar af völdum myglusveppa. Af tilefni útgáfunnar verður bókarkynning og fræðsla í Norræna húsinu laugardaginn 10. júní klukkar 13:30. Allir eru velkomnir og aðgangur er ókeypis.

Á Lýtingsstöðum í Skagafirði var nýlega sett upp hljóðleiðsögn um torfhúsin sem þar eru staðsett en þar er fólk frætt um Lýtingsstaði, torfhúsin á Lýtingsstöðum, íslenska hestinn og hlutina sem tengjast hestinum og landbúnaði og eru til sýnis í torfhúsunum. Um er að ræða skemmtilega blöndu af fróðleik og tónlist og tekur um það bil hálftíma.

Uppruni Súkkulaðiísdagsins er óþekkt en talið er að Ítalir hafi fyrstir byrjað á því að frysta heitt súkkulaði árið 1692. Vanilluís er reyndar talinn vera vinsælasta bragðtegundin en eftir að súkkulaðiís kom á markaðinn þá hefur hann verið sú bragðtegund sem er hvað mest nálægt því að steypa vanilluísnum af pallinum.

Leikfélag Sauðárkróks heldur aðalfund sinn í kvöld 7. júní klukkan 20:00 í Bifröst gengið inn að norðan. Auk venjulegra aðalfundarstarfa verður m.a. sagt frá hugmynd að breyttu æfingatímabili sem og að fyrir liggur að taka stórar ákvarðanir í sambandi við húsnæðismál.

Í gær var sett af stað undirskriftarsöfnun til að mótmæla fyrirvaralausri brottvikningu Kristjáns Þorbjörnssonar yfirlögregluþjóns á Blönduósi úr starfi. Skorað er á Sigríði Á. Andersen, dómsmálaráðherra, að afturkalla „þessa aðför óreynds lögreglustjóra að lögreglumanni og að ríkið standi að fullu við fyrirheit fyrrverandi ráðherra dómsmála,“ eins og segir á vef undirskriftarsöfnunarinnar.

Það er ekki á hverjum degi sem sett eru heimsmet í kynbótadómi en það gerðu þeir Þórálfur frá Prestsbæ og Þórarinn Eymundsson á Sauðárkróki á sýningu á Akureyri fyrir helgi. Fyrra met átti Spuni frá Vesturkoti, úr ræktun Finns Ingólfssonar, með aðaleinkunnina 8.92 en Þórálfur skreið yfir hann nú með aðaleinkunn upp á 8.94. Fyrir sköpulag hlaut hann 8.93 og 8.95 fyrir hæfileika.

Á opnum fundi áhugafólks um ásýnd Skagafjarðar, sem haldinn var í Varmahlíð sl. laugardag, kom skýrt fram að landeigendur í Skagafirði munu ekki samþykkja lagningu loftlína um lönd sín. Í tilkynningu frá skipuleggjendum kemur fram að á fundinum hafi komið fram að sveitarfélagið Skagafjörður vinni nú að breytingu á aðalskipulagi Skagafjarðar þar sem til stendur að setja stóriðjuloftlínur inn á skipulag, þrátt fyrir að Landsnet hafi nú tekið Blöndulínu 3 út af framkvæmdaáætlun og ætli að vinna umhverfismat fyrir línuna upp á nýtt.

Um helgina fór fram félagsmót og úrtaka hestamannfélagsins Skagfirðings á Sauðárkróki. Á heimasíðu félagsins segir að sterkir hestar hafi keppt í öllum flokkum og fóru leikar svo að A-flokkinn sigraði Trymbill frá Stóra-Ási og Mette Mannseth með einkunnina 8,91. Í B-flokki var það Oddi frá Hafsteinsstöðum með knapa sínum Skapta Steinbjörnssyni sem sigraði með 8,90.

Körfuknattleiksmaðurinn Pálmi Geir Jónsson hefur yfirgefið herbúðir Tindastóls og er gengin til liðs við Þór á Akureyri og mun leika með liðinu í Domino´sdeildinni á komandi leiktíð. Pálmi Geir er framherji og segir á heimasíðu Þórs að hann komi til með að styrkja hópinn hjá Þór verulega enda mikils vænst af honum.

María Dögg Jóhannesdóttir, leikmaður 3. flokks kvenna í Tindastól hefur verið valin í úrtakshóp 16 ára landsliðs Íslands. Jörundur Áki þjálfari liðsins valdi 29 leikmenn sem munu æfa í Reykjavík 16. og 17. júní. Í kjölfarið verður síðan valinn hópur til þess að spila á Norðurlandamóti u-16 kvenna í Finnlandi 29. júní - 7. júlí.