Skagafjörður

Á fundi samstarfsnefndar Sveitarfélagsins Skagafjarðar og Akrahrepps sem haldinn var þann 20. júní sl. kom fram að samstarfssamningur sveitarfélaganna hefur ekki verið tekinn til endurskoðunar frá árinu 1999 þegar hann var gerður.

Fólksfjöldi stendur í stað á Norðurlandi vestra síðustu tvö árin en sé litið til 15 síðustu ára kemur í ljós að fækkað hefur um 0,7% og er það eini landshlutinn fyrir utan Vestfirði þar sem fóki hefur ekki fjölgað undanfarin ár. Þetta kemur fram í nýrri skýrslu Íslandsbanka um íslensk sveitarfélög 2017.

Fiskeldis- og fiskalíffræðideild Háskólans á Hólum hlaut nýlega átta milljóna króna styrk úr Innviðasjóði Rannís til uppsetningar á Miðstöð fyrir mælingar á efnaskiptahraða í fiskum. Verður styrknum varið til kaupa á tækjum og uppbyggingar á aðstöðu til mælinga á efnaskiptahraða fiska.

Samtök um uppbyggingu á Hofsósi og nágrenni er nefnast Byggjum upp Hofsós og nágrenni hafa leitað leiða undanfarin misseri, til að gera gott samfélag betra. Á vinnufundum hefur komið fram skortur á afþreyingu fyrir börn og ungmenni á svæðinu.

Tónlistarhátíðin Drangey Music Festival verður haldin laugardaginn 24. júní nk. á Reykjum á Reykjaströnd. Svæðið opnar kl. 18:00 og hefjast tónleikarnir kl 20:30. Þetta er í þriðja sinn sem hátiðin er haldin og á Facebooksíðu hennar segir að líkt og fyrri ár verði áherslan á frábæra tónlist og fallega stemningu í glæsilegri náttúru þar sem Drangey blasir við frá Reykjum á Reykjaströnd.

Nú standa fyrir dyrum hinir árlegu Lummudagar í Skagafirði en þeir verða settir á næsta fimmtudag, þann 22. júní. Að vanda verður mikið um að vera, jafnt fyrir unga sem aldna.

Barna- og unglingamót Golfklúbbs Sauðárkróks, Nýprent Open, verður haldið sunnudaginn 25. júní nk. og er það fyrsta mót sumarsins í Norðurlandsmótaröðinni.

Jónsmessuhátíðin á Hofsósi var haldin í 15. sinn nú um helgina í stilltu og hlýju en misþurru veðri. Að sögn aðstandenda hátíðarinnar fór hún í alla staði vel fram. Margt var sér til gamans gert og sýna meðfylgjandi myndir brot af því besta.

Landsbankamót Tindastóls fer fram á Sauðárkróki dagana 24. og 25. júní næstkomandi og stefnir allt í að mótið verði hið fjölmennasta hingað til. Á mótinu keppa stelpur í 6.flokki og fjölgar keppnisliðum ár frá ári. Nú eru rúmlega 100 lið skráð til leiks frá um 20 félögum. Liðin mæta á staðinn á föstudagskvöld en keppni hefst á laugardagsmorgun og lýkur á sunnudag með úrslitaleikjum og afhendingu verðlauna. Á laugardagskvöld verður haldin kvöldvaka þar sem Salka Sól kemur og skemmtir áhorfendum.

Miðvikudaginn 21. júní kl. 16.00 verður málstofa- bókarkynning í Verinu á Sauðárkróki þar sem kynnt verður bókin Fiskveiðar – fjölbreyttar áskoranir eftir færeyska sjávarútvegsráðgjafann Óla Samró sem nú hefur verið gefin út á íslensku í þýðingu Hjartar Gíslasonar blaðamanns. Bókin var gefin út í Færeyjum í fyrra og vakti mikla athygli enda hefur ekki fyrr verið skrifað á þennan hátt um fiskveiðistjórnun um víða veröld og borin saman mismunandi stjórnkerfi fiskveiða.