Skagafjörður

Uppskeruhátíð Hrossaræktunarsambands Skagafjarðar og Hestamannafélagsins Skagfirðings verður haldin í Ljósheimum föstudaginn 11.nóvember klukkan 20:30. Þorvaldur Kristjánsson, hrossaræktunarráðunautur, mun kynna verðlaunahrossin. Gísli Einarsson, fréttamaður, mun fara með gamanmál eins og honum er einum lagið.

Jónína Stefánsdóttir er bóndi á Stóru-Gröf ytri I í fyrrum Staðarhreppi og hefur rekið þar sauðfjárbú frá haustinu 1982, ásamt eiginmanni sínum, Jóni Gunnlaugssyni. Þau sjá nú á eftir tæplega fjögurhundruð fjár og nærri 35 ára ræktunarstarfi, eftir að upp kom riðuveiki á bænum. Feykir heimsótti Jónínu skömmu eftir að búið var að skera niður allt fé á bænum og spjallaði við hana um búskapinn, áhugamálin og áfallið sem fylgir því að fá riðuveiki í fjárstofninn.

Það var líf og fjör hjá yngri nemendum grunnskólanna í Skagafirði í gær þegar útdráttur úr ævintýraóperunni Baldursbrá var sýnd. Var verkið meðal annars sýnt í Grunnskólanum austan Vatna og þar var meðfylgjandi mynd tekin.

Sigurlína Erla Magnúsdóttir hefur hafið störf hjá Ráðgjafamiðstöð landbúnaðarins en hún mun starfa sem almennur ráðunautur með aðsetur á Sauðárkróki.

Dregið var í 16 liða úrslitum Maltbikarsins í körfubolta í gær. Níu lið úr Dominos-deildinni voru í skálinni auk fjögurra liða úr 1. deildinni og þriggja úr 2. og 3. deild. Lið Tindastóls, sem bar sigurorð af liði KR b um helgina, fékk hörkuleik en strákarnir mæta liði Þórs Akureyri.

Um síðustu helgi héldu kórarnir, Hreimur úr Þingeyjasýslu og hinn skagfirski Heimir, tónleika í Miðgarði undir yfirskriftinni Stálin stinn. Vel var mætt og mikil stemning í húsinu.

Á þriðjudaginn í næstu viku er konum sem hafa áhuga á að koma hugmyndum sínum á framfæri, hafa viðskiptahugmynd sem þær vilja hrinda í framkvæmd eða hafa nýlega stofnað fyrirtæki boðið á fund í Verknámshúsi FNV á Sauðárkróki klukkan 19:30.

Karlakór Reykjavíkur verður á faraldsfæti næstkomandi laugardag en þá heimsækir hann Skagafjörð og Siglufjörð og heldur tónleika á báðum stöðum. Fyrri tónleikarnir verða í Miðgarði í Skagafirði og hefjast þeir klukkan 14.00. Að þeim loknum verður ekið til Siglufjarðar þar sem kórinn mun syngja í kirkjunni kl. 20. Með í för eru sópransöngkonan Sigrún Hjálmtýsdóttir, Diddú, auk tónlistarhjónanna Önnu Guðnýjar Guðmundsdóttur píanóleikara og Sigurðar Ingva Snorrasonar klarínettuleikara. Þá mun kórfélaginn og Skagfirðingurinn Árni Geir Sigurbjörnsson tenór syngja einsöng á tónleikunum. Stjórnandi Karlakórs Reykjavíkur er Friðrik S. Kristinsson.

Blakfélagið Krækjur á Sauðárkróki skráðu sig á Íslandsmótið í blaki nú í ár og spila þar í 5. deild. Um helgina var fyrsta törnering haldin í Kórnum í Kópavogi og unnu Krækjurnar alla sína fimm leiki 2-0 og eru þar með efstar í deildinni.

Í nokkurn tíma hefur hópur fólks unnið í verkefninu Danslagakeppnin á Króknum í 60 ár þar sem leitað er að gömlum danslagaperlum úr keppninni og undirbúnar fyrir tónlistarveislu sem haldin verður í Sæluviku Skagfirðinga að vori.