Skagafjörður

Töltkeppni KS-Deildarinnar hefur verið flýtt til þriðjudagsins 21. mars og hefst kl 19:00. Ráslisti verður birtur á mánudaginn. - Stjórn Meistaradeildar Norðurlands.

Í dag afhenti Minningarsjóður frú Sigurlaugar Gunnarsdóttur, með formlegum hætti, Heilbrigðisstofnun Norðurlands á Sauðárkróki, þrjú hjúkrunarrúm ásamt fylgihlutum. Rúmin eru þegar komin í notkun og segir Herdís Klausen yfirhjúkrunarfræðingur, þau koma stofnuninni afar vel þar sem þau leysa af hólmi eldri rúm sem komin voru á tíma. Það voru þau Örn Ragnarsson, framkvæmdastjóri lækninga, Engilráð M. Sigurðardóttir og Elín H. Sæmundardóttur sem afhentu gjafabréfið en þau skipa jafnframt stjórn sjóðsins.

Á ársþingi UMSS sem haldið var í Ljósheimum í Skagafirði gær var Arnrún Halla Arnórsdóttir kjörin nýr formaður sambandsins. Tekur hún við af Þórhildi Sylvíu Magnúsdóttur. Á þinginu veitti Viðar Sigurjónsson, starfsmaður ÍSÍ, knattspyrnudeild Tindastóls viðurkenningu fyrir Fyrirmyndarfélag ÍSÍ en knattspyrnudeildin hlaut hana fyrst árið 2012. Núna var viðurkenningin endurnýjuð og staðfest áfram.

Atvinnu- og nýsköpunarsjóður Norðurlands vestra hefur tilkynnt um að umsóknar- og úthlutunarferli vegna styrkveitinga úr sjóðnum sé að hefjast og er kastljósinu beint að atvinnuþróun og nýsköpun.

Nú hefur María Finnbogadóttir skíðakona úr Tindastóli lokið keppni á HM unglinga í Aare í Svíþjóð en þangað fór hún ásamt nokkrum öðrum unglingum og keppti í Alpagreinum fyrir Íslands hönd. Keppendur voru frá 47 löndum. Þátttakendur voru fæddir á árunum 1996-2000 og þar sem María er fædd árið 2000 var hún á yngsta keppnisárinu. Hún stóð sig með sóma og varð í 56. sæti í stórsvigi og 35. sæti í svigi.

Lið FNV gerði sér lítið fyrir og vann stigakeppnina á Framhaldsskólamótinu í hestaíþróttum sem fram fór sl. laugardag í Samskipahöllin Kópavogi. Liðið var skipað þeim Sigríði Vöku Víkingsdóttur, Guðmari Frey Magnússyni, Ásdísi Ósk Elvarsdóttur, Viktoríu Eik Elvarsdóttur og Unni Rún Sigurpálsdóttur. Með þeim á myndinni er Arndís Brynjólfsdóttir kennari þeirra.

Mikael Snær Gíslason, nemandi við Fjölbrautaskóla Norðurlands vestra, tryggði sér sæti í Ólympíuliði Íslands í líffræði, en Ólympíukeppnin fer fram í Englandi í sumar. Hann hafnaði í 3. sæti í úrslitakeppninni sem fram fór um liðna helgi.

Í dag var undirritaður samstarfssamningur milli Fjölbrautaskóla Norðurlands vestra og knattspyrnudeildar Tindastóls um rekstur knattspyrnuakademíu sem hefst í haust. Með fjölbreyttum og skipulögðum æfingum og bóklegum kennslustundum verður markvisst unnið að því að gera nemendum kleift að bæta sig bæði andlega og líkamlega.

Tveir Skagfirðingar hafa stofnað sprotafyrirtæki í rafrænni reikningagerð þar sem nýjungar á borð við hraðgreiðslur, kröfur í netbanka, tenging við bókhaldskerfi og sala á netinu eru alls ráðandi. Það eru þeir Guðmundur Kári Kárason og Þorsteinn Hjálmar Gestsson sem standa á bakvið vefsíðuna konto.is, sem hér um ræðir. Meðeigandi að fyrirtækinu er Kristján Gunnarsson einn stofnenda vefstofunnar Kosmos & Kaos.

Óhætt er að segja að vegfarendur á Norðurlandi vestra hafi sprett úr spori um helgina en á Facebooksíðu lögreglunnar segir að þeir hafi hagað sér líkt og beljur að vori. Þannig höfðu 30 ökumenn verið stöðvaðir fyrir of hraðan akstur seinni part föstudags og í gær hafði á þriðja tug ökumanna fengið að líta stöðvunarljósin.