Skagafjörður

Lið Tindastóls hefur dúllað í fallbaráttu 3. deildar í allt sumar, byrjaði mótið illa og þrátt fyrir að hafa á köflum sýnt ágæta leiki þá hefur liðið lekið mörkum á ögurstundu og tapað í leiðinni alltof mörgum stigum. Í gær héldu strákarnir suður í Hafnarfjörð þar sem ÍH tók á móti þeim. Liðin voru með jafnmörg stig fyrir leikinn, voru í tíunda og ellefta sæti deildarinnar, og það mátti því reikna með hörkuleik og hasar. 7-0 í hálfleik fyrir heimamenn var ekki eitthvað sem menn sáu fyrir sér. Lokatölur 8-0 fyrir ÍH og eitt versta tap í sögu Tindastóls döpur staðreynd

Vinna stendur nú yfir hjá Akrahreppi og Sveitarfélaginu Skagafirði að meta kosti, galla og tækifæri sameiningar sveitarfélaganna tveggja en ráðgert er að ákvörðun verði tekin í næsta mánuði um hvort þau hyggist ráðast í formlegar sameiningarviðræður sem lýkur þá með íbúakosningum um tillöguna.

Lesendur Feykis þurfa enn á ný að sýna þolinmæði vegna útgáfu Feykis þessa vikuna þar sem dreifing getur ekki hafist fyrr en á morgun. Ástæðan er sú að blaðið er prentað fyrir sunnan og barst ekki norður yfir heiðar fyrir daginn í dag eins og til stóð.

Þrír leikir fóru fram í Pepsi Max deild kvenna í gær þegar ÍBV tók á móti Keflavík í Eyjum, Stjarnan tók sig upp og ferðaðist úr Garðabænum og inn í Laugardalinn til Þróttar og Stólastúlkur skruppu yfir Tröllaskagann og öttu kappi við stöllur sínar í Þór/KA á Akureyri. Úrslit voru ekki hagstæð fyrir Tindastól þar sem liðið beið lægri hlut fyrir sprækum Eyfirðingum og Keflavík, sem vermdi botnsætið, náði að leggja Eyjastúlkur og náðu að spyrna sér örlítið af botninum þar sem Stólar dúsa nú.

Lögheimilisflutningar þurfa að hafa borist fyrir 21. ágúst nk. til að hafa gildi fyrir Alþingiskosningarnar sem fram fara þann 25. september nk. og mun flutningur á lögheimili á milli sveitarfélaga og innan sveitarfélags, sem eiga sér stað eftir 20. ágúst nk. ekki hafa áhrif á útgefinn kjörskrárstofn.

Nú líður að þingkosningum og kjördagur nálgast. Við kjósendur þurfum að skoða og meta hverja skal kjósa úr þeim fjölda framboða sem í boði eru. Stefnumálin virðast svipuð hjá mörgum flokkanna, þótt ekki sé samhljómur um alla hluti. Ég tilheyri þeim ört stækkandi hópi eldra fólks sem eru ýmist kallaðir eldri borgarar, lífeyrisþegar eða jafnvel bótaþegar. Mér hugnast ekki þessi miðamerking, við erum eldra fólk. Við viljum hafa áhrif á eigið líf og framtíð og teljum okkur hafa margt fram að færa.

Í dag opnaði Vegagerðin tilboð í byggingu nýs vegar á milli Blönduóss og Skagastrandar eða nánar tiltekið Þverárfjallsvegar (73) í Refasveit og Skagastrandarvegar (74) um Laxá. Tilboðin reyndust þrjú; frá Ístaki hf. í Mosfellsbæ, Borgarverki ehf. í Borgarnesi og Skagfirskum verktökum ehf á Sauðárkróki sem voru með lægsta tilboðið sem var um 100 milljónum hærra en áætlaður verktakakostnaður.

Í síðustu viku greindi fréttastofa RÚV frá því að fornleifafræðingar, sem vinna að rannsóknum á Þingeyraklaustri, hafi fundið þar merkilega gröf sem talin er tilheyra Jóni Þorleifssyni, klausturhaldara á Þingeyrum en hann lést árið 1683. Í gröfinni fundust m.a. gullhringur og veglegt höfuðfat.

Íslenski júlímánuðurinn var mjög hlýr og þurr, sérstaklega á Norður- og Austurlandi og var meðalhitinn í þeim landshlutum víða sá hæsti frá upphafi mælinga. Á vef Veðurstofu Íslands kemur fram að sólskinsstundir hafi aldrei mælst eins margar í júlímánuði á Akureyri á meðan þungbúnara hafi verið suðvestanlands. Á Norðurlandi vestra reyndist meðalhiti sjálfvirkra stöðva hæstur á Brúsastöðum í Vatnsdal, næsthæstur á Sauðárkróksflugvelli og Nautabú í fyrrum Lýtingsstaðahreppi er svo í þriðja sæti.

Ríkisstjórn Katrínar Jakobsdóttur hefur fengið í fangið erfið verkefni til úrlausnar í heimsfaraldri. Í erfiðleikum reynir á úthald, þol og þrautseigju. Þá verður mikilvægara en nokkru sinni að taka ákvarðanir af yfirvegun og skynsemi. Við Vinstri græn höfum sýnt það í verki við þessar fordæmalausu aðstæður að við stöndumst álagsprófið og verið lausnamiðuð í ríkisstjórnarsamstarfi ólíkra flokka. Það hefur skilað árangri hvert sem litið er.