Skagafjörður

Kæru lesendur, eftir smásveig sem tekin var og fjallað um reiðbúnað, s.s um reiðskó og stígvél, gæruúlpur, svipur og píska, skal haldið áfram þar sem frá var horfið í 1. tbl. Feykis nú í ár, Íslenska gæðingakeppnin – Landsmótið 1950, og fjallað áfram um sögu íslensku gæðingakeppninnar en sú samantekt hófst með greininni Íslenska gæðingakeppnin í 46. tbl. Feykis 2019.

Aðalfundur Skagfirðingasveitar verður haldinn fimmtudagskvöldið 14. maí klukkan 20:00. Á dagskrá verða hefðbundin aðalfundarstörf þar á meðal kosning stjórnar.

Kristján Þór Júlíusson, sjávarútvegs- og landbúnaðarráðherra, hefur undirritað reglugerð um stöðvun veiða á grásleppu á þessu fiskveiðiári. Ástæðan er að fyrirséð er að veiðarnar muni fljótlega nálgast ráðgjöf Hafrannsóknastofnunar um að heildarafli á þessu fiskveiðiári verði ekki meiri en 4.646 tonn. Frá þessu er greint á vef atvinnuvega- og nýsköpunarráðuneytisins.

Það voru sauðfjárbændurnir á Mýrum 2 við austanverðan Hrútafjörð, þau Ólöf Þorsteinsdóttir og Böðvar Sigvaldi Böðvarsson, sem gáfu lesendum Feykis sýnishorn af því hvað þeim þykir gott að bera á borð í 19. tbl. ársins 2018. „Við bjóðum upp á lambalærissneiðar og snickersbita sem eru góðir með kaffinu. Uppskriftin af snickersbitunum er tekin af vefnum ljúfmeti. com. Þangað höfum við sótt margar uppskriftir sem eru notaðar aftur og aftur,“ sögðu þau Ólöf og Böðvar.

Landsvirkjun hyggst leggja um 12 milljarða króna til ýmissa nýframkvæmda, endurbóta og viðhalds á orkuvinnslusvæðum á næstu þremur árum, veita tímabundna afslætti af raforkuverði til viðskiptavina meðal stórnotenda sem nema um 1,5 milljörðum króna, undirbúa rannsóknar- og þróunarverkefni á Suðurlandi og Norðurlandi í samstarfi við hagaðila í nærsamfélaginu og flýta verkefnum á sviði stafrænnar þróunar. Nýlega var tilkynnt að Landsvirkjun myndi greiða 10 milljarða króna í arð til ríkissjóðs í ár, eða meira en tvöfalt hærri upphæð en á síðasta ári. Vonir standa til að Landsvirkjun muni áfram skila eigendum sínum arði á komandi árum.

Það er óhætt að fullyrða að það vanti ekki snjó í Fljótin þó komið sé að mánaðamótum apríl og maí. Eftir leiðindatíð í vetur, þar sem fáir góðviðrisdagar létu sjá sig og snjó kyngdi niður, þá skall á með logni í síðustu viku. Þó snjórinn hafi minnkað töluvert síðustu vikurnar þá er nokkuð í að tún láti á sér kræla, aðeins nokkrir hólar og hæðir sem stinga ljósbrúnum kolli upp út kaldri hvítunni.

Í ár höldum við hátíðlegan 1. maí alþjóðlegan baráttudag verkafólks í skugga heimsfaraldurs Kórónuveirunnar illræmdu. Launafólk hefur þurft að berjast fyrir réttindum sínum og kjörum í háa herrans tíð en nú glímir það við ósýnilegan óvin, Covid-19 veiruna sem setur allt samfélagið á hliðina og heimsbyggð alla. Nú reynir á samtakamáttinn og samvinnu allra og að tryggja að öryggisnet velferðarkerfisins haldi. Heilbrigðiskerfið okkar hefur svo sannarlega sýnt styrk sinn við þessar ótrúlega erfiðu aðstæður og allt það fólk sem þurft hafa að bregðast við ástandinu með auknu vinnuálagi og mikilli útsjónarsemi, allt þetta fólk á heiður skilinn.

Það var mikil stemning í kringum kvennafótboltann hjá Tindastóli síðastliðið sumar, liðið var í raun hársbreidd frá því að tryggja sér sæti í efstu deild, og stefnan er sett hátt í sumar. Tindastóll hafði fyrir nokkru samið við þrjár bandarískar stúlkur og þrátt fyrir undarlegt ástand í heiminum og vandamál með að ferðast milli landa þá er samkvæmt heimildum Feykis góðar líkur á því að þær Mur, Jackie og Amber komi til landsins nú um helgina.

Í dag er fyrsti maí, einnig kallaður verkalýðsdagurinn, alþjóðlegur baráttudagur verkalýðsins. Á Wikipedia segir að árið 1889 hafi fulltrúar (annarra) alþjóðasamtaka kommúnista hist á ráðstefnu í París, í tilefni af því að hundrað ár voru liðin frá því að Parísarbúar tóku Bastilluna. Þar var ákveðið að gera fyrsta maí að baráttudegi hreyfingarinnar.

Kaupfélag Skagfirðinga er eitt af stærri fyrirtækjum landsins og er með rekstrareiningar víða um land. Hvergi er þó starfsemin jafn viðamikil og í heimahéraðinu Skagafirði en ansi stór hluti Skagfirðinga starfar hjá KS með beinum eða óbeinum hætti og á því mikið undir því að rekstur KS gangi vel. Reksturinn hefur síðustu ár verið með eindæmum jákvæður en á þessum óvissutímum, sem kenndir eru við COVID-19, má ætla að ýmsir hafi engu að síður áhyggjur af lífinu og tilverunni og þar spilar atvinnu- og fjárhagsöryggi stóran þátt.