Skagafjörður

Ungmennasamband Skagafjarðar, UMSS, fagnar 110 ára afmæli í dag en félagið var stofnað þann 17. apríl árið 1910. Stofnendur sambandsins voru þrjú ungmennafélög í Skagafirði, Ungmennafélagið Æskan Staðarhreppi, Ungmennafélagið Framför Lýtingsstaðahreppi og Ungmennafélagið Fram í Seyluhreppi en bráðabirgðastjórn hafði þá setið frá 20. febrúar sama ár. Fyrsta stjórn sambandsins var skipuð þeim Brynleifi Tobíassyni sem var formaður, Árna J. Hafstað, ritara og Jóni Sigurðssyni, gjaldkera.

Lögreglan á Norðurlandi vestra fékk ábendingu um torkennileg spor í nágrenni sveitabæjar norðarlega á Skaga seint sl. laugardagskvöld og vöknuðu grunsemdir þá þegar að hugsanlega væri um ísbjarnarspor að ræða. Lögreglan fór á vettvang á sunnudagsmorgun og voru ummerkin mjög ógreinileg, segir á Facebooksíðu lögreglunnar, og erfitt að meta eftir hvað umrædd för væru.

Þegar vorar og sól hækkar á lofti verður mörgum tamt að grípa til orðtaksins, að nú sé tími til að rækta garðinn sinn og öll þekkjum við óeiginlega merkingu orðtaksins sem bregður fyrir allan ársins hring. Þegar við göngum í gegnum umrótartíma eins og nú, þá er okkur ofarlega í huga að samfélagið komist um síðir öflugt frá þessum hremmingum, bæði hvað varðar mannlífið og ekki síður hvað innviði samfélagsins snertir, atvinnu- og viðskiptalíf.

Smávirkjanasjóður Samtaka sveitarfélaga á Norðurlandi vestra auglýsir eftir umsóknum um styrki úr sjóðnum. Tilgangur sjóðsins er að styrkja fyrstu skrefin í rannsóknum á mögulegum rennslisvirkjunum undir 10 MW að stærð á Norðurlandi vestra.

Almannavarnir hafa fengið ábendingar um aukna hópamyndun unglinga á leiksvæðum að kvöldlagi og segir á heimasíðu Sveitarfélagsins Skagafjarðar að ástæðan sé líklega gott veður og þær jákvæðu fréttir sem hafa verið að berast af þróun mála er varðar afléttingu samkomubanns.

Síðastliðinn laugardag bryddaði KK Restaurant á Króknum upp á þeirri nýbreytni að bjóða upp á heimsendingar í sveitina á mat af seðli. „Já, við prufuðum þetta með dúndur tilboði og það gekk ágætlega og það sem var skemmtilegast var hvað fólk var þakklátt fyrir þessa nýbreytni,“ segir Tómas Árdal hjá KK Restaurant í samtali við Feyki. „Leikurinn verður endurtekinn nú á laugardaginn en þá munum við fara til Hofsóss með viðkomu á Hólum, en allar upplýsingar má finna á Facebook-síðu KK.“

Fyrir tólf árum síðan, dagana 15.–16. apríl 2008, komu góðir gestir í Skagafjörðinn en það voru sjálf forsetahjónin, herra Ólafur Ragnar Grímsson og Dorrit Moussaieff. Þau fóru vítt og breitt um héraðið og er óhætt að fullyrða að þau hafi heillað heimamenn upp úr skónum og þeir eru margir sem minnast heimsóknarinnar með hlýhug.

„Já, okkur er frekar þröngur stakkur skorinn þegar ferðaþjónusta í heiminum liggur að mestu niðri og samkomubann er í gildi. Við erum með lokað til 4.maí en okkur langar að sýna lit og bjóða upp á eitthvað nýtt á matseðli fyrir íbúa hér,“ segir Áskell Heiðar Ásgeirsson í Gránu á Sauðárkróki en Grána Bistro auglýsir núna, fimmtudag til sunnudags, tímabundna opnun í eldhúsi frá kl. 17-21 þar sem boðið er uppá tilraunamatseðil.

Sjávarútvegs- og landbúnaðarráðherra hefur undirritað reglugerð sem flýtir stuðningsgreiðslum við sauðfjárrækt um nokkra mánuði. Er það gert til að bregðast við áhrifum COVID-19 veirunnar á íslenskan landbúnað en aðgerðin mun sérstaklega nýtast þeim stóra hópi sauðfjárbænda sem stundar aðra starfsemi samhliða búskap, t.d. í ferðaþjónustu, og hafa fundið fyrir miklum áhrifum COVID-19 á greinina.

Alþingi samþykkti fyrir skömmu frumvarp félags- og barnamálaráðherra um rétt til greiðslu atvinnuleysisbóta samhliða minnkuðu starfshlutfalli vegna tímabundins samdráttar í starfsemi vinnuveitenda. Lögin fela í sér að laun sem greidd eru samhliða minnkuðu starfshlutfalli koma ekki til skerðingar á atvinnuleysisbótum.