Skagafjörður

Körfuknattleiksdeild Tindastóls hefur gengið frá samningi við bandarískan leikmann fyrir komandi keppnistímabil í Dominos-deildinni. Þar er um að ræða Gerel Simmons sem er 188 sm á hæð og fjölhæfur bakvörður. Hann er fæddur 1993 og því 26 ára gamall en kappinn hefur á sínum ferli komið víða við.„Von er á Simmonsfyrir göngur og mun hann styrkja okkur í barráttunni á næsta tímabili,“ segir í fréttatilkynningu Kkd. Tindastóls.

Á undanförnum árum hefur Nova verið í umsvifamiklum fjárfestingum á farsímakerfum og hefur Norðurland vestra ekki orðið eftirbátar í þeim efnum. Bæjarfélög á Norðurlandi vestra eru víða með sterkt 4G samband en á Sauðárkróki hefur Nova sett upp 4.5G senda sem gefa margföldun á afkastagetu og hraða en áður hefur boðist. 4.5G býður ljósleiðarahraða á farsímaneti.

Lið Tindastóls tók á móti Vestra frá Ísafirði í 2. deildinni í knattspyrnu á vel rökum Sauðárkróksvelli í dag. Ísfirðingar voru fyrir leikinn í öðru sæti deildarinnar en Stólarnir sigurlausir með tvö stig á botninum. Það var ekki að sjá þegar flautað var til leiks og áttu heimamenn í fullu tré við vel skipað lið gestanna og á endanum fór það svo að Tindastólsmenn fögnuðu glaðbeittir fyrsta sigri sínum í sumar. Lokatölur 2-1.

Það heldur áfram stuðið á Stólastúlkum í Inkassodeildinni. Í gærkvöldi kom lið ÍR úr Breiðholti Reykjavíkur í heimsókn á Krókinn en ÍR-stelpurnar höfðu tapað öllum leikjum sínum í deildinni í sumar og því fyrir fram reiknað með sigri Tindastóls. Niðurstaðan var 6-1 sigur og lið Tindastóls hefur nú komið sér huggulega fyrir í þriðja sæti deildarinnar sem sannarlega gleður augað.

Hjónin Ína Björk Ársælsdóttir og Reimar Marteinsson búa á Hvammstanga ásamt þremur börnum. Þau voru matgæðingar Feykis í 26. tbl. ársins 2017. Reimar er kaupfélagsstjóri KVH og Ína Björk starfar við umhverfismál og fleira á framkvæmda-og umhverfissviði Húnaþings vestra. Þau segja að grillið sé mikið notað yfir sumartímann og finnst því tilvalið segja frá einni klassískri grillmáltíð á heimilinu og bæta við rabbarbaraböku sem er án hveitis og sykurs. „Einnig ætlum við að gefa hugmynd að næringardrykk, „boosti", sem er gott að fá sér eftir hlaup eða æfingu. Íslensk bláber, rabbarbari og grænmeti úr garðinum gegna stóru hlutverki í uppskriftunum og er án efa allt saman hollt, hagkvæmt og gott,“ segja matgæðingarnir okkar.

Ég er fæddur á því frábæra ári 1986, þegar Gleðibankinn gerði allt vitlaust og við vorum búin að vinna Eurovision keppnina áður en hún byrjaði, einnig var Stöð 2 og Bylgjan sett á laggirnar. Ég verð 33 næstkomandi 29. október. Þið sem kannist ekki við mig þá er alltaf gott að rýna í ættartöluna en ég er sonur Bigga Rafns, sem er útibústjóri Landsbankans á Sauðárkróki og fyrrverandi kennari við FNV með miklum sóma, móðir mín Hrafnhildur Sæunn Pétursdóttir sjúkraliði. Bróðir minn Pétur Rúnar Birgisson, körfuboltamaður með Tindastól og systir mín Hera Birgisdóttir, læknir.

Jón Stefán Jónsson mun um næstu mánaðarmót hætta störfum sem framkvæmdastjóri knattspyrnudeildar Tindastóls. Jón Stefán, eða Jónsi eins og hann er alltaf kallaður, hefur verið starfandi hjá knattspyrnudeild síðan á haustmánuðum árið 2017 og hefur sinnt 25% starfi sem framkvæmdastjóri hjá deildinni síðan á haustmánuðum 2018.

Í kvöld munu stelpurnar í Tindastól taka á móti botnliði Inkasso-deildar kvenna í fótbolta á Sauðárkróksvelli. Leikurinn er mikilvægur fyrir bæði lið en með sigri geta heimastúlkur komið sér upp að hlið Þróttar, sem sitja nú í öðru sæti deildarinnar, fari svo að hann tapi sínum leik sem einnig fer fram í kvöld. ÍR vantar enn stig til að koma sér af botninum og hingað koma þær til að freista þess svo búast má við spennandi leik á Sauðárkróki í kvöld.

Englendingurinn Jamie McDonough hefur verið ráðinn yfirþjálfari yngri flokka knattspyrnudeildar Tindastóls. Þá mun Jamie einnig hafa yfirumsjón með æfingum 5.-7. flokks karla ásamt íslenskum þjálfurum og vera með Arnari Skúla Atlasyni í þjálfarateymi meistaraflokks karla. Í tilkynningu frá knattspyrnudeild Tindastóls segir að Jamie hafi síðastliðin ár starfað fyrir enska knattspyrnusambandið þar sem hann hefur kennt á þjálfaranámskeiðum. Sjálfur er hann menntaður kennari ásamt því að vera með UEFA A knattspyrnuþjálfaragráðu. Loks er hann með diplómu í þjálfun barna og íþróttasálfræði.

Sjúkratryggingar Íslands og Rauði krossinn á Íslandi hafa náð samkomulagi um framlengingu á samningi um kaup og rekstur sjúkrabifreiða. Heilbrigðisráðherra staðfesti samkomulagið við undirritun þess í dag. Samkvæmt því mun Rauði krossinn áfram annast rekstur sjúkrabíla, viðhald og innkaup gegn árlegu fjárframlagi af hálfu ríkisins. Fyrirliggjandi samningur rann út í lok árs 2015 og hefur endurnýjun sjúkrabílaflotans tafist frá þeim tíma.