Skagafjörður

Í fréttatilkynningu frá Körfuknattleiksdeild Tindastóls, sem send var út í dag, segir að á dögunum hafi tíu leikmenn mfl. kvenna skrifað undir nýjan samning við liðið fyrir komandi tímabil.

Háskólinn á Hólum verður vettvangur 13. ráðstefnunnar um íslenska þjóðfélagið, sem hefst á morgun 16. maí. Alls verða flutt 64 erindi af ýmsum fræðasviðum samfélagsins á þeim tveimur dögum sem hún stendur yfir. Ráðstefnan er á vegum háskólanna og haldin reglulega á mismunandi stöðum á landinu og núna í Háskólanum á Hólum.

Nú ætla Skagfirðingar að huga að umhverfinu af aðeins meiri krafti en alla jafna því boðað hefur verið til Umhverfisdaga Skagafjarðar 2019 sem hefjast í dag en 30 ár eru frá því að þeir voru fyrst haldnir í firðinum. Á heimasíðu Sveitarfélagsins eru íbúar hvattir til að hlúa að umhverfinu og er takmarkið að skapa snyrtilegra og fegurra umhverfi.

Auglýst hefur verið laus staða skólastjóra hjá Tónlistarskóla Austur-Húnavatnssýslu og er stefnt að því að viðkomandi hefji störf frá og með 1. ágúst nk. Skólinn hefur þrjár starfsstöðvar, á Skagaströnd, Blönduósi og Húnavöllum og eru nemendur skólans tæplega 90.

Alþjóðlegi safnadagurinn verður haldinn næstkomandi laugardag, þann 18. maí. Í tilefni hans skipulegja söfn um allan heim dagskrá þennan dag en á síðasta ári voru þátttakendur um 40.000 í 158 löndum, að því er segir á Facebooksíðu Alþjóðlega safnadagsins.

Sigurður Ingi Pálsson, áhugaljósmyndari á Sauðárkróki, var að mynda náttúruna, fugla og fleira á svæðinu í kringum tjörnina sem Sauðá rennur í neðan Sjúkrahúshæðarinnar, nokkra tugi metra frá N1 Ábæ og Kaupfélaginu, þegar hann varð var við mink. Náði hann að mynda varginn sem var ekki minna forvitinn um ljósmyndarann sem beindi að honum myndavélinni.

Búið er að opna fyrir skráningu í Vinnuskóla Skagafjarðar en börn fædd árin 2003-2006, nemendur 7. - 10. bekkjar, geta sótt um. Skráning er á heimasíðu sveitarfélagsins þar sem einnig er hægt að nálgast upplýsingar um reglur vinnuskólans, laun og fleira.

Lögreglan á Norðurlandi vestra fann fíkniefni sl. laugardag í sumarbústað sem ungmenni höfðu tekið á leigu. Húsleit var framkvæmd með aðstoð leitarhunds og fundust fíkniefni en um var að ræða bæði kannabisefni sem og örvandi fíkniefni. Á Facebooksíðu embættisins voru tveir aðilar undir átján ára og var þeim, í samstarfi við barnaverndaryfirvöld í Reykjavík, komið í hendur foreldra sinna.

Þann fyrsta maí var opið hús á Hólavegi 16 á Sauðárkróki, húsinu sem áður hýsti Lyfju en hefur nú staðið autt að hluta til í nokkurn tíma. Tilefnið var að nýlega hófu fimm fyrirtæki starfsemi sína í húsinu sem hlotið hefur nafnið Villan. Hefur það verið tekið rækilega í gegn og gerbreytt frá fyrra horfi og er aðstaðan hin glæsilegasta í alla staði. Þetta eru Klippiskúrinn hársnyrtistofa, Fótaðgerðastofa Stefaníu, Nuddstofan Friðmey, Kírópraktorsstofa Íslands og Dekurlindin snyrtistofa. Það eru þau Eyþór Fannar Sveinsson og Jónína Róbertsdóttir ásamt foreldrum hans, Sveini Árnasyni og Eyrúnu Sigurbjörnsdóttur, sem eiga heiðurinn að endurbótunum á húsinu. Feykir tók þau Jónínu og Eyþór tali og forvitnaðist um framkvæmdirnar.

Margir sakna þess að ekki skuli vera haldnir dansleikir í Sæluviku eins og tíðkaðist hér áður fyrr þegar dansinn dunaði alla vikuna. Að þessu sinni var þó haldið eitt ball, harmóníkuball sem félagsskapurinn Pilsaþytur stóð fyrir og bauð til sín góðum gestum í danshópnum Vefaranum. Hópurinn sýndi þjóðdansa og á eftir var stiginn dans við undirleik Aðalsteins Ísfjörð.