Skagafjörður

Deildarkeppni neðri deilda í blaki lauk sl. sunnudag en leikið var á Flúðum, á Álftanesi og í Kórnum í Kópavogi. Krækjurnar, sem keppa undir merkjum Umf. Hjalta, gerðu sér lítið fyrir og urðu deildarmeistarar í 2. deild eftir sigur í öllum leikjum vetrarins.

Vel hefur gengið hjá Fisk Seafood að draga fisk að landi og vinna í landvinnslu fyrirtækisins á Sauðárkróki en haldin veisla síðastliðinn föstudag af því tilefni. Fagnað var að búið er að vinna úr 6.000 tonnum af hráefni á kvótaárinu eða frá 1. september 2018. Á Facebooksíðu Fisk Seafood kemur fram að Friðbjörn Ásbjörnsson framkvæmdastjóri fyrirtækisins og Þórólfur Gíslason stjórnarformaður fyrirtækisins hafi haldið stuttar tölur og færði Þórólfur svo fulltrúum starfsmannafélagsins þrjár milljónir króna að gjöf frá stjórn fyrirtækisins.

Á dögunum var tilkynnt um úthlutun styrkja úr Húsafriðunarsjóði fyrir árið 2019. Alls bárust 267 umsóknir en 202 verkefnum voru veittir styrkir, alls 301.499.000 kr. en sótt var um tæplega einn milljarð króna. Heildarúthlutun fyrir Norðurland vestra, var 26,5 milljónir. Styrkirnir eru í nokkrum flokkum og skiptist þannig á Norðurlandi vestra í þúsundum króna: Friðlýstar kirkjur 9.500, friðlýst hús og mannvirki 1.200, friðuð hús og mannvirki 12.700, önnur hús og mannvirki 350, rannsóknir 0 og loks verndarsvæði í byggð 2.750.

Helgina 14.-16. mars fór fram Íslandsmót iðn- og verkgreina ásamt framhaldsskólakynningu í Laugardalshöll. Fjöldi nemenda tók þátt en keppnisgreinar voru hátt í þrjátíu. Keppendur tókust á við krefjandi og raunveruleg verkefni sem reyndu á hæfni, skipulagshæfileika og fagmennsku. „Keppnin er liður í því að kynna iðn- og verknám fyrir grunnskólanemum og starfsmöguleikum í spennandi greinum. Gaman var að fylgjast með unga fólkinu sýna rétt handbrögð og tækni í sinni grein ásamt því að takast á við spennuna sem fylgir því að keppa,“ segir í tilkynningu frá FNV.

Karlakórinn Heimir brá sér í söngtúr um helgina og stóð fyrir þrennum tónleikum sunnan heiða. Á föstudagskvöldinu söng kórinn í Langholtskirkju í Reykjavík en daginn eftir skálmaði hann í Skálholtskirkju og hóf upp raust sína og síðar sama dag í Selfosskirkju. Tenórsöngvarinn Elmar Gilbertsson var gestur Heimis á tónleikunum í Langholtskirkju og heillaði tónleikagesti með sinni miklu og fallegu rödd.

Local Food matarhátíðin var haldin á Akureyri sl. laugardag þar sem fjöldinn allur af fyrirtækjum voru með kynningar á sínum vörum. Markaðstorg var á svæðinu, glæsilegt vínsvæði og æsispennandi kokkakeppni eins og sagði í tilkynningu fyrir helgina. Matarkistan Skagafjörður mætti einnig á svæðið með fjölbreytt úrval matvöru og fékk verðlaun fyrir fallegasta básinn 2019.

Vormót Júdósambands Íslands fyrir yngri flokka, frá 11 ára til 20 ára var haldið á Akureyri í gær og kepptu alls 84 keppendur frá tíu júdófélögum. Sex voru skráðir til leiks frá júdódeild Tindastóls en Steinn Gunnar Runólfsson neyddist til að hætta við vegna veikinda og því kepptu fimm fulltrúar deildarinnar á mótinu. Tveir kepptu fyrir hönd Pardusar á Blönduósi.

Árið 2017 hófst samstarfsverkefni Landssamtaka sauðfjárbænda, Landgræðslunnar, Atvinnuvega- og nýsköpunarráðuneytisins og Bændasamtaka Íslands um að vakta og meta ástand gróður- og jarðvegsauðlinda landsins. Verkefnið fékk nafnið GróLind og er markmið þess að gera reglulega heildarmat á ástandi gróður- og jarðvegsauðlinda landsins og þróa sjálfbærnivísa fyrir nýtingu auðlindanna.

Ég tók þeirri áskorun frá henni Heiðu systur að munda pennann, eða í þessu tilfelli, pikka á lyklaborðið. Að vera brottfluttur Skagfirðingur er ákveðinn „status“. Ég bjó í Skagafirðinum í 21 ár; lengst af í Ketu í Hegranesi, þar sem foreldrar mínir búa enn. Ég er elst fjögurra systkina og hjálpaði til við öll helstu sveitastörfin frá því ég fór að geta gert gagn.

Síðasta umferðin í Dominos-deildinni var spiluð í gærkvöldi og í Síkinu mættust lið Tindastóls og Keflavíkur í leik sem talinn var vera baráttan um þriðja sætið í deildinni. Hefðu toppliðin tvö tapað sínum leikjum áttu Stólarnir reyndar möguleika á að verða deildarmeistarar en það var aldrei að fara að gerast. Það áttu því allir von á baráttuleik en Stólarnir komu alveg sjóðheitir til leiks og spiluðu hreint geggjaða vörn gegn ráðvilltum Keflvíkingum sem voru mest 38 stigum undir í leiknum. Lokatölur 89-68 og þriðja sætið því okkar!