A-Húnavatnssýsla

Landsþing Miðflokksin fer fram um aðra helgi í Reykjavík og útlit er fyrir að einhver slagur verði um sæti varaformanns flokksins en væntanlega má slá því föstu að Sigmundur Davíð Gunnlaugsson sé gulltryggður sem formaður flokksins. Í morgun barst yfirlýsing frá Ingibjörgu Davíðsdóttur, oddvita Miðflokksins og fjórða þingmanns Norðvesturkjördæmis þar sem fram kemur að á hana hafi verið skorað og hún hefur í kjölfarið ákveðið að sækjast eftir embættinu.

Feykir hafði samband við nýjan söngvara Slagarasveitarinnar, Kristinn Rúnar Víglundsson, sem sjálfur segist vera lítill sveitastrákur frá Dæli í Víðidal. Sem einmitt býr í Dæli ásamt skagfirskri konu og tveimur börnum. Hjónin reka ferðaþjónustu hálft árið og bílaverkstæði yfir kaldasta veturinn. „Svo er konan í hrossum og er með hrosssarækt á bænum,“ segir Kiddi. Fyrir skagfirska lesendur Feykis, sem blaðamaður veit að eru allir að hugsa hver þessi skagfirska mær sé sem er gift Kidda, þá heitir konan hans Hallfríður Sigurbjörg Óladóttir (Péturs Bolla).

Dagana 3.–5. október verður Landsmót Samfés haldið á Blönduósi. Samkvæmt frétt Húnahornsins má búast við að um 360 ungmenni frá 80 félagsmiðstöðvum leggi leið sína til Blönduóss, auk 80 starfmanna mótsins. Landsmót Samfés, sem haldið er að hausti ár hvert, var haldið í fyrsta sinn á Blönduósi 1990 þar sem 25 aðildarfélagar Samfés komu saman. Þetta er því í 35. sinn sem mótið er haldið og ríkir mikil eftirvænting í bænum og á meðal þátttakenda.

Orka náttúrunnar hefur frá stofnun verið leiðandi í uppbyggingu á hleðsluinnviðum fyrir rafbíla. Undanfarið höfum við beint sjónum okkar sérstaklega að Norðurlandi þar sem mikil uppbygging er hafin og verður haldið áfram næstu misseri.

Í vor var ákveðið að efna til umhverfisverðlauna sveitarfélagsins og voru íbúar hvattir til þess að taka saman höndum við fegrun bæjarins. Það gekk heldur betur framar vonum og skartaði Skagaströnd sínu fegursta í sumar. Meðlimir í Soroptimistaklúbbnum við Húnaflóa sem skipuðu dómnefndina voru á ferðinni í sumar og tóku út herlegheitin, þetta kemur fram á vef Skagastrandar.

Knattspyrnudeild Tindastóls sendi rétt í þessu frá sér tilkynningu þar sem greint er frá því Donni þjálfari muni láta af störfum að þessu tímabili loknu sem þjálfari mfl. kvenna og einnig sem aðstoðarþjálfari. Hann hefur þjálfað kvennalið Tindastóls síðustu fjögur sumur en kvennaboltinn á Króknum er nú að ljúka fjórða sumrinu í efstu deild á síðustu fimm árum – árangur sem engan óraði fyrir nema kannski Stólastúlkur sjálfar. Um helgina varð hins vegar ljóst að liðið er fallið niður í Lengjudeildina á ný.

Feykir greindi fyrr í dag frá þungum áhyggjum stjórnar Samtaka sveitarfélaga á Norðurlandi vestra af neikvæðri og óhagstæðri þróun í bæði íbúafjölda og fjölda ríkisstarfa í landshlutanum. Það megi ljóst vera að staða landshlutans sé grafalvarleg og að þróuninni verði að snúa við. Var framkvæmdastjóra SSNV falið að óska eftir fundi með forsvarmönnum ríkisstjórnarinnar til að ræða stöðu landshlutans. Skagfirðingurinn Einar E. Einarsson er formaður stjórnar SSNV og forseti sveitarstjótnar Skagafjarðar og hann svaraði spurningum Feykis varðandi málið.

Eyjólfur Ármannsson innviðaráðherra hefur samþykkt tillögu ráðgjafanefndar Jöfnunarsjóðs sveitarfélaga um fyrstu áætlanir fyrir árið 2026 um almenn jöfnunarframlög, almenn jöfnunarframlög til reksturs grunnskóla og framlög vegna sérþarfa fatlaðra barna. Í frétt Húnahornsins um málið segir að um sé að ræða fyrstu áætlun samkvæmt nýju úthlutunarlíkani sem tekur við af útgjaldajöfnunarframlagi, tekjujöfnunarframlagi og fasteignaskattsframlagi.

Á fundi stjórnar SSNV í síðustu viku var lögð fram skýrsla útgefin af Byggðastofnun um miðjan síðasta mánuð varðandi þróun í fjölda ríkisstarfa á Íslandi. Skýrsla sem þessi hefur verið gefin út á tveggja ára fresti og sýna niðurstöður hennar stöðuna í lok árs 2024. Það vekur athygli að á meðan ríkisstörfum fjölgaði um 538 á landsvísu á árunum 2023-2024 þá fækkaði þeim á sama tíma um tíu á Norðurlandi vestra.

Byggðasamlagi Félags- og skólaþjónustu A- Hún. hefur verið slitið og Húnabyggð tekið við leiðandi hlutverki í félagsþjónustu fyrir íbúa Húnabyggðar og Skagastrandar. Í frétt á síðu Húnabyggðar segir að í kjölfar samþykkta sveitarstjórna Húnabyggðar og Skagastrandar og staðfestingar félags- og húsnæðismálaráðuneytisins hefur byggðasamlagi Félags- og skólaþjónustu A-Hún. verið formlega slitið. Samhliða því hefur verið undirritaður samningur þar sem Húnabyggð tekur við hlutverki leiðandi sveitarfélags í félagsþjónustu fyrir íbúa beggja sveitarfélaga.