A-Húnavatnssýsla

Mikill meirihluti svarenda í könnun Öldunnar, Samstöðu og Verslunarmannafélags Skagafjarðar var hlynntur því að halda áfram samningaviðræðum félaganna varðandi sameiningu þeirra. Kosningu lauk síðastliðið sunnudagskvöld.

Ráðhús Húnabyggðar var formlega opnað fyrir síðustu helgi að vistöddum fjölda gesta. Fram kemurá heimasíðu Húnabyggðar að viðamikil dagskrá var í ráðhúsinu nýja í tilefni af opnuninni en að henni lokinni bauð sveitarfélagið íbúum í létta grillveislu og fólk gat einnig skoðað ráðhúsið og Skjólið sem er félagsmiðstöð ungmenna Húnabyggðar.

Arnar HU 1 er væntanlegur í land á Sauðárkróki í nótt með 552 tonna afla og löndun er fyrirhuguð í fyrramálið. Samkvæmt frétt á heimasíðu FISK Seafood þá samanstendur aflinn, sem telur rúmlega 19.200 kassa, af um 247 tonnum af gullkarfa, um 130 tonnum af ýsu, um 102 tonnum af þorski og um 69 tonnum af ufsa. Verðmæti aflans eru rúmar 320 milljónir.

ReSource hefur gert samning við Norðurá bs. um umhverfisvöktun urðunarstaðarins í Stekkjarvík. Á vef SSNV segir að Norðurá bs. reki urðunarstaðinn, sem er staðsettur í landi Sölvabakka á Blönduósi. Byggðasamlagið er í eigu þriggja sveitarfélaga á Norðurlandi vestra, en þjónustusvæði urðunarstaðarins nær yfir mestallt Norðurland.

Lið Kormáks/Hvatar heimsótti Vogaídýfuvöllinn í gær, sunnudaginn 31. maí, þar tóku á móti þeim Þróttarar úr Vogum. Leikurinn var jafn í alla staði en hann endaði 1-1.

Leikur að þræði heitir sumar/sérsýning Heimilisiðnaðarsafnsins sem opnuð var á annan dag hvítasunnu. Guðrún Hadda Bjarnadóttir, veflistakona opnaði sýninguna og skýrði vefnaðartæknina á bak við verk sín. Sagðist hún leika sér að því nýta alls konar þræði með mismunandi tækni og aðferðum. Sumum flóknum sem taka langan tíma og öðrum einfaldari og frjálsari. Hún noti gjarnan efni sem unnin eru frá grunni, svo sem ull sem hún sjálf spinnur og litar, hálm eða endurunnin efni.

Á síðu SSNV kom fram að Barnamenningarsjóður hélt úthlutunarhátíð sína í Höfuðstöðinni sunnudaginn 31. maí, þar sem kom saman fjöldi gesta og eftirvæntingafullir styrkþegar. Einn þeirra var fulltrúi SSNV, en sótt var um styrk til sjóðsins til að endurvekja Barnamenningarhátíðina Skúnaskrall, sem í fyrsta og eina sinn var haldin vorið 2022.

Prjónagleðin, eða Iceland Knit Fest upp á enska tungu, verður haldin af sveitarfélaginu Húnabyggð dagana 5.-7. júní næstkomandi og er þetta í annað sinn sem Húnabyggð er alfarið með handverkshátíðina á sinni könnu. Það er Svanhildur Pálsdóttir sem er viðburðastjóri Prjónagleðinnar í fimmta skipti og sér hún um undirbúning, skipulag og framkvæmd ásamt mögnuðum hópi sjálfboðaliða. Feykir sendi nokkrar vandaðar spurningar á viðburðastjórann en í ár er haldið upp á það að þetta er í tíunda sinn sem Prjónagleði fer fram.

Talsverður vöxtur er í ferðaþjónustu á Norðurlandi, einkum í vetrarferðaþjónustu, og umtalsverðar fjárfestingar yfirstandandi eða í bígerð á svæðinu. Komufarþegum til Akureyrarflugvallar fjölgaði um 9,5% á síðasta ári og hafa aldrei verið fleiri, þá eru vísbendingar um að erlendir ferðamenn sem heimsækja Norðurland leiti sérstaklega í annars konar afþreyingu en ferðamenn sem koma um Keflavíkurflugvöll. Fjallað var um stöðu og horfur í ferðaþjónustu á Norðurlandi á ráðstefnunni „Segjum sögur af fjárfestingum“ sem Markaðsstofa Norðurlands stóð fyrir í vikunni.

Sagt var frá því á heimasíðu Skagafjarðar í dag að í vikunni skrifuðu Inga Sæland mennta- og barnamálaráðherra, Sigfús Ingi Sigfússon sveitarstjóri Skagafjarðar og Selma Barðdal Reynisdóttir skólameistari Fjölbrautaskóla Norðurlands vestra undir viljayfirlýsingu um stækkun verknámshúss Fjölbrautaskóla Norðurlands vestra. Áætlað er að framkvæmdir hefjist næsta vetur og gert er ráð fyrir að húsið verði reist í tveimur áföngum.