Fréttir

Í október síðastliðnum stóð Fiskeldis- og fiskalíffræðideild Háskóla Íslands á Hólum fyrir spennandi verklegri námslotu þar sem saman komu nemendur úr diplómanámi í fiskeldi, grunnnámi og meistaranámi í Aquatic Biology.

Nú ber vel í veiði því Ólafur Þór Ólafsson sveitarstjóri á Skagaströnd féllst á að svara Rabbinu. Ólafur er fæddur 1972 og er langsamlega yngstur í stórum barnahópi Vestfirðinganna Þórdísar Marteinsdóttur og Ólafs Davíðssonar. „Þau féllu frá fyrir nokkrum árum. Fyrstu árin bjó ég í Garðabæ en svo fluttum við til Sandgerðis og þar ólst ég upp að mestu leyti.“ Nú býr hann á Skagaströnd en fjölskyldan dreifist líka í Garðabæ og Sandgerði. „Ég er trúlofaður Sigríði Katrínu Kristbjörnsdóttur og í okkar samsettu fjölskyldu eru átta börn, þrjú tengdabörn, eitt barnabarn og tveir hundar.“

Hin árlega æðruleysismessa Skagafjarðarprestakalls verður á Löngumýri þann 22. nóvember næstkomandi kl 20:00. Öll eru sóknarbörn fjarðarins hjartanlega velkomin frá Ábæjarsókn til Knappstaðasóknar að Ketu á Skaga.

Dómararnir eru sjaldnast efstir á vinsældalistum körfuboltabullna, jafnvel þó í Síkinu sé stundum sungið um hversu fallegir þeir eru. Það væri sennilega lítið gaman að körfunni ef engir væru dómararnir en fremstur meðal jafningja í flokki þeirra er Sigmundur Már Herbertsson sem náði þeirri mögnuðu vörðu á dómaraferli sínum í Síkinu í gærkvöldi að dæma leik númer 2500 á vegum KKÍ. Feykir tekur hatt sinn ofan fyrir Sigmundi Má.

Menningar- og samstöðutónleikar verða haldnir í Hólaneskirkju á Skagaströnd þann 19. nóvember kl. 20. Þar munu söngvarar og hljóðfæraleikarar bjóða upp á fjölbreytta tónlistardagskrá til stuðnings Bergrósar Hafsteinsdóttur, ungri móður sem berst við krabbamein.

Líkt og Feykir hefur sagt frá þá bar lið Tindastóls sigurorð af ÍR-ingum í Bangsaleiknum sem fram fór í Síkinu. Við lögðum nokkrar spurningar fyrir Arnar þjálfara nú í morgunsárið, spurðum út í leikinn, meiðsli Péturs fyrirliða og leikinn gegn Lausanne á fimmtudaginn. Þá kom fram að það safnaðist 1,1 milljón króna til stuðnings Einstökum börnum á leiknum í gærkvöldi.

Lið Tindastóls var ekki sannfærandi þegar það tók á móti ÍR-ingum í Síkinu í gærkvöldi. Leikurinn var full sveiflukenndur fyrir smekk stuðningsmanna Stólanna og ÍR-liðið sauðþrátt og nýtti hvert tækifæri, þegar heimamenn slökuðu á klónni, til að klóra í bakkann. Einhvernveginn var þó tilfinningin sú að stigin tvö yrðu Stólanna og það gekk eftir. Lokatölur 94-87.

Laugardaginn 14. nóvember kl. 14:00–17:00 verður sannkölluð jólastemning á handverkssýningu notenda Dagdvalar aldraðra og sölubasar. Sýningin verður í samverusal HSN og anddyri Dagdvalar.

Nú nýverið sendi Króksarinn Sölvi Sveinsson skólamaður frá sér bók sem hann kallar Skólabók – er leikur að læra? en það er Ugla útgáfa sem gefur út. Sölvi hóf sína skólagöng í Barnaskóla Sauðárkróks, kláraði grunnskólann á Króknum og fór síðan í Menntaskólann á Akureyri. Hóf síðan nám í íslensku og sögu við Háskóla Íslands en til að eiga fyrir helstu nauðsynjum – eins og skrölti á skemmtistaðnum Glaumbæ og jafnvel út að borða á Sælkeranum – þá sótti hann um vinnu sem kennari í Hagaskóla.

Þjálfarateymi A-landsliðs karla hefur valið Ragnar Ágústsson í hóp þeirra 15 leikmanna sem æfa fyrir komandi landsleikjaglugga. Í tilkynningu á Facebook-síðu körfuknattleiksdeildar Tindastóls segir að Ísland mæti Bosníu í Laugardalshöll fimmtudaginn 26. nóvember næstkomandi og heldur svo út til Tyrklands daginn eftir þar sem Strákarnir okkar mæta Tyrklandi í Istanbul sunnudaginn 29. nóvember.