Fréttir

Dr. Stefán Óli Steingrímsson hefur hlotið framgang í stöðu prófessors við Fiskeldis- og fiskalíffræðideild Háskólans á Hólum. Á vef skólans segir að Stefán Óli hafi starfað við Háskólann á Hólum samfleytt frá 2003, en hann hafði áður unnið hjá Hólaskóla með hléum frá 1993 til 1997. Stefán lauk doktorsprófi í líffræði árið 2004, frá Concordia háskóla í Montreal í Kanada, meistaraprófi frá sama skóla árið 1996 og B.S. prófi í líffræði frá Háskóla Íslands árið 1992.

Haustmót Júdósambands Íslands, yngri flokka, var haldið í Grindavík sl. laugardag en þar átti Júdódeild Tindastóls fimm keppendur á meðal 46 annarra. Mótið var fyrir árganga 1997 til 2006 og var keppt í aldurs- og þyngdarflokkum og voru félögin alls átta sem áttu keppendur á mótinu.

Kosningaskrifstofa sjálfstæðisflokksins var opnuð formlega á Sauðárkróki sl. laugardag að Kaupangstorgi 1. Að sögn Bryndísar Lilju Hallsdóttur komu um hundrað gestir sem áttu saman mjög skemmtilega stund. Hún segir mikla samstöðu og jákvæðni hafa ríkt og mátti heyra á tali fólks að bjartsýni væri fyrir komandi kosningadegi. Bjarni Benediktsson forsætisráðherra flutti stutt ávarp og hvatti fólk til dáða.

Eitt af því sem þarf að taka fastari tökum eftir komandi kosningar eru heilbrigðismál. Það er ekki síst mikilvægt fyrir dreifðar byggðir landsins. Skilgreina þarf vandlega hvaða heilbrigðisþjónusta á að vera í boði að lágmarki í öllum byggðarlögum og finna leiðir til að veita þá grunnþjónustu og bæta hana síðan jafnt og þétt. Aðgengi að heilsugæslu og læknum verður að vera tryggt alls staðar á landinu. Það er mikilvægt byggðamál.

Það kom fólki skemmtilega á óvart er Bjarni Benediktsson, forsætisráðherra, upplýsti í ræðu sinni við vígslu Heilsupróteins sl. laugardag að áætlunarflug myndi hefjast á ný til Sauðárkróks. Flugfélagið Ernir mun því hefja flug á Sauðárkrók þann 1. desember nk. og verður áætlun kynnt og sala á flugi hefjast í vikunni, eftir því sem kemur fram á Facebooksíðu Arna.

Það var mikið um að vera í salarkynnum mjólkursamlags KS þegar fyrri hluti próteinverksmiðjunnar var vígð með pompi og prakt en sögur segja að á annað þúsund manns hafi mætti í veisluna. Skotta Film var á staðnum og fangaði stemninguna sem var innblásin af gleði og bjartsýni.

„Við þökkum góðvinum okkar Valdísi og Baldri fyrir áskorunina. Georg er með mjólkuróþol svo uppskriftirnar taka mið af því. Ég er agalegur slumpari og það er því talsverð áskorun að skrifa niður þessar uppskriftir þar sem ég kann þær orðið utan að og nota því nokkurs konar „bakara-auga“ við baksturinn,“ segir Sigurlaug Ingimundardóttir frá Skagaströnd en hún og Georg sonur hennar voru matgæðingar vikunnar í 40. tbl. Feykis árið 2015.

Í dag var hin nýja próteinverksmiðja, Heilsuprótein, á Sauðárkróki vígð sem Mjólkursamsalan og Kaupfélag Skagfirðinga tóku höndum saman um að stofna. Fyrirtækinu er ætlað að framleiða verðmætar afurðir úr mysu sem áður hefur verið fargað. Í fyrri áfanga verksmiðjunnar, sem nú var vígð, verður framleitt próteinduft úr mysu sem fellur til við ostagerð á Vestur-, Norður- og Austurlandi en í síðari áfanga verksmiðjunnar, sem áætlað er að komist í gagnið innan tveggja ára, verður framleitt ethanól úr mjólkursykri ostamysunnar og einnig úr mysu sem fellur til við skyrgerð.

Holóttir þröngir malarvegir í rigningu og haustmyrkri eru stórhættulegir yfirferðar. Þessu kynnist maður vel nú á ferðum um kjördæmið í aðdraganda enn einna kosninganna. Þessir holóttu vegir bera gott vitni um hinn hola hljóm sem hefur verið í loforðum fyrir hverja kosningu á síðustu árum og áratugum. Það skiptir víst litlu máli þótt kosningar sé haldnar árlega, jafnvel oftar. Vegirnir eru áfram holóttir og áfram hljóma hol kosningaloforð.

Þuríður Harpa Sigurðardóttir, varaformaður Sjálfsbjargar og framkvæmdastjóri Nýprents á Sauðárkróki, var kjörin nýr formaður Öryrkjabandalags Íslands á aðalfundi samtakanna í morgun. Þuríður Harpa tekur við af Ellen Calmon, sem hefur verið formaður bandalagsins frá árinu 2013. Þuríður Harpa fékk 68 atkvæði í formannskjörinu en mótframbjóðandi hennar, Einar Þór Jónsson, framkvæmdastjóri HIV Ísland, fékk 58 atkvæði.