Rabb-a-babb

Nafn: Eva Pandora Baldursdóttir. Árgangur: 1990. Hvað er í deiglunni: Ekkert sérstakt svo sem. Njóta þess að eyða tíma með fjölskyldunni á meðan ég er í fæðingarorlofi. Uppáhalds málsháttur eða tilvitnun? Heyrði nýjan málshátt í sjónvarpsþáttunum Föngum um daginn og hefur hann verið í miklu uppáhaldi síðan en hann er „Skeinir sá sem skeit.“

Nafn: Sólveig Olga Sigurðardóttir, eða bara Sóla eins og afi gamli tók upp á að kalla mig barnunga og festist strax við mig. Árgangur: 1973. Hvað er í deiglunni: Úff það er nú ýmislegt, ætli það sé ekki einna helst að trassa ekki skuldbindingarnar í námi, starfi og ekki hvað síst gagnvart heimili og fjölskyldu. Og reyna svo að njóta þessa alls í leiðinni. Hvaða teiknimyndapersóna höfðar mest til þín? Kolbeinn kafteinn finnst mér hafa skemmtilegan orðaforða.

Nafn: Jón Garðar Jónssson. Árgangur: 70 árgangurinn, ég hafði ekkert val. Hvað er í deiglunni: Að stækka við okkur, jafnvel að hugsa okkur til hreyfings á landsbyggðina. Hvernig nemandi varstu? Í Gagnfærðiskóla var ég var mjög erfiður nemandi og vildi fara mína eigin leiðir, átti erfitt með að hlusta og læra. En í FSU lærði ég að hlusta og læra og þá byrjaði áhuginn á námi og útskrifaðist ég þaðan sem iðnemi með stæl.

Nafn: Sigríður Kristín Þorgrímsdóttir. Árgangur: 1956. Hvað er í deiglunni: Vinna og aftur vinna! Og skriftir í hjáverkum. Hvað er eftirminnilegast frá fermingardeginum?
 Hárgreiðslan hennar systur minnar sem ég var í laumi hund-óánægð með. Hún setti rúllur í hárið á mér og túberaði það og mér fannst það kellingarlegt, vildi slöngulokka. En vildi ekki særa stóru systur.

Nafn: Sveinn Sverrisson. Árgangur: 1969. Hvað er í deiglunni: Hefðbundin haustverk sem miðast m.a. við að veiða eitthvað í kistuna fyrir veturinn. Hvaða lag er líklegast að þú takir í Kareókí? Er með þá áráttu að flauta eða humma alltaf það lag sem ég heyrði síðast, þannig að líklegast tæki ég sama lag og var sungið á undan mér.

Nafn: Bjarki Már Árnason. Árgangur: 78. Hvað er í deiglunni: Það er nú að njóta þess aðeins lengur að hafa unnið 3. deildina með Tindastóli og svo er ég nú reyndar að fara til Los Angeles í byrjun október og orðinn frekar spenntur fyrir því. Hvað varstu að hlusta á þegar þú fékkst bílprófið? Ég var að hlusta mikið á U2, hef hlustað mikið á þá og geri enn.

Nafn: Halla Rut Stefánsdóttir. Árgangur: '77 árgangur. Hvað ætlaðir þú að verða þegar þú yrðir stór? Það var nú margt, en aldrei datt mér í huga að ég yrði prestur. Hver er elsta minningin sem þú átt? Ég man vel eftir mér og Berglindi systur minni inn í herbergi í Raftahlíðinni, hún hágrátandi og ég að reyna að troða henni í allt of lítil föt. Fékk skammir, man það.

Nafn: Sóley Björk Guðmundsdóttir. Árgangur: 1988. Hvað er í deiglunni: Andlegur undirbúningur fyrir Laufskálarétt svona mestmegnis. Hvað ætlaðir þú að verða þegar þú yrðir stór? Ruslakall, ég átti lítinn dótaruslabíl og langaði afskaplega mikið að vita hvar ruslið allt endaði.

Nafn: María Gréta Ólafsdóttir. Árgangur: 1956. Hvað er í deiglunni: Það helsta er að við stefnum á að flytja á Krókinn aftur eftir 16 ár í Hjaltadal og þurfum því að selja húsið okkar í sveitinni, með nokkurri eftirsjá reyndar. Hver var mikilvægasta persóna síðustu 100 ára að þínu mati? Rosa Parks, þeir sem ekki þekkja þetta nafn ættu að kynna sér það, þetta var ein merkilegasta kona allra tíma.

Nafn: Róbert Daníel Jónsson. Árgangur: 1975. Hvað er í deiglunni: Það er alltaf eitthvað í deiglunni, ég er áhugaljósmyndari og er að fara af stað með ljósmyndasýningu í haust sem heitir Náttúran í Austur Húnavatnssýslu svo eitthvað sé nefnt. Besti ilmurinn? Lyktin af Íslandi þegar umhverfið okkar er í blóma yfir há sumarið.