Skagafjörður

Ég, Sigríður Garðarsdóttir, elska að fara út að borða og fá mér nokkra smárétti og uppáhalds veitingastaðurinn minn, fyrir sunnan, sem býður upp á þess konar rétti er Tapas. Þegar þessi matarþáttur var skrifaður var ég vör við það að sá veitingastaður, Tapas, væri að halda upp á 22 ára afmælið sitt, enda ekki hissa að hann hafi náð að halda úti rekstri í öll þessi ár því ég hef aldrei orðið fyrir vonbrigðum þegar ég hef farið þangað. En á Króknum er enginn Tapas og þá verður maður að hugsa út fyrir rammann og reyna að græja þetta sjálfur, er það ekki bara… Hér koma tveir girnilegir smáréttir af síðunni www.hanna.is.

Það eru læti í veðrinu þessa dagana og helst boðið upp á linnulausar umhleypingar. Nú hefur Veðurstofan gefið út appelsínugula viðvörun á Ströndum og Norðurlandi vestra fyrir morgundaginn (sunnudag) og lýst hefur verið yfir óvissustigi almannavarna frá kl. 11-14. Spáð er sunnan stormi eða roki, 20-28 m/sek. Búast má við mjög hvössum og varhugaverðum vindhviðum við fjöll, staðbundið yfir 35 m/s.

Lið Tindastóls, sem spilar í Bestu deild kvenna í sumar, varð fyrir áfalli á dögunum þegar varnarmaskínan Kristrún María Magnúsdóttir varð fyrir slæmum meiðslum sem gætu mögulega sett hana á hliðarlínuna í eitt og hálft ár. Hún er reyndar ákveðin í að stytta þann biðtíma eitthvað. Kristrún er leikmaður sem fer ekki mikið fyrir á vellinum en vinnur sína vinnu möglunarlaust og hefur vart stigið feilspor við hlið Bryndísar fyrirliða í vörninni síðustu tvö sumur.

Matgæðingur vikunnar í tbl 34, 2022, var Kristín Rós Blöndal Unnsteinsdóttir en hún er búsett í Tunguhlíð í Lýdó og vinnur á leikskólanum Birkihlíð sem er í Varmahlíð. Kristín er í sambúð með Guðjóni Ólafi Guðjónssyni og ætlar að bjóða upp á haustlegar máltíðir.

Brynja Sif Harðardóttir býr á Sauðárkróki með kærastanum sínum, Hannesi Inga Mássyni og syni þeirra Óliver Mána sem verður tveggja ára í desember. Brynja er á lokaári í miðlun og almannatengslum við Háskólann á Bifröst og vinnur á leikskólanum Ársölum.

Knattspyrnudeild Tindastóls hefur fengið til liðs við sig tvo feikisterka leikmenn til að styrkja Bestu deildar lið Stólastúlkna fyrir sumarið. Um er að ræða markmanninn Monicu Wilhelm sem er bandarísk og varnarmanninn Gwen Mummert sem er þýsk en hefur spilað í bandaríska háskólaboltanum. Þær eru báðar væntanlegar á Krókinn á næstu dögum samkvæmt upplýsingum Feykis.

N4 ehf. hefur óskað eftir gjaldþrotaskiptum eftir að tilraunir til að tryggja framtíð fyrirtækisins báru ekki árangur. N4 hefur haldið úti metnaðarfullri sjónvarpsdagskrá með landsbyggðina í fyrirrúmi í 15 ár, gefið út dagskrárblað auk þess sem um tíma var gefið út blað sem byggði á efni stöðvarinnar. Króksarinn María Björk Ingvadóttir hefur verið í forsvari fyrir N4 síðustu árin og barist ötullega fyrir viðgangi stöðvarinnar en þar hafa nokkrir sprækir Skagfirðingar til viðbótar látið ljós sitt skína.

Í gærkvöldi stóð Pílukastfélag Skagafjarðar fyrir vel heppnuðu móti en 16 keppendur mættu til leiks í aðstöðu félagsins við Borgarteig á Sauðárkróki. Eftir spennandi keppni þá sigraði Arnar Geir Hjartarson að loknum spennandi úrslitaleik við Þórð Inga Pálmarsson en úrslitaviðureignin endaði 3-2. Í þriðja sæti varð síðan Ingvi Þór Óskarsson eftir að hafa borið sigurorð af Orra Arasyni.

Veturinn hefur verið erfiður hjá liði Tindastóls í 1. deild kvenna í körfunni og aðeins tveir sigurleikir í 16 leikjum. Feykir sendi Pat Ryan, þjálfara liðsins, nokkrar spurningar „Við erum lið með fullt af ungum leikmönnum sem þurfa tíma til að þroskast. Stelpurnar vinna hörðum höndum á hverjum degi,“ sagði Pat þegar Feykir byrjaði á að spyrja um hvað væri það helsta sem upp á vantar hjá liðinu.

Auður Herdís Sigurðardóttir, oft kennd við Stóru-Akra í Blönduhlíð, hefur tekið við rekstri félagsheimilisins Héðinsminni en samningur þess efnis var undirritaður við Skagafjörð til næstu fimm ára. Héðinsminni verður kynntur sem nýr áfangastaður í Skagafirði fyrir hópa í mat og drykk undir merkjum Áskaffis.