A-Húnavatnssýsla

Ásmundur Einar Daðason, félags- og barnamálaráðherra, heimsótti Norðurland vestra í lok maí og skoðaði meðal annars við það tækifæri framkvæmdir við nýjar almennar leiguíbúðir á Blönduósi og á Sauðárkróki.

Fyrsti alvöru fótboltaleikur sumarsins verður á morgun, sunnudag, þegar lið Tindastóls tekur á móti grönnum sínum í Kormáki/Hvöt. Leikurinn hefst kl. 14:00 á gervigrasinu á Sauðárkróki og er liður í 1. umferð Mjólkurbikarsins. Reikna má með hörkuleik þó hvorugt liðið hafi spilað fótboltaleik síðan snemma árs og spurning hvort leikmenn verði eins og beljur að vori – eða þannig.

Ný stjórn Markaðsstofu Norðurlands var kosin á aðalfundi, sem haldinn var þann 26. maí síðastliðinn og segir á heimasíðu hennar að aðalfundurinn hafi verið óvenjulegur, eins og svo margir fundir þetta misserið, en í fyrsta sinn var hann haldinn sem fjarfundur.

Fjölbrautaskóla Norðurlands vestra var slitið í 41. sinn við hátíðlega athöfn í íþróttahúsinu á Sauðárkróki í dag að viðstöddum nánustu aðstandendum brautskráningarnema. Alls brautskráðust 67 nemendur og þá hefur Feykir sagt frá því fyrr í dag að Þorri Þórarinsson náði þeim einstaka áfanga að fá 10 í meðaleinkunn, að öllum líkindum fyrstur nemenda í 41 árs sögu skólans.

Lögreglunni Norðurlandi vestra hafa borist áreiðanlegar upplýsingar þess efnis að hlaupbangsar eða hlaupkubbar sem innihalda fíkniefni séu í umferð á svæðinu. Í tilkynningu frá lögreglunni segir að um grafalvarlegt mál sé að ræða því eins og nýleg dæmi sanna er þarna um að ræða mjög hættuleg efni.

Nýverið kom út skýrsla sem unnin var af Rannsóknarmiðstöð ferðamála, í samstarfi við Háskólann á Hólum, fyrir Markaðsstofu Norðurlands um markaðssetningu áfangastaðarins Norðurland, en gerð skýrslunnar var m.a. styrkt af Sóknaráætlun Norðurlands vestra sem eitt af átaksverkefnum 2018-2019. Með skýrslunni er áætlað að geta betur stigið næstu skref í markaðssetningu landshlutans i takt við áherslur áfangastaðaáætlunar og flokkun mögulegra gesta úr markaðsgreiningu Íslandsstofu.

Stjórn Loftslagssjóðs hefur lokið við fyrstu úthlutun úr sjóðnum. Alls bárust 203 gildar umsóknir og voru 32 þeirra styrktar, eða um 16%. Meðal þeirra sem hlutu styrk er verkefnið Krakkar í norðri: Náttúran og vöktun. Það eru Náttúrustofa Norðurlands vestra og Selasetur Íslands sem leiða verkefnið en það er unnið í samstarfi við Háskólann á Hólum og Hafrannsóknastofnun.

Vetrarstarfi Körfuboltaskóla Norðurlands lauk í gær með síðustu æfingu körfuboltaiðkenda á Blönduósi með heimsókn á Krókinn. Hafa þau æft reglulega í vetur en krakkar á Skagaströnd, Hvammstanga og Hólmavík hafa einnig notið leiðsagnar reyndra leikmanna undir forystu Helga Freys Margeirssonar sem kom skólanum á laggirnar. Að sögn Helga var æfingin skemmtilegur lokapunktur á fyrsta heila körfuboltatímabilinu á Blönduósi.

Síðastliðna nótt var brotist inn á þremur stöðum á Blönduósi og verðmætum stolið. Í tilkynningu frá Lögreglunni á Norðurlandi vestra kemur fram að einn aðili hafi verið handtekinn í tengslum við málið og er sá nú í haldi lögreglu. Málið var unnið í góðri samvinnu við Lögregluna á höfuðborgarsvæðinu og Lögregluna á Norðurlandi eystra.

Heildarmat fasteigna á Íslandi hækkar um 2,1% frá yfirstandandi ári og verður 9.429 milljarðar króna, samkvæmt nýju fasteignamati Þjóðskrár Íslands fyrir árið 2021. Þetta mun vera umtalsvert minni hækkun en tilkynnt var um fyrir ári síðan þegar fasteignamat hækkaði um 6,1% á landinu öllu. Af einstaka bæjarfélögum hækkar heildarfasteignamat mest á Ísafirði eða um 11,2%, um 8,8% í Akrahreppi og 8,5% í Tálknafjarðarhreppi og á Blönduósi.