Fréttir

Að þessu sinni er það Hólmar Örn Eyjólfsson sem svarar Tón-lystinni en auk þess að vera atvinnumaður í knattspyrnu er hann besti gítarleikarinn í íslenska landsliðinu í knattspyrnu – að mati Feykis. Þar sem Hólmar er búinn að glíma við erfið meiðsli undanfarna mánuði var ákveðið að senda honum spurningalista Tón-lystarinnar til að stytta honum stundirnar í endurhæfingunni í Búlgaríu þar sem hann er á mála hjá stórliði Levski Sofia.

Körfuknattleiksdeild Tindastóls hefur ráðið Baldur Þór Ragnarsson sem þjálfara meistaraflokks karla til næstu þriggja ára en jafnframt mun hann hafa yfirumsjón með styrktarþjálfun beggja meistaraflokka, kvenna og karla. Baldur kemur til Tindastóls frá Þór Þorlákshöfn, þar sem hann náði mjög góðum árangri með liðið á síðasta tímabili.

Aðalfundur Markaðsstofu Norðurlands var haldinn á Fosshótel Húsavík í gær. Meðal dagskrárliða var stjórnarkjör þar sem kosið var um tvær stöður aðalmanna á Norðurlandi eystra og eina á Norðurlandi vestra. Aðalmenn í stjórn Markaðsstofu Norðurlands eru kosnir til tveggja ára í senn og varamenn á hverju ári.

Í gær, þriðjudaginn 7. maí kl. 14, komu saman til fundar átta félagar í Veðurklúbbnum á Dalbæ. Farið var yfir spágildi síðasta mánaðar sem sýndi að í raun og sannleika varð veðrið miklu betra en gert var ráð fyrir!

Á 1000. fundi byggðarráðs Húnaþings vestra, sem haldinn var sl. mánudag, var lagt fram bréf frá Guðnýju Hrund Karlsdóttur, sveitarstjóra, þar sem hún segir upp starfi sínu sem sveitarstjóri Húnaþings vestra frá og með næstu mánaðamótum. Uppsögnin er með þriggja mánaða fyrirvara og miðast því starfslok við 31. ágúst nk.

Alþingi samþykkti í gær að fela heilbrigðisráðherra að móta heildstæða opinbera stefnu um rekstur og skipulag bráðaþjónustu utan spítala. Markmið stefnunnar verði að formfesta samstarf þeirra sem sinna þjónustunni, skilgreina með skýrari hætti ábyrgð og verkaskiptingu innan hennar og efla menntun, endurmenntun og starfsþjálfun þeirra sem starfa við sjúkra- og neyðarflutninga og veita bráðaþjónustu á vettvangi slysa eða í öðrum neyðartilvikum.

Sundlaug Sauðárkróks hefur verið opnuð aftur eftir endurbætur en vegna skólasunds verður opnunartími aðeins frábrugðinn hefðbundnum opnunartíma.

Uppskeruhátíð körfuknattleiksdeildar Tindastóls verður haldin laugardaginn 11. maí nk. í Síkinu. Húsið opnar kl 19:00 og skemmtunin hefst kl 19:30. Í tilkynningu frá deildinni segir að um kjörið tækifæri að ræða fyrir alla velunnara, stuðningsmenn og leikmenn Tindastóls til að þjappa sér saman eftir tímabilið og njóta samverunnar en allir eru velkomnir.

Mannbjörg varð þegar fiskibátur sökk um eina sjómílu frá landi við Hvammstanga um klukkan hálf fimm í morgun. Í fréttum RÚV er haft eftir lögreglu að talið sé að báturnn hafi rekist á sker þar sem hann var á landleið og leki komist að honum.

Nemendur leiklistarvals á unglingastigi í Varmahlíðarskóla sýndu á dögunum leikritið Tjaldið eftir Hallgrím Helgason í félagsheimilinu Héðinsminni. Leikstjóri verksins er Íris Olga Lúðvíksdóttir, kennari við skólann. Sýningin var hluti af leiklistarverkefninu Þjóðleik sem Þjóðleikhúsið stendur fyrir og hóf göngu sína á Austurlandi fyrir tíu árum. Verkefnið er haldið annað hvert ár og hefur fyrir löngu breiðst út til annarra landshluta. Þetta er í fjórða sinn sem Varmahlíðarskóli tekur þátt í verkefninu.