Fréttir

Verðlaun Jónasar Hallgrímssonar voru afhent í dag, á degi íslenskrar tungu, í menningarmiðstöðinni Nýheimum á Höfn í Hornafirði. Verðlaunin eru veitt árlega þeim einstaklingi sem hefur með sérstökum hætti unnið íslenskri tungu gagn í ræðu eða riti, með skáldskap, fræðistörfum eða kennslu og stuðlað að eflingu hennar, framgangi eða miðlun til nýrrar kynslóðar. Lilja Alfreðsdóttir, mennta- og menningarmálaráðherra veitti Skagfirðingnum Eiríki Rögnvaldssyni, prófessor emerítus, Verðlaun Jónasar Hallgrímssonar 2018.

Rúmlega 80 manns sóttu íbúafund um vegamál á Vatnsnesi sem haldinn var á Hótel Hvítserk sl. miðvikudagskvöld. Til fundarins mætti Sigurður Ingi Jóhannsson, samgönguráðherra, og fór yfir hugsanlega möguleika í stöðunni ásamt heimamönnum.

Heilbrigðiseftirlit Norðurlands vestra hvetur þá sem hyggjast standa fyrir áramótabrennum að drífa í að sækja sem fyrst um starfsleyfi en samkvæmt reglugerð umhverfisráðuneytisins um losun frá atvinnurekstri og mengunarvarnaeftirlit tekur leyfisveitingin a.m.k. 5 vikur. Ástæðan er sú að það ber að auglýsa eftir athugasemdum í fjórar vikur og taka síðan saman greinargerð um útgáfuferil starfsleyfisins.

Samgöngu- og sveitarstjórnarráðherra hefur undirritað samninga við sex landshlutasamtök sveitarfélaga um níu verkefnastyrki sem veittir eru á grundvelli stefnumótandi byggðaáætlunar fyrir árin 2018-2024. M.a. fara 20 milljónir í innviðauppbyggingu vegna gagnavers á Blönduósi árið 2018 og 25 milljónir á ári næstu þrjú ár á eftir.

Þriðja UTís, ráðstefna um upplýsingatækni í skólastarfi, var haldið á Sauðárkróki um síðustu helgi en viðburðurinn er ætlaður kennurum og skólafólki af öllu landinu. Alls tóku 126 aðilar þátt og að sögn Ingva Hrannars Ómarssonar, skipuleggjanda viðburðarins, voru að auki 170 á biðlista.

Nú er hafin undirskriftasöfnun á netinu til stuðnings við að tvær hugmyndir Vegagerðarinnar frá árinu 2010 um styttingu hringvegarins á Norðurlandi vestra verði teknar upp í samgönguáætlun. Leiðirnar sem um ræðir eru annars vegar Húnavallaleið í Austur-Húnavatnssýslu og Vindheimaleið í Skagafirði. Fjallað er um málið á vef Ríkisútvarpsins.

Á Facebooksíðu Lögreglunnar á Norðurlandi vestra er sagt frá því að skemmdarverk hafi verið unnin á ljósastaurum sem standa meðfram Sauðá á Sauðárkróki en þar voru fimm staurar skemmdir. Lýsir lögreglan eftir vitnum að skemmdarverkunum og biður hvern þann er kann að hafa upplýsingar um málið að hafa samband. Tekið er fram að farið verður með nöfn upplýsingaaðila sem trúnaðarmál sé þess óskað.

Leikhópur Nemendafélags Fjölbrautaskóla Norðurlands vestra frumsýnir nk.föstudag hinn sívinsæla söngleik Grease í leikstjórn Péturs Guðjónssonar. Með aðalhlutverk fara þau Róbert Smári Gunnarsson, sem leikur Danny Zuko og Valdís Valbjörnsdóttir sem leikur Sandy.

Í kvöld, miðvikudaginn 14. nóvember kl. 20:00, er boðað til íbúafundar á Hótel Hvítserk í Vesturhópi vegna slæms ástands Vatnsnesvegar. Samgönguráðherra, Sigurður Ingi Jóhannsson, mætir á fundinn.

Farskólinn á Norðurlandi vestra leitar nú þátttakenda í námskeið sem er öllum opið og ber heitið Langar þig að vera óstöðvandi? Áhugavert er að stéttarfélögin SFR, Kjölur, Samstaða, Aldan og Verslunarmannafélag Skagafjarðar greiða námskeiðsgjaldið að fullu fyrir sína félagsmenn.