Fréttir

Það hafa eflaust einhverjir klórað sér í höfðinu yfir súkkulaðibitakökuuppskrift sem birtist í Jólablaði Feykis en þau leiðu mistök urðu að röng uppskrift fylgdi viðtalinu við Rannveigu og Magnús á Stóru-Ásgeirsá. Hér kemur sú rétta:

Þar sem einungis eru 17 dagar til jóla ætlar Feykir að koma sér, og þér, í jólagírinn með jólalagi dagsins. Þar eru á ferðinni hinir spaugsömu drengir í Tvíhöfða og lagið heitir einfaldlega Jólalag.

Foreldrafélag Blönduskóla heldur jóla–notalegheit í Blönduskóla í dag milli klukkan 17 og 19. Þá mæta foreldrar og börn, ömmur og afar og allir hinir og eiga notalega stund saman við að föndra jólakort, mála piparkökur og nokkrir unglingar verða með spilastöð og kenna á spil. Pappír og ýmislegt fleira til jólakortaföndurs verður á staðnum en allir eru hvattir til að koma með liti, lím, skæri og fleira sem skemmtilegt er að nota til kortagerðar. Hægt verður að kaupa piparkökur og verður boðið upp á glassúr til skreytinga.

Þriðjudaginn 5. desember 2017 komu félagar í Veðurklúbbnum á Dalbæ saman til fundar til að huga að veðurhorfum í jólamánuðinum. Fundurinn hófst kl. 14:00 og voru fundarmenn sex talsins, sem er óvenju fámennt, en nokkrir veðurspámenn voru uppteknir við jólaundirbúning og ýmiss viðvik, sem gera þarf á aðventu. Fundinum lauk kl. 14:25. Fundarmenn voru nokkuð sáttir með hvernig síðasta spá gekk eftir en þó reyndist heldur meiri sjókoma en reiknað var með.

Jörð skalf í Fljótum í nótt og í morgun en klukkan 02:26:23 sýndu mælar Veðurstofunnar kipp upp á 2,3. Um klukkan 05:25 reið stærsti skjálftinn yfir en stærð hans var 3,1 og fylgdu nokkrir eftirskjálftar í kjölfarið, sá stærsti upp á 2,8, átta mínútum síðar.

Þar sem einungis eru 18 dagar til jóla ætlar Feykir að koma sér, og þér, í jólagírinn með jólalagi dagsins. Það er hið skemmtilega Baggalútslag Það koma vonandi jól.

Það var glatt á hjalla í Iðju á Sauðárkróki í gær en þar var opið hús í tilefni af alþjóðadegi fatlaðra. Þegar blaðamaður leit við bárust ljúfir harmóníkutónar á móti honum en þar voru þá í heimsókn nemendur og kennarar frá Tónlistarskóla Skagafjarðar. Þeir tóku lagið fyrir viðstadda sem sumir hverjir tóku sporið við undirleik þeirra. Að sögn Jóníu Gunnarsdóttur, forstöðumanns Iðju, höfðu margir litið við eða um 50 manns það sem af var degi. Hefð er fyrir því hjá Iðju að hafa opið hús í tengslum við alþjóðadag fatlaðra þar sem gestum er boðið að koma í heimsókn og sjá hvað þar er verið að fást við og jafnframt er hægt að versla muni sem þjónustuþegar Iðju hafa búið til.

Bókaútgáfan túrí ehf á Laugarbakka gefur út fyrir þessi jól bókina Ár og kýr sem Jón Eiríksson á Búrfelli lét gera upp úr sínum frægu 365 kúamyndum sem hann málaði árið 2003. Einnig er túrí að selja aðrar bækur s.s. Leitin að Engli Dauðans eftir Jóhann Fönix, spennusaga sem gerist í framtíðinni. Sú bók kom út í fyrra.

Jólatónleikar listasmiðjunnar Tónadans verða haldnir í Miðgarði á morgun, miðvikudaginn 6. desember kl. 17:00. Tónadans, listasmiðja fyrir börn og ungmenni, var formlega stofnuð á vordögum 2017 en tók til starfa síðastliðið haust og er afrakstur hugmynda og þróunarvinnu Kristínar Höllu Bergsdóttur og Jóhönnu Marínar Óskarsdóttur. Hafði listasmiðjan verið draumur þeirra um nokkra hríð og ákváðu þær að skella verkefninu af stað á þessu ári. Báðar eru þær menntaðir hljóðfæraleikarar og tónlistarkennarar auk þess að vera við nám við Háskólann á Bifröst. Kristín Halla hefur séð um reksturinn í vetur þar sem Jóhanna er búsett á Bifröst en Kristín Halla segist hafa fengið til liðs við sig frábærar listakonur þær Helgu Rós Indriðadóttur óperusöngkonu sem stjórnar barnakórnum og þær Ólöfu Ólafsdóttur og Ragndísi Hilmarsdóttur danskennara sem kenna jassballett.

Fyrsta liðið sem kynnt er til leiks í KS deildinni í hestaíþróttum er lið Hrímnis en það er sigurvegari sl. þriggja ára og ljóst er að mörg lið vilja binda enda á þessa sigurgöngu. Liðsstjóri liðsins er sem fyrr Þórarinn Eymundsson sem alls hefur unnið einstaklingskeppnina fjórum sinnum.