Fréttir

Fundur Kristjáns Þórs Júlíussonar, landbúnaðar- og sjávarútvegsráðherra, með sauðfjárbændum á Norðurlandi vestra var haldinn í Víðihlíð þann 15. þ.m. og var hann vel sóttur. Á fundinn mættu einnig Haraldur Benediktsson alþingismaður, sem veitti samráðshópi um endurskoðun búvörusamninga formennsku og Unnur Brá Konráðsdóttir, fyrrverandi forseti Alþingis og nýkjörinn formaður samninganefndar um endurskoðun sauðfjársamningsins.

Nýjustu tölur um veiði í laxveiðiám landsins eru nú komnar á vef Landssambands veiðifélaga, angling.is en þar birtast nýjar tölur vikulega. Þar er gert að umræðuefni að veiðin í nokkrum ám norðan heiða er fremur dræm og er það að mörgu leyti frábrugðið því sem gerist í öðrum landshlutum en þar hafa margar ár verið með meiri, eða jafnvel mun meiri veiði en í fyrra.

Frjálsíþróttamaður ágústmánaðar á vefsíðunni Silfrið.is er Skagfirðingurinn Þóranna Ósk Sigurjónsdóttir sem keppir undir merkjum Tindastóls og UMSS. Segir á síðunni, sem fjallar einkum um frjálsíþróttir, að þessi knái hástökkvari hafi staðið sig afar vel í sumar, en hún hefur bætt sig um 5 sm og er nú í komin 6.-7. sæti afrekalistans frá upphafi.

Á þessu ári eru 20 ár liðin frá sameiningu hreppa í Vestur Húnavatnssýslu í það sveitarfélag sem í dag ber nafnið Húnaþing vestra. Af því tilefni er efnt til afmælisveislu 24. til 26. ágúst 2018. Það er Menningarfélag Húnaþings vestra sem skipuleggur afmælið.

Björgunarsveitir voru kallaðar út ásamt þyrlu Landhelgisgæslunnar og björgunarskipum frá Skagaströnd og Siglufirði er bátur strandaði við Reykjadisk í Skagafirði fyrr í dag. Einn maður var um borð og sakaði ekki. Áður en björgunarbátar komu á svæðið náðist að losa bátinn með aðstoð annars fiskibáts og eru þeir samferða á leið til Sauðárkróks. Ekki er Feyki kunnugt um skemmdir.

Ungur maður er nefndur Þorsteinn Snær Róbertsson, fæddur 1994, og er frá sveitabýlinu Hvalshöfða í Hrútafirði. Hann er alinn upp á Reykjaskóla í Hrútafirði og fluttist síðar yfir á Hvalshöfða, sonur Hadísar Brynju Þorsteinsdóttur og Róberts Júlíussonar. Þorsteinn spilar á kassagítar og munnhörpu og segir það hafa verið sitt stærsta afrek á tónlistarsviðinu þegar hann spilaði nokkur kántrýlög sem hann hafði sett saman en með honum spiluðu bræður hans, Júlíus og Daníel...

Lögreglan á Norðurlandi vestra og Lögreglan á Suðurlandi hafa það sem af er sumri átt mjög gott samstarf um eftirlit á hálendinu en umdæmin ná saman. Hefur lögreglan m.a. sinnt eftirliti á Kjalvegi sem er afar fjölfarinn vegur og liggur um bæði umdæmin.

Í samningum bænda og ríkis sem tók gildi 1. janúar 2017 er sett skilyrði fyrir stuðningsgreiðslum til bænda að þeir þurfi að vera þátttakendur í afurðaskýrsluhaldi og skuli skila fullnægjandi skýrsluhaldi innan tímamarka. Þannig er kveðið á um það í reglum um stuðning við sauðfjárrækt að sauðfjárbændur skuli skila vorbók í Fjárvís eigi síðar en 20. ágúst ár hvert, ella skuli stuðningsgreiðslur frestast frá og með 1. september það ár.

Ísland er strjálbýlasta land Evrópu og dreifist byggð í borgir, bæi og sveitir. Það er ekki sjálfgefið að búseta á hverjum stað sé stöðug eða fari vaxandi jafnvel þó saga byggðarlaga spanni árhundruð. Með breytingum á atvinnuháttum og samfélagsgerð fylgja fólksflutningar sem hafa áhrif á tækifæri og möguleika svæða til vaxtar. Dæmi um þetta er Bíldudalur sem um tíma átti undir högg að sækja vegna samdráttar í sjávarútvegi en nýtur nú vaxtar samhliða uppbyggingu í laxeldi.

Íbúar Sveitarfélagsins Skagafjarðar eru í dag 3.996, þannig að aðeins vantar fjóra íbúa til þess að sveitarfélagið nái tölunni fjögurþúsund. Um síðustu áramót voru íbúar sveitarfélagsins 3.944, þannig að þeim hefur fjölgað á árinu um samtals 52 og líklegt verður að teljast að íbúarnir verði fljótlega 4000. Sigfús Ingi Sigfússon nýráðinn sveitarstjóri greinir frá þessu í viðtali í þættinum Landsbyggðum á N4, sem tekinn var upp í gærmorgun.