Fréttir

Næstkomandi laugardag, 18. maí, klukkan 16:00 verða haldnir styrktartónleikar í Hólaneskirkju á Skagaströnd. Þar munu Skátakórinn og kór Hólaneskirkju leiða saman hesta sína og syngja, bæði hvor fyrir sig og sameiginlega. Tónleikarnir eru til styrktar sex barna fjölskyldu þar sem faðirinn, sem er félagi í kór Hólaneskirkju, berst við langvinnan sjúkdóm.

Háskólinn á Hólum verður vettvangur 13. ráðstefnunnar um íslenska þjóðfélagið, sem hefst á morgun 16. maí. Alls verða flutt 64 erindi af ýmsum fræðasviðum samfélagsins á þeim tveimur dögum sem hún stendur yfir. Ráðstefnan er á vegum háskólanna og haldin reglulega á mismunandi stöðum á landinu og núna í Háskólanum á Hólum.

Nú ætla Skagfirðingar að huga að umhverfinu af aðeins meiri krafti en alla jafna því boðað hefur verið til Umhverfisdaga Skagafjarðar 2019 sem hefjast í dag en 30 ár eru frá því að þeir voru fyrst haldnir í firðinum. Á heimasíðu Sveitarfélagsins eru íbúar hvattir til að hlúa að umhverfinu og er takmarkið að skapa snyrtilegra og fegurra umhverfi.

Auglýst hefur verið laus staða skólastjóra hjá Tónlistarskóla Austur-Húnavatnssýslu og er stefnt að því að viðkomandi hefji störf frá og með 1. ágúst nk. Skólinn hefur þrjár starfsstöðvar, á Skagaströnd, Blönduósi og Húnavöllum og eru nemendur skólans tæplega 90.

Nokkrir eitursvalir bændur í Austur-Húnavatnssýslu hafa vakið landsathygli fyrir myndir sem þeir hafa póstað af sjálfum sér á Facebooksíður sínar en þar skarta þeir nýju fötum keisarans og alla vega einu nýbornu lambi.

Alþjóðlegi safnadagurinn verður haldinn næstkomandi laugardag, þann 18. maí. Í tilefni hans skipulegja söfn um allan heim dagskrá þennan dag en á síðasta ári voru þátttakendur um 40.000 í 158 löndum, að því er segir á Facebooksíðu Alþjóðlega safnadagsins.

Í kvöld og á miðvikudagskvöld munu 44 nýir einstaklingar bætast í hóp íbúa á Norðurlandi vestra þegar níu sýrlenskar fjölskyldur koma til Hvammstanga og Blönduóss eftir að hafa dvalið í flóttamannabúðum í Líbanon undanfarin ár. Undirbúningur fyrir komu fólksins hefur staðið yfir undanfarnar vikur og er nýju íbúanna beðið með eftirvæntingu.

Sigurður Ingi Pálsson, áhugaljósmyndari á Sauðárkróki, var að mynda náttúruna, fugla og fleira á svæðinu í kringum tjörnina sem Sauðá rennur í neðan Sjúkrahúshæðarinnar, nokkra tugi metra frá N1 Ábæ og Kaupfélaginu, þegar hann varð var við mink. Náði hann að mynda varginn sem var ekki minna forvitinn um ljósmyndarann sem beindi að honum myndavélinni.

Á fundi sveitarstjórnar Húnaþings vestra sem haldinn var fimmtudaginn 9. maí var lögð fram tillaga að erindisbréfi fyrir öldungaráð Húnaþings vestra ásamt tillögu að skipun í öldungaráð sem báðar voru samþykktar samhljóða.

Samband austur-húnvetnskra kvenna, SAHK, hélt aðalfund sinn þann 2. maí. Við það tilefni afhenti sambandið Hollvinasamtökum Heilbrigðisstofnunarinnar á Blönduósi myndarlega fjárhæð sem var m.a. afrakstur skemmtikvölds sambandsins sem haldið var í tilefni 90 ára afmælis þess í lok nóvember á síðasta ári.