Fréttir

Tvö umferðaróhöpp urðu í Húnaþingi vestra á mánudagskvöld vegna hálku. Annars vegar valt flutningabíll á þjóðvegi 1, við afleggjarann á Heggstaðanes, um þrjá kílómetra norðan við Staðarskála. Hins vegar fór fólksbíll út af skammt frá Reykjum í Hrútafirði.

Öryggismál sjómanna hafa mikið verið í umræðunni undanfarið í ljósi hörmulegs sjóslyss sem varð í sumar þegar Jón Hákon BA–60 sökk út af Aðalvík og einn maður fórst en þrír komust lífs af þegar nálægur bátur kom þeim til bjargar á ögurstundu.

Uppskeruhátíð Hrossaræktarsamtaka Vestur-Húnavatnssýslu og Hestamannafélagsins Þyts var haldin í félagsheimilinu á Hvammstanga síðasta dag október mánaðar. Daginn áður var haldin uppskeruhátíð æskulýðsstarfs Þyts. Á hátíðunum voru veittar ýmsar viðurkenningar, m.a. fyrir ræktunarbú ársins og knapa ársins. Lækjamót var valið ræktunarbú ársins 2015, þriðja árið í röð.

Sveitarfélagið Skagafjörður hefur auglýst til leigu fjögur tún á Nöfunum á Sauðárkróki ásamt útihúsum, eftir því sem við á. Um er að ræða lóðir sem bera númerin 24, 25, 27 og 32 en þremur þeirra fylgja útihús.

Körfuknattleiksdeild Tindastóls hefur gengið frá ráðningu á nýjum þjálfara meistaraflokks en sem kunnugt er var Finninn Pieti Poikola leystur undan samningi í október. Nýr þjálfari liðsins er hinn 43 ára gamli Spánverji, José María Costa Gómez, en hann var m.a. yfirþjálfari hjá Tenerife Baloncesto með Israel Martín, síðar þjálfara Tindastóls, sem aðstoðarþjálfara.

Á Karfan.is er að finna bráðskemmtilega umfjöllun um besta byrjunarlið Tindastóls í körfunni frá upphafi. Að sjálfsögðu hafa ófáir snillingar spilað með Stólunum í gegnum tíðina og byrjunarliðið sem nokkrir fjölfróðir stuðningsmenn liðsins völdu sannarlega ekki af verri endanum.

Nes Listamiðstöð boðar til opins fundar fimmtudaginn 12. nóvember á veitingastaðnum Borginni. Fundurinn hefst kl 18:00 og er áætlað að hann standi til 21:00 með hléi þar sem boðið verður upp á súpu, brauð og kaffi.

Atvinnu-, menningar- og kynningarnefnd Sveitarfélagsins Skagafjarðar óskar eindregið eftir því að atvinnuvega- og nýsköpunarráðuneytið endurskoði ákvörðun sína um niðurfellingu byggðakvóta til Sauðárkróks og lækkun hans til Hofsóss úr 40 tonnum í 34 tonn. Þetta kemur fram í fundargerð frá fundi nefndarinnar sl. föstudag.

Gillon (Gísli Þór Ólafsson) er að vinna að nýrri plötu sem væntanleg er til útgáfu í byrjun næsta árs. Hér má heyra fyrsta kynningarlag plötunnar, Glaður í sól.

Hættumatsnefnd Skagafjarðar kynnir nýtt hættumat vegna ofanflóða á Sauðárkróki í opnu húsi á Kaffi Krók á fimmtudaginn kemur, 12. nóvember, frá kl 16 til 18:30. Fulltrúar hættumatsnefndar og sérfræðingar frá Veðurstofu Íslands verða á staðnum til að kynna hættumatið og svara fyrirspurnum gesta.