Fréttir

Sumarafleysingadama hóf störf á Feyki í morgun og byrjar á því að fylla skarð Hinriks Más blaðamanns sem fer mikinn framan af sumri við að dæma hross hér heima og erlendis. Emma er 18 ára Króksari, dóttir Freyju Emils og Helga Jóhannesona badmintonkappa, en sjálf er Emma á kafi í íþróttum og er ein sterkasta badmintonkona landsins og að auki á fullu í körfunni með Stólastúlkum.

Í 3. umferð Lengjudeildar kvenna heimsóttu Völsungskonur frá Húsavík Stólastúlkur í gærkvöldi en fyrir leikinn voru bæði lið stigalaus. Leiknum lauk með 0-3 sigri Völsungs.

Klukkan 4 í nótt óskaði skipstjóri lítils fiskibáts eftir aðstoð eftir að eldur kom upp í vélarúmi bátsins rétt norðaustur af Skagaströnd. Í tilkynningu frá Landsbjörg segir að Manningum hafði þá tekist að slökkva eldinn en báturinn var aflvana.

Kirkjuklukkan á Hólum, Líkaböng, hringdi af sjálfsdáðum í þrígang þegar lík Jóns Arasonar biskups og sona hans voru flutt norður frá Skálholti. Fyrst þegar líkfylgdin kom í Vatnsskarð, aftur þegar hún kom á Hrísháls, þaðan sem sést upp Hjaltadalinn heim til Hóla, og loks látlaust frá því komið var í túngarðinn þar til líkin höfðu verið borin inn í kirkjuna. Hringdi hún þá svo ákaflega og lengi að hún rifnaði.

Það er leikið í Lengjudeild kvenna á Króknum í kvöld en þá kemur lið Völsungs frá Húsavík í heimsókn. Nú er um að gera að fjölmenna á völlinn enda útlit fyrir ágæist veður; róleg norðanátt og skjól og sól í stúkunni í um tíu stiga hita.

Sumarvertíðin er greinilega að fara í gang hjá Drangeyjarferðum því í dag mátti sjá nokkuð sérstaka sjón í Sauðárkrókshöfn þar sem togarinn Drangey SK2 togaði Drangeyjarbryggja upp í rennuna sem vanalega geymir troll.

„Að loknum fyrstu þremur leikjunum eru einkenni liðsins þegar farin að sjást. Við erum að verða lið sem vill stjórna leikjum með boltann, en erum óþreytandi að vinna án hans og gefa andstæðingnum engan frið,“ segir Dominic Furness þjálfari Kormáks/Hvatar þegar Feykir spurði hann út í lið Húnvetninga sem leikur nú þriðja tímabil sitt í 2. deild Íslandsmótsins í knattspyrnu.

Þar sem allt fallegt er Feyki viðkomandi þá flytjum við þær fréttir að lið Arsenal varð enskur deildarmeistari í knattspyrnu karla í gærkvöldi. Stuðningsmenn liðsins hafa beðið í 22 ár eftir því að hampa titlinum og töluverður hluti leikmanna var ekki fæddur þegar Arsenal fór taplaust í gegnum tímabilið 2003-2004. Og sigurtilfinningin er góð – takk fyrir.

Tíu ára sonur Elísu Óskar Ómarsdóttur á Gili í Skagafirði og átta ára frændi hans römbuðu á torkennilegan hlut í vikunni við Miklavatn. Í frétt á Vísi.is segir að Elísa hafi fyrst ekki vitað hvað var um að ræða en eftir að hún leitaði á netinu brá henni heldur í brún þegar niðurstöðurnar gáfu til kynna að um pólska eða þýska sprengju væri að ræða.

Tónlistarmaðurinn Ágúst Brynjarsson heldur tónleika á Blönduósi þriðjudaginn 26. maí klukkan 18, en hann er á tónleikaferðalagi um landið, undir yfirskriftinni Ágúst á ferðinni. Viðburðurinn er í boði Blönduvirkjunar og Húnabyggðar, og því er aðgangur ókeypis. Ágúst hefur nýverið gefið út plötu og tekur í sumar við hlutverki brekkusöngvara Þjóðhátíðar í Vestmannaeyjum. Í tengslum við ferðalagið hyggst hann heimsækja fjölmörg bæjarfélög og bjóða upp á tónlistardaga ásamt hljómsveit.