Fréttir

Byggingarfulltrúi Húnaþings vestra, Ólafur Jakobsson, hefur látið af störfum og fól byggðarráð sveitarstjóra að leita leiða til úrlausnar á verkefnum embættisins. Á fundi byggðarráðs Húnaþings vestra kemur kom fram að sveitarstjóri hafi kynnt tímabundna lausn á störfum fulltrúans.

Í lok mars lögðum við nokkrir þingmenn Samfylkingarinnar fram þingsályktunartillögu um nýja velferðarstefnu fyrir aldraða. Þar er lagt til að snúið verði frá ríkjandi viðhorfum í þjónustu við aldraða og markvisst horfið frá einhliða stofnanasýn. Með tillögunni er lögð höfuðáhersla á að hver einstaklingur eigi þess kost að búa á eigin heimili til æviloka með persónulegum stuðningsúrræðum við hæfi og samkvæmt eigin óskum.

Húni, ársrit Ungmennasambands Vestur-Húnvetninga, er kominn út, að þessu sinni 42. árgangur. Birtar eru fréttir síðasta árs úr öllum „gömlu sveitarfélögunum“ sem mynda Húnaþing vestra og minnst þeirra sem létust á síðasta ári á svæðinu. Einnig eru í ritinu frásagnir, ljóð og annar fróðleikur úr héraði.

Síðasta púsl í heimsmynd Kormáks Hvatar þetta sumarið hefur verið fundið og fellur sérlega vel að restinni. Skrifað hefur verið undir samninga við varnarmanninn Acai Elvira um að binda saman vörnina í sumar og kemur hann til móts við félaga sína nú innan skamms.

Lið Tindastóls í 1. deild kvenna í körfubolta á eftir að spila tvo deildarleiki áður en liðið hefur leik í úrslitakeppninni. Fyrri leikurinn verður í Síkinu annaðkvöld kl. 20:00 en þá taka stelpurnar á móti liði Ármanns.Síðan er útleikur á laugardaginn gegn Fjölni. Feykir hafði samband við Árna Eggert, þjálfara Stólastúlkna, og spurði út í markmið liðsins.

Fyrir skömmu var Skeifudagurinn á Hvanneyri haldinn hátíðlegur en að þessu sinni var honum streymt á vefnum vegna samkomutakmarkanna. Skeifudagurinn á sér langa sögu en Morgunblaðsskeifan var fyrst veitt við skólaslit Bændaskólans á Hvanneyri þann fjórða maí 1957. Vildi Morgunblaðið með þessu framtaki sýna hug sinn til þessarar fornu og fögru íþróttar, hestamennskunnar. Fjórir nemendur af Norðurlandi vestra sópuðu til sín verðlaunum.

Nýkrýndir deildarmeistarar Keflavíkur komu í Síkið í gær í 20. umferð Dominos-deildarinnar. Tindastólsmenn hófu leik með ágætum, voru yfir eftir fyrsta fjórðung en svo kom það bersýnilega í ljós að Keflavík er með langbesta liðið í deildinni því þó svo að þeir væru án Harðar Axels þá var tilfinningin sú að þeir væru alltaf með leikinn í höndum sér. Þegar upp var staðið fóru þeir dökkbláu heim með stigin tvö. Lokatölur 71-86.

Lengi vel var það svo að álitið var að hestamennskuhæfni væri meðfædd; sumir væru bornir reiðmenn en aðrir jafnvel klaufar og yrðu ekki annað. Vissulega er það svo að þeir sem ætla að ná færni á þessu sviði sem öðrum þurfa að búa yfir áhuga og elju og ákveðnum líkamlegum forsendum en að því gefnu gildir hið fornkveðna: Æfingin skapar meistarann.

Stólastúlkur brunuðu á Ísafjörð í gær þar sem þær léku við lið Vestra í 1. deild kvenna. Lið Ísfirðinga hafði aðeins hlotið tvö stig í leikjum vetrarins en lið Tindastóls hafði unnið fimm leiki af14. Raunar höfðu þær vestfirsku unnið annan leikinn í svokölluðum tvíhöfða hér á Króknum sl. haust en í kjölfar kófsins var leikjum í 1. deild kvenna fækkað og úrslitin í leiknum sem Vestri vann strikuð út. Þær voru því æstar í að næla í glötuðu stigin tvö en frábær tíu mínútna kafli Tindastóls seint í leiknum skóp fínan sigur gestanna. Lokatölur 64–73.

Það má með sanni segja að fólk hafi fengið að gleyma kórónu- og kóvídástandi um stund í gærkvöldi þegar tónleikar Huldu Jónasardóttur fóru fram í húsakynnum sýndarveruleika 1238 á Sauðárkróki. Nýr salur, ætlaður tónleikum og öðrum sviðsuppákomum, var þéttsetinn, innan sóttvarnareglna að sjálfsögðu, og lofar góðu upp á framhaldið.