Skagafjörður

Það ríkti gleði og kæti á jólatrésskemmtun í Fljótunum í gær. Vel var mætt að vanda en löng hefð er fyrir því að halda þessa skemmtun strax að lokinni jólamessu í Barðskirkju.

Nemendur Grunnskólans austan Vatna hafa verið hvattir til taka þátt í lestrarbingói Heimila og skóla í jólafríinu. Á heimasíðu skólans segir að mikilvægur liður í lestrarnámi og þjálfun barna séu reglulegar æfingar. Rannsóknir hafi sýnt að nemendur sem ekki lesa í skólafríum lesi hægar eftir frí heldur en áður en þeir fóru í frí.

Hið árlega Jólabarnaball Lions á Sauðárkróki verður haldið á sal Fjölbrautaskólans klukkan 17 á morgun, miðvikudaginn 28. Desember. Að vanda eru allir hjartanlega velkomnir, börn og fullorðnir.

23. jólamót Molduxa í körfubolta hófst í morgun. 18 lið eru skráð til keppni og verður leikið viðstöðulaust fram á seinniparts dags þegar úrslit liggja fyrir. Áður en mótið var sett var Samfélagsviðurkenning Molduxa veitt í annað sinn. Að þessu sinni var það Rannveig Lilja Helgadóttir sem hlaut þann heiður en hún hefur verið ötul í íþróttastarfi í Skagafirði og komið víða við. Meðal annars hefur Rannveig gegnt starfi formanns sunddeildar Tindastóls, gjaldkeri skíðadeildar Tindastóls í um tvo áratugi, var meðal annarra stofnandi fimleikadeildar innan Tindastóls, sem reyndar er ekki starfandi lengur.

Rithöfundurinn Brynja Sif Skúladóttir hefur skrifað sögur um Nikký sem nú er orðin orðin 12 ára gömul og ætlar ein til Sviss þar sem föðurfjölskylda hennar vinnur við stóran sirkus. Bókin er sjálfstætt framhald af bókinni um Nikký og slóð hvítu fjaðranna og verður eflaust spennandi kostur í jólapakkana þessi jólin. Brynja Sif rekur ættir sínar í Skagafjörðinn og segir að pabbi hennar, Skúli Br. Steinþórsson, hafi sagt að nafli alheimsins væri þar og þess vegna var hún send í sveit í Skagafjörð. Feykir fékk Brynju til að segja frá sveitinni, Nikký og sjálfri sér í Sviss.

23. jólamót Molduxa í körfubolta verður haldið á morgun, annan dag jóla, í íþróttahúsinu á Sauðárkróki. Mótið verður sett með veitingu Samfélagsviðurkenningar Molduxa kl. 10:55 og fyrstu leikir flautaðir á stundvíslega kl. 11:00. Keppt verður í einum flokki, og raðast lið saman eftir styrkleika strax að lokinni fyrstu umferð. Alls hafa 17 lið skráð sig til keppni svo það er ljóst að mikið verður að gerast. Meistaraflokkur Tindastóls sér um dómgæslu og yngri flokkar sjá um ritaraborðin.

Í dag, jóladag, verða hátíðarguðþjónustur víða í skagfirskum kirkjum. Klukkan 13:00 hefst guðþjónustan í Goðdalakirkju, organisti Thomas R. Higgerson en Ingibjörg Rós Jónsdóttir syngur einsöng. Í Hóladómkirkju hefst hún kl 14:00 og verður boðið upp á messukaffi á biskupssetrinu eftir guðsþjónustu. Í Fellskirkju verður einnig hátíðarguðsþjónusta kl 14 í dag, jóladag.

Feykir óskar landsmönnum öllum, til sjávar og sveita, gleðilegra jóla og farsældar á ári komanda með þökk fyrir samfylgdina á árinu sem er að líða.

Eins og undanfarin ár stendur Feykir fyrir kjöri á manni ársins. Gefst íbúum á svæðinu og öðrum lesendum Feykis kostur á að velja úr hópi þeirra sem tilnefndir voru af lesendum. Í þetta skiptið bárust sjö tilnefningar. Hægt verður að greiða atkvæði á vefnum Feyki.is eða senda atkvæði í pósti á Feykir, Borgarflöt 1, 550 Sauðárkróki. Kosningin hófst kl. 13 föstudaginn, 23. desember og lýkur kl. 12 á hádegi á nýársdag, 1. janúar.

Í dag klukkan 18:00 verður aftansöngur í Sauðárkrókskirkju, Edda Borg Stefánsdóttir mun syngja einsöng. Hún mun einnig sjá um einsöng í miðnæturmessu í sömu kirkju klukkan 23:30 í kvöld. Þá verður hátíðarmessa í Glaumbæjarkirkju kl 2130 og Víðimýrarkirkju kl: 23:00.