Skagafjörður

Verðandi endurnýtingarmiðstöð á Hofsósi hafði nýverið opið hús þar sem áhugasamir gestir gátu litið við og séð hvernig þær Verðandakonur, Solveig Pétursdóttir og Þuríður Helga Jónasdóttir, hafa komið sér fyrir í litla húsinu Þangstöðum sem þær fengu afhent fyrir rétt rúmu ári síðan. Þar hafa þær útbúið aðstöðu til að taka á móti og endurbæta eða endurvinna hvers kyns hluti sem þjónað hafa hlutverki sínu hjá fyrri eigendum en gætu gengið í endurnýjun lífdaga í þeirra höndum. Einnig bjóða þær upp á aðstöðu og tæki fyrir þá sem vilja koma og dytta að gömlum munum eða skapa eitthvað nýtt. Verkfærasafn þeirra er smám saman að stækka en þær segjast taka með ánægju á móti smíða- og saumaáhöldum ef fólk þarf að rýma til í geymslunni.

Nú styttist í Mottumars, árlega vitundarvakningu Krabbameinsfélagsins um krabbamein hjá körlum. Í ár endurvekjum við Mottukeppnina. Með henni sýna karlar samstöðu sem skiptir öllu máli. Þriðji hver karlmaður getur því miður reiknað með að greinast með krabbamein á lífsleiðinni og hinir tveir eru feður, bræður, synir og vinir.

Það voru þau Hrefna Dögg Þorsteinsdóttir og Guðmundur Henry Stefánsson á Skagaströnd sem sáu um matarþátt Feykis í 47. tbl. Feykis í desember árið 2018. Þau gáfu lesendum uppskriftir að nokkrum partýréttum sem klikka aldrei. „Fyrsti rétturinn er frá Maju vinkonu,“ sagði Hrefna Dögg, „ég smakkaði hann fyrst þegar ég var hjá henni á áramótunum og tengi ég hann því alltaf við áramótin. Þetta er fljótlegt og ofureinfalt og er gert við hvert tækifæri hjá okkur.“

Stefán Vagn Stefánsson, yfirlögregluþjónn hjá Lögreglunni á Norðurlandi vestra og forseti sveitarstjórnar Sveitarfélagsins Skagafjarðar með meiru, hefur haft í nógu að snúast síðasta árið. Hann er Króksari í húð og hár, fæddur 1972, yngstur þriggja systkina og alinn upp í Suðurgötunni, sonur Hrafnhildar Stefánsdóttur og Stefáns Guðmundssonar alþingismanns, eða bara Lillu Stebba og Stebba Dýllu eins og þau voru kölluð á Króknum. Knattspyrnuáhuginn var fyrirferðarmikill frá fyrstu tíð og Stefán Vagn fór vanalega um bæinn á sínum yngri árum með markmannshanskana á lofti – í Tindastólsgallanum að sjálfsögðu – og endaði sem aðalmarkvörður hjá Tindastóli.

Sigrún Margrét Einarsdóttir er lítil stúlka sem fæddist þann 3. september síðastliðinn á Landspítalanum við Hringbraut. Sigrún Margrét er fyrsta barn foreldra sinna, þeirra Jónu Kristínar Vagnsdóttur frá Minni-Ökrum í Skagafirði og Einars Ara Einarssonar frá Skagaströnd, og er litla fjölskyldan búsett á Minni-Ökrum.

Það er ljóst að flestra sveitarfélaga á Norðurlandi vestra bíði þau örlög að sameinast einhverju öðru ef þingsályktunartillaga samgöngu- og sveitarstjórnarráðherra nær fram að ganga en þar er lagt til að lágmarksfjöldi íbúa hvers sveitarfélags á landinu verði hækkaður í 1000 manns fyrir árið 2026. Lagt er til að ekki verði hægt að bera sameiningu sveitarfélaga undir atkvæðagreiðslu þar sem lagðar eru til ýmsar breytingar sem miða að því að draga úr lagahindrunum við sameiningar.

ÍSLAND, grát þitt gæfuleysi, grát það tjón og örlög hörð. Svo hljóða upphafslínur kvæðis Páls Jónssonar um aftöku Jóns Arasonar biskups – þann 7. nóvember 1550. Kvæðið var ort í upphafi tuttugustu aldar – þegar Hólabiskup var orðinn sjálfstæðishetja og Íslendingar horfðu fram á fullveldi og síðan stofnun lýðveldis. En – ef litið er framhjá sjálfstæðispólitík – hve mikið er til í því að ástand lands og þegna hafi versnað eftir fall Jóns og síðan siðaskipti?

Matgæðingur í 46. tbl. Feykis árið 2018 var Hallgrímur Valgeir, eða Halli Valli, sem býr á Hvammstanga ásamt konu sinni, Linu Yoakum sem er frá Litháen, og syninum Maximus. Hallgrímur sagði að þau hefðu gaman af að elda alls kyns mat og gaf hann okkur spennandi uppskriftir af rauðrófusúpu og lambaskönkum.

Skagfirski varnarjaxlinn Loftur Páll Eiríksson, sem leikið hefur með liði Þórs Akureyri síðustu árin, hefur skipt úr Lengju-deildinni upp í Pepsi Max en hann gekk í dag, samkvæmt frétt á mbl.is, frá félagaskiptum yfir í lið Leiknis Reykjavík. Leiknismenn hafa ekki leikið í efstu deild síðan sumarið 2015 en þeir voru í öðru sæti Lengju-deildarinnar þegar tímabilið var flautað af fyrir síðustu áramót.

Eftir fimm vikna æfingatörn frumsýnir Nemendafélag Fjölbrautaskóa Norðurlands vestra (NFNV) söngleikinn Footloose í Bifröst í næstu viku og brýtur þar með ísinn sem Covid-ástandið frysti og lagði yfir allt leiklistarstarf í Skagafirði síðustu tvö misseri. Sóttvarnir eru þó hafðar í heiðri, tveggja metra reglan og grímuskylda.