Skagafjörður

Þann 1. september kl. 14 komu tíu félagar Veðurklúbbsins á Dalbæ saman til fundar og fóru yfir síðasta spágildi. Samkvæmt skeyti frá Dalvík voru þeir allir mjög sáttir með hvernig veðrið gekk eftir. Í skeyti Dalbæinga kviknaði ríkjandi tungl þann 19. ágúst sl. en nýtt tungl kviknar þann 17. september kl 11 í suðaustri.Telja veðurspámenn september verða mildan en vætusaman.

Í dag klukkan 18 mun Hrafnhildur Ýr Víglundsdóttir setja í loftið fyrsta þáttinn af Verkfærakassanum þar sem hún mun skoða ýmsar áhugaverðar leiðir til sjálfshjálpar, leiðir sem oft hafa talist óhefðbundnar eða fyrir utan normið. Leiðir sem af mörgum teljast framandi og jafnvel í sumum tilfellum forboðnar eða furðulegar. Þátturinn er á vegum verkefnisins Þú skiptir máli sem er forvarnaverkefni gegn einelti, fíkn og sjálfsskaða eða sjálfsvígum.

Landssamtök sauðfjárbænda skora á stjórnir og stjórnendur sláturleyfishafa að birta afurðaverð fyrir sauðfjárframleiðslu haustsins 2020 þegar í stað en engin verð hafa verið gefin út af þeirra hendi þrátt fyrir að sláturtíð sé víða hafin. Í áskorun samtakanna segir að verði ekki veruleg leiðrétting á verði til bænda þurfi að fylgja þeirri ákvörðun gild rök. Landssamtök sauðfjárbænda skora jafnframt á sömu aðila að gefa samhliða út raunhæfa áætlun um stefnu fyrirtækisins varðandi afurðaverð sauðfjárafurða til næstu tveggja ára með eðlilegum fyrirvörum.

Ekkert verður af Sæluviku sem ráðgert hafði verið að halda í lok september þar sem atvinnu-, menningar- og kynningarnefnd ákvað á fundi sínum í gær að aflýsa henni. Segir á heimasíðu Sveitarfélagsins Skagafjarðar að þyngst vegur í þeirri ákvörðun hertar sóttvarnaraðgerðir almannavarna og ekki fyrirséð hvenær þeim verður aflétt.

Undirbúningur sem snýr að framkvæmd kaupa á bóluefni gegn Covid-19 er hafinn í vinnuhópi sem heilbrigðisráðherra skipaði 26. ágúst síðastliðinn og er verið að skoða hvaða leiðir eru færar í þessum efnum. Á heimasíðu stjórnarráðsins kemur fram að fyrir liggur að kaup Íslands á bóluefnum gegn COVID-19 munu fara fram á grundvelli samninga Evrópusambandsins við lyfjaframleiðendur, líkt og kynnt var á fundi ríkisstjórnarinnar síðastliðinn föstudag.

Í gær var haldið upp á þau tímamót í Sauðárkróksbakaríi að 140 ár eru liðin frá því að brauðgerð var sett á laggirnar á Sauðárkróki. Hefur verið bakað á Króknum óslitið síðan. Í tilefni dagsins var 30% afsláttur af öllu bakkelsi, brauði, kaffi, kæli- og gjafavöru í bakaríinu væna við Aðalgötuna. Bakarameistarinn Róbert Óttarsson var bljúgur þegar Feyki heyrði í honum í morgun en fjöldi fólks heimsótti bakaríið á afmælisdaginn og líf í tuskunum. Opnuviðtal er við Róbert í Feyki dagsins.

Það er ekki bjart framundan í veðrinu því spáð er vaxandi norðanátt á morgun með rigningu á norður- og austanverðu landinu og slyddu eða snjókomu til fjalla um kvöldið og segir í athugasemd veðurfræðings á heimasíðu Veðurstofunnar að færð gæti því spillst á fjallvegum annað kvöld. Einnig er spáð hvössum vindstrengjum undir Vatnajökli og á Austfjörðum annað kvöld, sem getur reynst varasamt ökutækjum með aftanívagna.

Það var heilmikill hasar og dúndrandi dramatík á Sauðárkróksvelli í gærkvöldi þegar Tindastóll og Álftanes mættust í 3. deildinni. Það er búið að vera hálfgert skrölt á Stólunum síðustu vikur og alveg nauðsynlegt að krækja í stigin þrjú sem í boði voru. Álftnesingar, sem sitja í neðsta sæti deildarinnar, reyndust hins vegar sýnd veiði en ekki gefin. Liðin í 3. deild eru ansi jöfn að getu og það vinnst enginn leikur fyrirfram í þessari deild. Luke Rae poppaði upp með sigurmark á síðustu stundu fyrir lið Tindastóls og lokatölur 3-2 í fjörugum leik.

,,Á Íslandi er lýðræði” og þar með er málið afgreitt og þarf ekki að ræða frekar, meirihlutinn ræður – eða er það ekki annars? Vangaveltur fagfólks, umræða og nánari skoðanir hafa leitt í ljós að þetta er hreint ekki alveg svona einfalt og vaxandi fjöldi fólks er orðin efins, ekki síst vegna aukinnar misskiptingar, ójafnræðis og forgangsröðunar sem augljóslega geta ekki talist til hagsbóta fyrir meirihlutann.

Brunavarnir Skagafjarðar hafa tekið í notkun nýjan sjúkrabíl, en um er að ræða einn af 25 bílum sem Rauði krossinn er að afhenda um þessar mundir. Á Facebooksíðu Brunavarna segir að starfsmenn hafi verið að koma fyrir búnaði af ýmsu tagi í bílnum og að óhætt sé að segja að útkoman sé stórgóð.