Fréttir

Þriðja umferð í 2. deild karla hófst í gær og hélt lið Tindastóls suður í Garð þar sem þeir öttu kappi við spræka Víðispilta. Heimamenn náðu undirtökunum snemma leiks og ljóst í hálfleik að Stólarnir þyrftu að skora minnst þrjú mörk í síðari hálfleik til að fá eitthvað út úr leiknum. Það hafðist ekki og 3-0 tap staðreynd.

Kristín Sigurrós Einarsdóttir, sem þá var grunnskólakennari við Grunnskólann austan Vatna á Sólgörðum í Fljótum, svæðisleiðsögumaður og fyrrum blaðamaður hjá Feyki, leyfði okkur að skyggnast aðeins í bókaskápinn sinn í fermingarblaði Feykis 2018. Eins og gefur að skilja er Dalalíf Guðrúnar frá Lundi í miklu uppáhaldi hjá henni en hún setti upp á Sauðárkróki, ásamt Marín Guðrúnu Hrafnsdóttur, sýninguna Kona á skjön sem fjallaði um ævi og störf Guðrúnar og hefur sýningin verið sett upp á nokkrum stöðum á landinu síðan.

Það að verða faðir krefst mikillar ábyrgðar en færir okkur jafnframt mikla gleði. Við þekkjum þetta með bleyjuskipti, pelagjafir og hvað þetta heitir nú allt saman. Þarna erum við að tala um kornabörn að sjálfsögðu og umönnun þeirra. Þegar fram líða stundir og börnin eldast kemur önnur samfélagsleg krafa til sögunnar. Krafa sem flestir geta staðið undir en þarfnast stefnumörkunar og áætlanagerðar. Það er nefnilega enginn pabbi með pöbbum nema kunna skil á því sem bókmenntafræðingar kalla „pabbabrandarar.“

Ásmundur Einar Daðason, félags- og barnamálaráðherra, átti fund með félagsmálastjórum allra sveitarfélaga landsins í Skagafirði í dag. Þar var farið ítarlega yfir vinnu er varðar málefni barna sem fer fram í félagsmálaráðuneytinu um þessar mundir.

Sveitarstjórn Húnaþings vestra tók fyrir á fundi sínum þann 9. maí sl. bókun byggðarráðs frá 6. þ.m. varðandi verkefni þverpólitískrar nefndar um stofnun þjóðgarðs á miðhálendinu, mál nr. S-111/2019. Leggst sveitarstjórn gegn fyrirliggjandi drögum og hvetur til að þau verði endurskoðuð í mun nánara samstarfi við heimamenn en gert hefur verið.

Ásmundur Einar Daðason, félags- og barnamálaráðherra, undirritaði í gær tvo samninga við annars vegar Húnaþing vestra og hins vegar Blönduós vegna móttöku flóttafólksins sem komið er frá Sýrlandi en um er að ræða níu fjölskyldur, samtals 43 einstaklinga. Ætlunin er að um helmingur þeirra setjist að á Hvammstanga og um helmingur á Blönduósi. Fólkið er hingað komið fyrir tilstuðlan íslenskra stjórnvalda og Flóttamannastofnunar Sameinuðu þjóðanna.

Í gærkvöldi komu fimmtán sýrlenskir flóttamenn til Blönduóss þar sem stuðningsfjölskyldur þeirra biðu hópsins og buðu fólkið velkomið. Rætt er við Guðrúnu Margréti Guðmundsdóttur, verkefnastjóra hjá Rauða krossinum, á fréttavefnum vísir.is í dag en hún var tekin tali þar sem hún var á leið út á Keflavíkurflugvöll í gærkvöldi til að taka á móti hópnum ásamt Valdimar O. Hermannssyni, bæjarstjóri Blönduósbæjar, Þórunni Ólafsdóttur sem ráðin var sem verkefnastjóri Blönduósbæjar vegna komu flóttamannanna og Kinan Kadoni, túlki og menningarmiðlara.

Sveitarfélagið Skagafjörður vekur athygli á því á vef sínum að varptími fugla er hafinn og eru hunda- og kattaeigendur beðnir að taka tillit til þess. Kattaeigendur eru beðnir að halda köttum sínum innandyra á nóttunni og hengja bjöllur á hálsólar þeirra. Kettir eru öflug dýr og geta þeir haft neikvæð áhrif á stofn fugla sem verpa í nágrenni við mannabústaði ár hvert og því er mikilvægt að kattaeigendur fylgist með köttum sínum yfir varptíma fugla og á meðan ungar eru að verða fleygir. Einnig eru hundaeigendur beðnir um að sleppa ekki hundum sínum lausum á varpsvæðum.

Á forsíðu nýjasta tölublaðs Bændablaðsins sem út kom í dag er rætt við Jón Númason, bónda og minkaveiðimann á Þrasastöðum í Fljótum um uppgang villiminks í Skagafirði. Að sögn Jóns hefur minki úti í náttúrunni fjölgað mikið undanfarin ár og sé hann að verða stærri og öflugri en áður var. Telur hann að ástæðuna megi fyrst og fremst rekja til þess að minkaveiðum sé ekki sinnt sem skyldi enda séu þær ekki ýkja vel launaðar.

Á fundi byggðaráðs Blönduósbæjar í upphafi viku voru opnuð tilboð í fyrsta áfanga verknámshúss við Blönduskóla. Lægstbjóðendur voru Húsherji, N1 píparinn og Tengill. Um lokað útboð á byggingu verknámshúss við Blönduskóla var að ræða og var á fundinum farið yfir þau tilboð sem bárust. Samþykkt var að ganga til viðræðna við lægstbjóðendur í eftirtalda liði samkvæmt útboði: