Fréttir

Körfuboltaaðdáendur þurfa ekki að bíða lengur eftir að komast á leik því Tindastóll fær Skallagrím í heimsókn í æfingaleik í kvöld. P. J. Alawoya er kominn aftur til liðsins en hann átti ágætt tímabil í fjarveri Urald King fyrir áramót. Helgi Freyr Margeirsson, aðstoðarþjálfari, segist vonast til þess að leikurinn verði forsmekkurinn á nýju upphafi, ef svo megi að orði komast, þar sem liðið er að sigla inní lokaátökin í Dominosdeildinni áður en Úrslitakeppnin hefst.

Sveitarfélög sem tóku þátt í forvali Fjarskiptasjóðs vegna átaksverkefnisins Ísland ljóstengt hafa fengið tilboð um samtals 450 milljón króna styrki vegna ársins 2019, ásamt vilyrði um frekari styrki vegna áranna 2020 og 2021 eftir atvikum, með fyrirvara um fjárlög. Fjórtán sveitarfélög eiga nú jafnframt kost á sérstökum byggðastyrk, samtals 150 milljónum króna og fá Húnaþing vestra og Sveitarfélagið Skagafjörður tíu milljónir hvort í sinn hlut.

Sveitarstjórn Blönduósbæjar hefur óskað eftir samstarfi vð Skagaströnd við lausn á húsnæðismálum fyrir hóp flóttafólks sem væntanlegur er til Blönduóss innan tíðar en ákveðið hefur verið að 50 sýrlenskir flóttamenn komi til Blönduóss og í Húnaþing vestra um mánaðamótin apríl-maí.

Brunavarnir Skagafjarðar voru ræstar út í nótt vegna elds sem kom upp á bílaverkstæði K.S í Kjarnanum á Sauðárkróki. Líklegt er talið að upptök eldsins eigi rætur að rekja í tæki, sem prófar ljósabúnað ökutækja og læst sig í hlið flutningavagns sem stóð hjá. Á Facebooksíðu Brunavarna Skagafjarðar kemur fram að slökkvistarf hafi gengið greiðlega fyrir sig og var húsið reykræst í framhaldi.

Leikið var í 1. deild kvenna á Króknum í gær þegar topplið Fjölnis úr Grafarvogi mætti Stólastúlkum í Síkinu. Leikurinn var ágæt skemmtun þar sem lið Tindastóls gaf toppliðinu lítið eftir og nokkur góð áhlaup héldu spennu í leiknum. Svo fór þó að lokum að liðsheild getanna reyndist sterkari og unnu þær sigur í Síkinu, lokatölur 68-73.

Búnaðarsamband Skagfirðinga mun standa fyrir fræðsludegi föstudaginn 22. febrúar að Löngumýri í Skagafirði og munu umhverfismál verða þar efst á baugi. Kolefnisspor og plastmengun er meðal þess sem verið hefur fyrirferðarmikið í umræðunni undanfarið. Markmið fundarins er að skoða þessi mál útfrá sjónarhóli bænda og skapa umræðu um það hvernig megi bregðast við.

Á fundi sveitarstjórnar Húnaþings vestra í síðustu viku var fjallað um eignarhald á Félagsheimilinu á Hvammstanga og framtíð þess. Í bókun fundarins kemur fram að undanfarnar vikur hafi verið unnið að því í samstarfi við lögfræðing og endurskoðanda sveitarfélagsins að það yfirtaki stjórn félagsheimilisins í samræmi við stefnu meirihluta sveitarstjórnar.

Meistaramót Íslands í fjölþrautum frjálsíþrótta innanhúss, fór fram í Laugardalshöllinni í Reykjavík dagana 16.-17. febrúar. Keppt var í sjöþraut karla og fimmtarþraut kvenna, og einnig í flokkum pilta 18-19 ára, 16-17 ára og 15 ára og yngri, og í flokkum stúlkna 16-17 ára og 15 ára og yngri. Sagt er frá því á heimasíðu Tindastóls að Ísak Óli Traustason Tindastól/UMSS hafi staðið sig frábærlega í keppninni, náð sínum besta árangri í fjórum af greinunum sjö, og einnig samanlagt í stigakeppninni og uppskorið Íslandsmeistaratitil í sjöþraut.

Blönduósbær auglýsir á vef sínum eftir viðburðastjóra sem m.a. er ætlað að hafa það hlutverk með höndum að stjórna og sjá um Húnavöku og útgáfu kynningarefnis fyrir hátíðina. Í auglýsingu á vef sveitarfélagsins segir að leitað sé eftir áhugasömum aðila, með þekkingu og reynslu af viðburðarstjórnun, til að stjórna viðburðum í sveitarfélaginu, m.a. bæjarhátíðinni Húnavöku, sem haldin verður dagana 18.-21. júlí nk. Húnavaka er opin öllum og samanstendur m.a. af fjölskylduskemmtun, dansleikjum, söngvakeppni og kvöldvöku. Um er að ræða tímabundna ráðningu með möguleika á framlengingu til lengri tíma. Umsóknarfrestur er til 5.mars 2019.

Ratsjáin, nýsköpunar- og þróunarverkefni Íslenska ferðaklasans og Nýsköpunarmiðstöðvar Íslands, var sett af stað með formlegum hætti á Blönduósi þann 12. febrúar sl. Að þessu sinni taka fulltrúar frá sex fyrirtækjum sem starfa í ferðaþjónustu á Norðurlandi vestra þátt í verkefninu.