Fréttir

Átjanda umferðin í 2. deild karla í knattspyrnu var leikin í dag. Stólarnir fengu það strembna verkefni að heimsækja Vestra á Ísafirði en lærisveinar Bjarna Jóh eru í toppbaráttu deildarinnar, enda með vel skipað lið en þar eru m.a. átta erlendir leikmenn. Þrátt fyrir að spila einum færri megnið af leiknum náðu Stólarnir í dýrmætt stig í fallbaráttunni en lokatölur voru 1-1.

„Okkur hjónunum þykir mjög skemmtilegt að bjóða í mat og er það yfirleitt karlpeningurinn sem eldar á þessum bæ,“ segja margæðingar vikunnar í 31. tbl. Feykis 2016, þau Birkir Þór Þorbjörnsson og Elísabet Eir Steinbjörnsdóttir á Hvammstanga. Þau buðu upp á uppskriftir af íslenskri kjötsúpu og franskri súkkulaðiköku.

Undanfarna daga hafa staðið yfir framkvæmdir við skíðasvæðið í Tindastól þar sem verið er að setja upp tíu möstur við nýja lyftu. Með tilkomu hennar mun aðstaðan gjörbreytast og til verða lengstu skíðabrekkur á landinu.

Kvennalandsliðið í júdó ætlar að dvelja saman á Sauðárkróki um helgina og æfa þar undir stjórn landsliðsþjálfara kvenna í íþróttinni, Önnu Soffíu Víkingsdóttur.

„Já ég á von á því að sveitarfélagið óski eftir viðræðum við ríkisvaldið um að opinberum störfum í Skagafirði verði fjölgað á næstu árum,“ segir Sigfús Ingi Sigfússon nýr sveitarstjóri Sveitarfélagsins Skagafjaðar. Sigfús var gestur Karls Eskils Pálssonar í þættinum Landsbyggðum á sjónvarpsstöðinni N4 í gærkvöldi. Í þættinum var rætt vítt og breitt um málefni sveitarfélagsins á komandi kjörtímabili.

Lag Bjartmars Guðlaugssonar um mömmu sem beyglar alltaf munninn og pabba sem yngist upp um 18 ár kom út á þriðju plötu hans Í fylgd með fullorðnum. Hún náði því að vera í öðru sæti yfir mest seldu plötur ársins 1987 enda lögin um týndu kynslóðina, þann sem er ekki alki og Járnkallinn hljómuðu oft og iðulega í viðtækjum landsmanna.

Norðurlands Jakinn, keppni sterkustu manna landsins, er aflraunakeppni sem fram fer á Norðurlandi þessa dagana. Norðurlandsjakinn er keppni í anda Vestfjarðarvíkingsins þar sem keppt er í einni grein í bæjarfélögum víðsvegar í landsfjórðungnum.

Feykir forvitnaðist í fyrrasumar um upplifun nokkurra þeirra erlendu fótboltakempna sem spiluðu með Tindastóli. Útlendingarnir eru talsvert færri í sumar en Feykir ákvað engu að síður að taka upp þráðinn. Að þessu sinni er það Úrúgvæinn Santiago Fernandez, 27 ára, sem svarar. Hann gekk til liðs við Stólana í vor og hefur staðið sig með sóma í marki liðsins í sumar og hefur reyndar haft talsvert að gera þar.

Auglýst hefur verið laust til umsóknar starf verkefnastjóra í atvinnu-, menningar- og kynningarmálaum hjá Sveitarfélaginu Skagafirði en það losnaði þegar Sigfús Ingi Sigfússon var ráðinn sveitarstjóri. Starfshlutfall er 100% og æskilegt að umsækjandi geti hafið störf sem fyrst.

Í gær, 22. ágúst, var úthlutað styrkjum úr Menningarsjóði Kaupfélags Skagfirðinga en veittir voru styrkir til 22 verkefna. Bjarni Maronsson, stjórnarformaður KS, sagði í upphafi athafnarinnar að þótt styrkirnir væru ekki háir væru þeir vonandi eitthvað sem kæmi í góðar þarfir og væri um leið viðurkenning á því menningarstarfi sem viðkomandi er að vinna. „Ég hef stundum sagt að menning sé allt sem gerir lífið bærilegra og það er skýring sem hugnast mér ákaflega vel,“ sagði Bjarni. Hann og Efemía Björnsdóttir afhentu styrkina en Þórólfur Gíslason, kaupfélgsstjóri, gat ekki verið viðstaddur að þessu sinni. Auk þeirra sitja í stjórn sjóðsins þau Einar Gíslason, og Inga Valdís Tómasdóttir.