Fréttir

Á morgun, föstudaginn 27. september klukkan 11:00, ætla nemendur 7. og 8. bekkjar í Blöndskóla að gera uppreisn gegn loftslagsbreytingum. Það hyggjast þeir gera með því að sleppa því að mæta í skólann og fara í kröfugöngu. Með þessu eru krakkarnirað feta í fótspor sænska aðgerðasinnans Gretu Thunberg sem hefur nú í rúmt ár farið í skólaverkfall á föstudögum í þeim tilgangi að berjast gegn loftslagbreytingum.

Átaksverkefninu Göngum í skólann, sem hófst 9. september, lauk sl. föstudag en markmið þess eru að hvetja börn til að tileinka sér virkan ferðamáta í og úr skóla og auka færni þeirra til að ferðast á öruggan hátt í umferðinni. Á heimasíðu Íþrótta- og Ólympíusambands Íslands, sem er einn þeirra aðila sem að verkefninu stendur, segir að ein einfaldasta leiðin til að auka hreyfingu í daglegu lífi sé að velja virkan ferðamáta, svo sem göngu, hjólreiðar, hlaup, línuskauta eða hjólabretti og ávinningurinn felist ekki aðeins í andlegri og líkamlegri vellíðan heldur sé þetta einnig umhverfisvæn og hagkvæm leið til að komast á milli staða.

Til stendur hjá SSNV að auglýsa eftir umsóknum í næsta skref rannsókna á hagkvæmni smávirkjana á Norðurlandi vestra, kallað Skref 2. Tilgangur smávirkjanasjóðs Norðurlands vestra er að styrkja fyrstu skrefin í rannsóknum á mögulegum rennslisvirkjunum undir 10 MW að stærð á Norðurlandi vestra.

Ákveðið var á fundi í veiðifélagi Blöndu og Svartár í gærkvöldi að gengið skyldi til samninga veiðifélagið Starir um leigu á laxveiði í Blöndu og Svartá að því að hermt er á veiðivefnum Vötn og veiði. Þar segir að samkvæmt tilboði Stara verði samið til fimm ára og samkvæmt góðum, en þó ónafngreindum heimildum, sé leiguverð í námunda við 60 milljónir. Veiðifélagið Starir leigir m.a. Þverá/Kjarrá, Víðidalsá, Brennuna, Straumana, Litlu-Þverá og Langadalsá við Djúp.

Undirbúningur meistaraflokka Tindastóls í körfunni stendur nú sem hæst og hafa æfingaleikir farið fram undanfarnar vikur. Í kvöld taka stelpurnar á móti Skallagrími í enn einum æfingaleiknum og hefst hann 20:00 í Síkinu.

Undanfarnar vikur hefur staðið yfir uppsetning á nýjum tækjabúnaði til framleiðslu á ferskum mozzarella í Mjólkursamlagi KS á Sauðárkróki. Samlagið hóf framleiðslu á þessum osti fyrir tæplega 20 árum og var því komin tími á endurnýjun tækja. Að sögn Jóns Þórs Jósepssonar, framleiðslustjóra MKS, kemur nýi búnaðurinn frá Ítalska fyrirtækinu ALMAC og voru aðilar frá þeim að prufukeyra búnaðinn og kenna starfsmönnum MKS handbrögðin í síðustu viku.

Haldið var upp á 40 ára afmæli Fjölbrautaskóla Norðurlands vestra síðasta laugardag og var öllum velunnurum skólans boðið til afmælisdagskrár á sal Bóknámshússins. Í tilefni tímamótanna fékk skólinn 10 milljón að gjöf frá KS. Að lokinni dagskrá var boðið upp á opið hús í öllu húsnæði skólans.

Aksturstími skólabifreiða um Vesturhóp hefur nú verið lengdur um 20 mínútur á hvorri leið að því er kemur fram í tilkynningu frá Grunnskóla Húnaþings vestra í morgun. Ástand vegarins er nú þannig að ekki er mögulegt að aka veginn nema mjög rólega og mun lengingin vara þar til lagfæringar hafa verið gerðar á veginum. Við þetta lengist heildartíminn sem skólabörn á svæðinu þurfa að vera í bílnum um 40 mínútur á dag.

Heilsudagar á Blönduósi hefjast í dag og standa til laugardags með fjölbreyttri heilsusamlegri dagskrá fyrir unga sem aldna. Markmið daganna er að hvetja íbúa til hreyfingar og að huga vel að heilsu sinni. Þessa daga verður frítt í alla tíma á vegum Íþróttamiðstöðvarinnar á Blönduósi en einnig verður boðið upp á skipulagða gönguferð, hjólaferð og sundlaugarpartý. Dagarnir eru haldnir í samstarfi við íþróttafélögin sem hvetja nýja iðkendur til að koma og prófa hinar ýmsu íþróttir gjaldfrjálst í vikunni.

Golfklúbbur Sauðárkróks hefur verið öflugur í starfi sínu í sumar og eignaðist m.a. tvo Norðurlandsmeistara þetta árið. Telma Ösp Einarsdóttir varð stigameistari í flokki 18-21 árs stúlka og Anna Karen Hjartardóttir í flokki 14 ára og yngri. Á heimasíðu GSS kemur fram að úrslit í holukeppni Golfklúbbs Sauðárkróks hafi ráðist í lok ágúst og varð Rafn Ingi Rafnsson holukeppnismeistari GSS árið 2019 en hann hafði betur í spennandi leik á móti Telmu Ösp Einarsdóttur.