Fréttir

Á vef Samtaka sveitarfélaga á Norðurlandi vestra, SSNV, segir frá því að samtökin taka þátt í alþjóðlegu samstarfsverkefni sem hlaut á dögunum styrk úr sjóði Norðurslóðaverkefna. Er því ætlað að taka á ýmsum áskorunum sem fyrirtæki á jaðarsvæðum kunna jafnan að glíma við, svo sem smæð markaðar, fjarlægð frá markaði og einangrun.

Rithöfundurinn og sagnamaðurinn Einar Kárason mun stíga á stokk í Félagsheimilinu á Blönduósi á morgun, þann 17. júlí kl. 20, og flytja Grettissögu.

Nú er síðasti dagur landsmótsins runninn upp. Dagurinn í gær var var hinn besti og létu menn veðrið ekki mikið á sig fá. Keppt var í fjölmörgum greinum og um kvöldið var svo skemmtikvöld með Geirmundi Valtýssyni og gríðarlega vel sótt Pallaball langt inn í nóttina að því er segir á vef landsmótsins.

Ferðamálafélag Húnaþings vestra hefur gefið út app eða smáforrit sem nefnist „Hunathing“. Hefur það að geyma allar helstu upplýsingar um Húnaþing vestra og þá þjónustu sem þar er í boði. Á vef Húnaþings vestra segir að tilgangur appsins sé „að auka jákvæða upplifun ferðamanna á svæðinu sem og að auðvelda þeim sem leiðsegja gestum um svæðið sitt."

Fjörið heldur áfram á Landsmóti og láta gestir rigninguna lítið á sig fá enda von til þess að stytti upp von bráðar. Dagurinn hófst með morgunjóga og æsispennandi keppni í 65 km götuhjólreiðum. Fjörið heldur svo áfram þar sem hver viðburðurinn rekur annan. Að sögn Pálínu Hraundal, verkefnisstjóra, eru margir enn að koma í þjónustumiðstöðina að sækja armbönd og er búist við miklu fjöri í allan dag.

„Sumarfrísdögum eyði ég gjarnan í gönguferðum og þá er mikilvægt að velja morgunverð og nesti sem stendur vel með manni," sagði Kristín S. Einarsdóttir sem sá um Matgæðinga Feykis í 27. tbl. ársins 2016. Kristín bætti við: „Í síðustu viku gekk ég með góðum hóp kvenna í Fljótunum. Við erum svo heppnar að í hópnum er matargæðingur af Guðs náð, Guðríður Skagfjörð Sigurðardóttir. Ég ætla deila hér með lesendum saðsömum samlokum og matarmiklum múffum sem hún bauð okkur upp á."

Nú um helgina verður haldin sýning í Deiglunni á Akureyri í tilefni þess að liðin eru tíu ár frá því að Nes listamiðstöð á Skagaströnd opnaði. Á þessum tíu árum hafa um 750 listamenn frá 45 löndum heimsótt listamiðstöðina og unnið þar að listsköpun sinni. Til að fagna tímamótunum hafa 77 fyrrverandi gestalistamenn gefið verk á sýninguna. Rætt var við Signýju Richter á Skagaströnd í Fréttablaðinu í gær en hún hefur verið í stjórn Ness frá upphafi.

Sveitarfélagið Skagafjörður hefur lokið við að skipa í helstu ráð og nefndir þess en á miðvikudag fundaði Skipulags- og byggingarnefnd, seinust fastanefnda í þeim erindagjörðum. Formaður byggðaráðs og forseti sveitarstjórnar eru kosnir til eins árs í senn en í aðrar nefndir til fjögurra ára. Samstarfssamningur Framsóknar- og Sjálfstæðisflokks gerir ráð fyrir að flokkarnir skipti á milli sín formennsku í byggðaráði og sveitarstjórn, tvö ár í senn.

Nú er annar dagur Landsmótsins hafinn og hefur það farið vel af stað. Talsverður fjöldi fólks er mættur á Sauðárkrók til þess að taka þátt í viðburðum helgarinnar og á sá fjöldi væntanlega eftir að margfaldast þegar líður á daginn.

Á fundi landbúnaðarráðs Húnaþings vestra sl. miðvikudag var lagt fram bréf frá Vegagerðinni þar sem fram kemur að samþykkt hafi verið að úthluta 1,8 milljónum króna til styrkvega árið 2018. Skv. vegalögum nr. 80/2007 er heimilt að ákveða fjárveitingu í vegáætlun til að styrkja tilteknar samgönguleiðir sem ekki falla undir skilgreiningar vega skv. lögunum. Hér er um að ræða malarvegi sem taka við þar sem þjónustu Vegagerðarinnar lýkur, s.s. vegi yfir fjöll og heiðar sem ekki teljast þjóðvegir; vegi að ferðamannastöðum, vegi að jörðum sem farnar eru í eyði o.m.fl.