Fréttir

Félags- og tómstundanefnd Svf. Skagafjarðar afgreiddi á síðasta fundi sínum styrki að upphæð 480 þúsund til þriggja félaga og samtaka á Norðurlandi. Félag eldri borgara í Skagafirði fær hæsta styrkinn 280.000 krónur sem er hækkun um 30.000 krónur frá síðasta ári.

Húnahornið stendur fyrir vali á manni ársins 2017 í Austur-Húnavatnssýslu líkt og gert hefur verið undanfarin ár. Lesendur eru hvattir til að senda inn tilnefningu í gegnum þar til gerðan rafrænan atkvæðaseðil og getur hver og einn sent inn eina tilnefningu ásamt ástæðu tilnefningarinnar. Bæði er hægt að tilnefna einstaklinga og hópa.

Það var gríðarleg stemning í Síkinu í gærkvöldi þegar bikarmeistarar Tindastóll mættu á svæðið með nýfægðan Maltbikarinn. Stuðningsmenn Stólanna létu sig ekki vanta og troðfylltu áhorfendabekkina og samglöddust strákunum. Það er óhætt að segja að allir voru með á nótunum. Feykir mætti með myndavélina og afraksturinn er hægt að sjá hér fyrir neðan.

Það var þvílík veisla sem Tindastólsmenn buðu upp á í Laugardalshöllinni í dag þegar liðið bar sigurorð af meistaraliði KR og vann þar með fyrsta stóra titilinn í sögu Tindastóls. Allir leikmenn voru uppnumdir af leikgleði, jákvæðni, baráttu og ekki síst samkennd þannig að það hljóta allir sem á leikinn horfðu að hafa smitast af smá krókódílarokki. Lið KR átti aldrei svar, aldrei séns, gegn Stólunum í dag. Tindastóll var yfir frá fyrstu mínútu og unnu að lokum annan stærsta sigurinn í sögu bikarúrslita KKÍ. Lokatölur 69-96.

Móttaka verður í Síkinu, íþróttahúsinu á Sauðárkróki, klukkan 21 í kvöld þegar bikarmeistarar Tindastóll mætir á svæðið með nýfægðan Maltbikar. Allir stuðningsmenn Stólanna eru hvattir til að mæta og fagna með strákunum sínum fyrsta stóra titli. ÁFRAM TINDASTÓLL!

TIL HAMINGJU TINDASTÓLL

Eins og fram kom í frétt í Feyki sl. fimmtudag náðu Olíuverzlun Íslands, bæjaryfirvöld á Sauðárkróki og Heilbrigðisnefnd norðurlands vestra samkomulagi um framlengingu á núverandi starfsleyfi Olís við verslun Haraldar Júlíussonar á Sauðárkróki. Eldsneytisafgreiðsla hófst því aftur í verslun Haraldar Júlíussonar en Heilbrigðisnefnd norðurlands vestra hafði um áramótin afturkallað leyfi verslunarinnar að selja eldsneyti.

„Á okkar heimili er nú oftast eldað af illri nauðsyn, ekki af því að okkur þyki eitthvað leiðinlegt að borða, heldur af því að við höfum ekkert sérstaklega gaman af að elda. Stundum brettum við þó upp ermarnar og eldum eitthvað þokkalega gott. Við skulum nú ekkert vera að tíunda hvort okkar sér frekar um eldamennskuna, sumum þykir bara einfaldlega meira gaman að ganga frá en öðrum!“ segja matgæðingarnir Fríða Eyjólfsdóttir og Árni Eyþór Bjarkason á Hofsósi sem voru matgæðingar vikunnar í öðru tölublaði ársins 2016.

Forysta Bændasamtaka Íslands heldur í fundaferð um landið í næstu viku. Með í för verða fulltrúar frá Ráðgjafarmiðstöð landbúnaðarins sem munu meðal annars ræða um fagmennsku í greininni, framtíðarsýn og þróun ráðgjafarþjónustu. Alls eru skipulagðir 18 almennir bændafundir, víðsvegar um landið og hefjast þeir á næsta þriðjudag.

Næstkomandi miðvikudag, þann 17. janúar, er boðað til almenns íbúafundar á Blönduósi þar sem kynnt verður tillaga að verndarsvæði í byggð á Blönduósi. Er þetta annar íbúafundurinn sem haldinn er vegna verkefnisins. Hann verður í Félagsheimilinu á Blönduósi og hefst klukkan 17:00.