Fréttir

Á næstu þremur árum gætu skapast 30 ný störf á Blönduósi þegar gagnaver Borealis Data Center taka þar til starfa. „Þumalputtareglan er að fyrir hvert megavatt orku verði til eitt starf í fyrirtækinu sjálfu og hálft annað afleitt starf,“ segir Arnar Þór Sævarsson sveitarstjóri í samtali við Morgunblaðið á miðvikudaginn en reiknað er með að gagnaverin þurfi á 15 megavöttum að halda.

„Hvernig líður þér þegar þú horfist í augu við alla neysluna, þegar dótið sem við gefum börnunum okkar hrannast upp allt í kringum okkur? Hvaða skilaboð erum við að senda þeim og hvers konar framtíð viljum við búa þeim? Erum við að byggja þau upp eða brjóta niður heiminn sem þau ættu að erfa?“ Þessara spurninga spyr listakonan Ísabella Leifsdóttir, sem vill með verkum sínum vekja athygli á ofgnóttinni í samfélagi okkar. Hún sýnir spegla sem hún hefur skreytt með smádóti úr plasti sem var á leið í endurvinnslu. Speglarnir eru fallegir og eigulegir munir, enda tilgangurinn að búa til verk sem fólk vill ekki farga heldur fegra heimili sín með. Einnig eru verkin áminning til neytenda um að hugsa sig um og velja vandlega áður en þeir rétta fram greiðslukortið í verslunum.

Halla Signý Kristjánsdóttir, þingmaður Framsóknarflokksins, hefur sent formanni og varaformanni atvinnuveganefndar, Lilju Rafneyju Magnúsdóttur og Ingu Sæland erindi þar sem hún óskar eftir því að boðað verði til sérstaks fundar í nefndinni til að ræða stöðu minni útgerða og áhrif hækkunar veiðigjalda á rekstrarstöðu þeirra.

Fannar Snær Danélsson, vörubílstjóri og virkur í athugasemdnum, hafði samband við Dreifarann nú þegar tæp vika er liðin af Vetrar-Olympíuleikunum í PyeongChang í Suður-Kóreu. Fannari var mikið niðri fyrir þegar hann tjáði sig um frammistöðu Íslands: „Við erum bara eins og eymingjar í þessum vetrar hérna íþróttum, þetta er bara til háborinnar skammar, þetta... já þetta getuleysi. Við ættum vitaskuld, sjáðu til, að vera langbest þarna suður frá, já eða í það minnsta samkeppnishæf. Þetta er bara óskiljanlegt og í raun, sjáðu til, hreinasta óhæfa.“

Heildaratvinnutekjur á landinu voru 9,7% hærri að raunvirði á árinu 2016 en þær voru árið 2008 en hafa verið lægri öll árin fram að því. Þetta kemur fram í nýútkominni skýrslu Byggðastofnunar um atvinnutekjur á árunum 2008-2016 eftir atvinnugreinum og svæðum. Mestu atvinnutekjurnar voru í heilbrigðis- og félagsþjónustu, iðnaði og fræðslustarfsemi en mesta aukningin á tímabilinu varð í greinum er tengjast ferðaþjónustu, þ.e. gistingu og veitingum, flutningum og geymslu og leigu og sérhæfðri þjónustu. Mesti samdrátturinn varð hins vegar í fjármála- og vátryggingaþjónustu og mannvirkjagerð. Meðalatvinnutekjur voru hæstar á Austurlandi og þar næst kemur höfuðborgarsvæðið en lægstar eru þær á Norðurlandi vestra og á Suðurnesjum.

Rúv.is segir frá því að frímúrarastúkan í Skagafirði væri laus undan þeirri kvöð að deila eignarhaldi á húsi á Sauðárkróki með Kaupfélagi Skagfirðinga og fleirum. Frímúrararnir hafa fengið það staðfest með dómi að Sýslumaðurinn á Norðurlandi vestra hafi gert mistök fyrir tæpum sex árum þegar hann staðfesti samning um eignaskipti á húsinu.

Í sölum Salthússins á Skagaströnd, hinu nýja gistiheimili að Einbúastíg 3, hafa nú verið skipulagðar myndlistarsýningar á þessu ári og hefur sýningarrýmið fengið nafnið Salthús gallerí. Fyrsta sýning ársins verður opnuð í dag, fimmtudaginn 15. febrúar kl. 17.-19 og er það Mia Hochrein myndlistarkona, sem ríður á vaðið og sýnir þar myndaröðina „Lost Place,“ sem tekin var í Salthúsinu sumarið 2016.

Á Facebooksíðu Lögreglunnar á Norðurlandi vestra kemur fram að fálkinn sem handsamaður var af bændum á Hnjúki í Vatnsdal hafi verið með skotsár. Kom það í ljós eftir skoðun dýralæknis. Á síðunni segir að ekki eigi að þurfa að benda á það að fálkar eru að sjálfsögðu alfriðaðir.

Það hefur líklega ekki farið fram hjá mörgum að það er öskudagur í dag og eins og vandi er til fara ýmsar kynjaverur á kreik á slíkum degi. Blaðamaður Feykis var á ferð á Hofsósi í morgun og hitti fyrir þó nokkuð af uppáklæddu fólki og furðuverum.

Á Facebook má sjá færslu Grétars Ásgeirsonar, starfsmanns Vegagerðarinnar, sem er hugsi yfir þeim sem virða ekki lokanir vega þegar veður og færð bjóða ekki upp á annað. Hann segir að í gærmorgun klukkan 7:15 hafi hann verið kallaður út til að aðstoða við lokun Öxnadalsheiðar vegna brjálaðs veðurs einn daginn enn. Það hafi gengið vel en þegar mokstursbílar fóru af stað eftir hádegið voru bílar fastir sem töfðu opnun Öxnadalsheiðar.