Fréttir

Þann 27. febrúar ætlar Guðrún Bergmann að hefja námskeið um hreint mataræði, námskeið sem leiðir þátttakendur í gegnum 24ra daga hreinsikúr, sem byggist á mataræði, bætiefnum og jákvæðu hugarfari. Tveir sameiginlegir fundir eru fyrirhugaðir að Löngumýri og að auki verða tveir fjarfundir. Í þau tæplega þrjú ár sem Guðrún Bergmann hefur haldið námskeiðin sín hafa þau verið vel sótt. Svo vel að einhver af þeim næstu sextán sem skrá sig á námskeiðið verður þúsundasti þátttakandinn.

Þóranna Ósk Sigurjónsdóttir í UMSS náði frábærum árangri á Reykjavíkurleikunum 2018 sem háðir voru í Laugardalshöllinni laugardaginn 3. febrúar. Leikarnir eru árlegt boðsmót þar sem flest af besta frjálsíþróttafólki landsins keppti auk erlendra gesta frá mörgum löndum. Þrír Skagfirðingar kepptu á mótinu og stóðu sig með sóma.

Búnaðarstofa Matvælastofnunar hefur sent frá sér tilkynningu þess efnis að óviðráðanlegar tafir hafa orðið á uppgjöri á heildarframlagi til sauðfjárbænda vegna ársins 2017 og fyrstu greiðslu beingreiðslna á árinu 2018 miðað við það sem áður hafði verið gefið út.

Dagur leikskólans er haldinn hátíðlegur í leikskólum landsins í dag, þriðjudaginn 6. febrúar. Þetta mun vera í ellefta skipti sem haldið er upp á daginn en 6. febrúar er merkilegur dagur í leikskólasögu þjóðarinnar því á þessum degi árið 1950 stofnuðu frumkvöðlar leikskólakennara fyrstu samtök sín. Leikskólar landsins hafa á undanförnum árum haldið upp á dag leikskólans með margbreytilegum hætti og þannig stuðlað að jákvæðri umræðu um leikskólastarfið enda er tilgangur Dags leikskólans að vekja athygli á hlutverki leikskóla og starfi leikskólakennara.

Það gerði mikla hláku á landinu í gær með hlýjum vindstrengjum og úrhellisrigningu. Vindstyrkurinn fór upp í 29m/s á Bergstöðum og hviðurnar náðu að feykja hinum ýmsu hlutum um koll. Á Sauðárkróki rann mikið leysingavatn niður klaufirnar á Nöfum og stóðu starfsmenn sveitarfélagsins og verktakar vaktina og náðu að stýra flaumnum með því að grafa rásir og setja möl þar sem þurfti.

Á fundi Byggðarráðs Húnaþings vestra mánudaginn 29. janúar kom fram að nú hafa tillögur starfshóps um framtíðarskipan skólamála í Húnaþingi vestra farið til umræðu og umsagnar hjá nemendaráði, skólaráði og fræðsluráði. Ennfremur voru tillögurnar kynntar á vef sveitarfélagsins þar sem íbúum gafst kostur á að gera athugasemdir við þær. Lýstu skólaráð, nemendaráð og fræðsluráð ánægju með tillögurnar og ekki komu fram athugasemdir eftir almenna kynningu á vef sveitarfélagsins.

Eyþór Franzson Wechner, organisti Blönduóskirkju og píanókennari við Tónlistarskóla Austur-Húnavatnssýslu var kosinn maður ársins í Austur-Húnavatnssýslu árið 2017 af lesendum Húnahornsins. Í umfjöllun huna.is segir að Eyþór þyki einstaklega hæfileikaríkur organisti og tónlistarflutningur hans hafi vakið aðdáun allra Húnvetninga sem á hann hafi hlustað. Átti hann stóran þátt í sigurgöngu Karlakórs Bólstaðarhlíðarhrepps í keppninni um kóra Íslands á síðasta ári.

Bjarni Jónsson varaþingmaður Vinstri grænna tók sæti sem varamaður á Alþingi í síðustu viku og sat ekki aðgerðalaus frekar en fyrri daginn. Lagði hann m.a. fyrirspurn til samgöngu- og sveitarstjórnarráðherra um varaflugvöll við Sauðárkrók.

Matvælastofnun hefur skráð íslenskt lambakjöt sem verndað afurðarheiti á grundvelli laga nr. 130 frá 2014 um vernd afurðaheita sem geta vísað til uppruna, landsvæðis eða hefðbundinnar sérstöðu. Enska útgáfan, Icelandic lamb er einnig skráð. Lambakjöt er fyrsta íslenska afurðin sem fær vernd samkvæmt lögunum. Þar með er lambið komið í flokk með Parma- skinku, Kampavín, Camembert de Normandie ost og Kalix Löjrom kavíar.

Veðurstofa Íslands hefur gefið út gula viðvörun fyrir höfuðborgarsvæðið, Suðurland, Faxaflóa, Breiðafjörð, Vestfirði, Strandir og Norðurland vestra og Suðausturland. Aðstæður gætu orðið erfiðar á fjallvegum s.s. Holtavörðuheiði, Þverárfjalli, Vatnsskarði og Öxnadalsheiði.