Fréttir

Mikið hefur verið um að vera á Sauðfjársetrinu á Ströndum í sumar, margvíslegar uppákomur og viðburðir. Framundan er svo stærsta samkoma ársins, Íslandsmeistaramótið í hrútadómum, sem verður haldið sunnudaginn 19. ágúst og hefst kl. 14:00 í Sævangi við Steingrímsfjörð.

Það var fallegt um að litast á Sauðárkróki í gær þegar þessi mynd var tekin, logn og rjómablíða þó þokan hefði tyllt sér á Þórðarhöfðann og eyjarnar. Það skyggði þó á ánægju margra að sjá að tveir dragnótabátar höfðu gert sig heimakomna rétt upp við landsteinana og má sjá annan þeirra, Hafborgu EA 152 sem er tæplega 300 brúttólesta skip, á myndinni þar sem hún er að veiðum á slóðum sem vinsælar eru hjá sjóstangaveiðmönnum. Hinn báturinn var Onni HU 36 sem er 60 brúttólestir

Það vita flestir að það eru miklir peningar í heimsfótboltanum þó svo að pyngjurnar séu kannski ekki þungar hjá fótboltaklúbbunum hér á Fróni. Íslensku landsliðin í knattspyrnu hafa náð mögnuðum árangri síðustu árin og þátttaka karlalandsliðsin á HM í knattspyrnu í Rússlandi í sumar skilar talsverðum tekjum til KSÍ sem hyggst skipta 200 milljónum króna á milli aðildarfélaga sinna.

Nú hafa tvær af fjórum sveitarstjórnum í Austur-Húnavatnssýslu tilnefnt fulltrúa í sameiningarnefnd sveitarfélaga í sýslunni og eru því líkur á að sameiningarviðræður verði teknar upp að nýju á næstunni en hlé var gert á þeim fyrir sveitarstjórnarkosningar sl. vor. Eru það hreppsnefnd Skagabyggðar og sveitarstjórn Blönduósbæjar en málið hefur ekki verið tekið fyrir hjá sveitarstjórnum hinna tveggja sveitarfélaganna.

Það styttist í að körfuboltalið Tindastóls í Dominos-deildinni hefji æfingar fyrir komandi keppnistímabil. Eftir að hafa fengið Daneiro Axel Thomas, Brynjar Þór Björnsson og Urald King til liðs við sig var það síðan leitt fyrir Tindastólsmenn að missa Skagfirðinginn Sigtrygg Arnar Björnsson yfir til Grindvíkinga nú í sumar. Stólarnir eru þó ekki að baki dottnir og hafa fundið reynslumikinn Króata, Dino Butorac, til að fylla skarð Arnars og mun hann leika með Stólunum á komandi keppnistímabili.

Nafn: Álfhildur Leifsdóttir. Hverra manna ertu og hvar upp alin: Ég er dóttir Kristínar og Leifs frá Keldudal, yngst af sex systkinum og var svo heppin að alast þar upp við bústörf og hestamennsku þar til ég fór suður í háskólanám. Hvað ætlaðir þú að verða þegar þú yrðir stór? Sálfræðingur – en þar sem ég var í mörg ár með sumarskóla fyrir fósturbörn sem voru hjá mömmu og pabba í sveit, þá vissu víst allir í kringum um mig að ég yrði kennari, nema ég. Besta bíómyndin? Notting Hill - því Spike er flottastur.

Kristján Þór Júlíusson, sjávarútvegs- og landbúnaðarráðherra, hefur boðað til funda með sauðfjárbændum á nokkrum stöðum á landinu næstu daga. Með honum í för verða þau Unnur Brá Konráðsdóttir, formaður samninganefndar ríkisins og Haraldur Benediktsson, formaður Samráðshóps um endurskoðun búvörusamninga.

Á fundi byggðarráðs Sveitarfélagsins Skagafjarðar nú í morgun var samþykkt samhljóða að ráða Sigfús Inga Sigfússon í starf sveitarstjóra Sveitarfélagsins Skagafjarðar.

Ungmenni frá Blöndustöð Landsvirkjunar gróðursettu nýlega á tólfta hundrað birkiplöntur til endurheimtar Brimnesskóga vestan við ána Kolku Skagafirði. Þar af voru 380 plöntur í tveggja lítra pottum og um 800 í fimmtán gata bökkum. Landsvirkjun hefur lagt verkefninu lið um árabil undir yfirskriftinni “Margar hendur vinna létt verk“.

Sameiginlegt lið Kormáks/Hvatar, sigraði Kórdrengi með sannfærandi hætti, 3-0, á Blönduósvelli síðastliðinn föstudag. Mikið jafnræði var með liðunum í fyrri hálfleik, Kórdrengir stórhættulegir en heimamenn stóðu í þeim.